Esera 7:1-28

  • Esera o ya kwa Jerusalema (1-10)

  • Aretaserese o kwalela Esera lekwalo (11-26)

  • Esera o baka Jehofa (27, 28)

7  Morago ga dilo tseno, ka nako ya puso ya ga Kgosi Aretaserese+ wa Peresia, Esera*+ o ne a boa. Esera e ne e le morwa Seraia,+ morwa Asaria, morwa Hilekia,+  morwa Shalume, morwa Sadoke, morwa Ahitube,  morwa Amaria, morwa Asaria,+ morwa Meraiothe,  morwa Serahia, morwa Usi, morwa Buki,  morwa Abishua, morwa Finease,+ morwa Eliasare,+ morwa Arone+ yo e neng e le moperesiti yo mogolo.  Esera o ne a tla a tswa kwa Babelona. E ne e le mokwalolodi* yo o neng a itse* Molao wa ga Moshe+ fela thata, o Jehofa, Modimo wa Iseraele a neng a o neile batho ba gagwe. Kgosi e ne ya mo naya sengwe le sengwe se a neng a se kopa ka gonne Jehofa, Modimo wa gagwe o ne a mo thusa.  Bangwe ba Baiseraele, baperesiti, Balefi,+ baopedi,+ badisa ba dikgoro+ le batlhanka ba ba direlang mo tempeleng*+ ba ne ba tsamaya le Esera kwa Jerusalema mo ngwageng wa bosupa wa ga Kgosi Aretaserese.  Mme Esera o ne a goroga mo Jerusalema mo kgweding ya botlhano, mo ngwageng wa bosupa wa kgosi eo.  O ne a simolola loeto lwa go tswa kwa Babelona mo letsatsing la ntlha la kgwedi ya ntlha, mme o ne a goroga mo Jerusalema mo letsatsing la ntlha la kgwedi ya botlhano, ka gonne Modimo wa gagwe o ne a mo eme nôkeng.+ 10  Esera o ne a baakantse pelo ya gagwe* gore o tla ithuta Molao wa ga Jehofa a bo a o diragatsa,+ le gore o tla ruta melawana le dikatlholo tsa one mo Iseraele.+ 11  Eno ke khopi ya lekwalo le Kgosi Aretaserese a neng a le naya Esera yo e neng e le moperesiti e bile e le mokwalolodi,* mankge wa thuto* ya ditaelo le melawana e Jehofa a neng a e neile Baiseraele: 12  * “Nna Aretaserese,+ kgosi ya dikgosi, ke kwalela moperesiti Esera yo e leng mokwalolodi* wa Molao wa Modimo wa magodimo jaana: E kete o ka nna le kagiso. Mme jaanong 13  ke ntshitse taelo ya gore mongwe le mongwe yo o mo bogosing jwa me wa Baiseraele, le baperesiti ba bone le Balefi ba ba batlang go tsamaya le wena kwa Jerusalema ba tsamaye.+ 14  Gonne kgosi le bagakolodi ba yone ba le supa ba go roma gore o ye go batlisisa gore a Molao wa Modimo wa gago, o o mo seatleng sa gago, o a diragadiwa kwa Juda le kwa Jerusalema, 15  le gore o tseye selefera le gauta tse kgosi le bagakolodi ba yone ba di ntshitseng ka go rata ba di ntshetsa Modimo wa Iseraele, yo o nnang kwa Jerusalema, 16  le selefera yotlhe le gauta tse o di amogelang* mo porofenseng yotlhe* ya Babelona, mmogo le mpho e batho le baperesiti ba e ntshetsang ntlo ya Modimo wa bone ka go rata, e e kwa Jerusalema.+ 17  Mme o se ka wa senya nako, o dirise madi ano go reka dipoo,+ diphelefu,+ dikwanyana,+ mmogo le ditlhabelo tsa tsone tsa dijo tsa ditlhaka+ le ditlhabelo tsa tsone tsa senô+ mme o di ntshe setlhabelo mo sebesong sa ntlo ya Modimo wa lona kwa Jerusalema. 18  “Mme sepe fela se wena le bomorwarrago lo bonang se le molemo mo go lona, lo ka nna lwa se dira lo dirisa selefera le gauta e e setseng, go dumalana le thato ya Modimo wa lona. 19  Mme dijana tsotlhe tse o di newang tse di dirisediwang tirelo ya ntlo ya Modimo wa gago, o di ise kwa Jerusalema fa pele ga Modimo.+ 20  Mme dilo tse dingwe tsotlhe tse di tlhokegang tsa ntlo ya Modimo wa gago tse o tshwanetseng go di ntsha, o tla di ntsha go tswa mo bobolokelamatlotlong jwa kgosi.+ 21  “Nna Kgosi Aretaserese, ke ntshitse taelo e e yang kwa babolokamatlotlong botlhe ba ba kwa kgaolong e e Ka Kwa ga Noka,* gore sengwe le sengwe se moperesiti Esera+ yo e leng mokwalolodi* wa Molao wa Modimo wa magodimo a se kopang mo go lona, se dirwe ka bonako, 22  go fitlha go ditalenta* tsa selefera di le 100, dikilogerama di le 16 000* tsa korong, dilitara di le 2 200* tsa beine+ le dilitara di le 2 200 tsa leokwane,+ le letswai+ le le se nang selekanyo. 23  A sengwe le sengwe se Modimo wa magodimo a se laelang se direlwe ntlo ya Modimo wa magodimo ka tlhoafalo,+ gore bogale bo se ka jwa tlela batho ba kgosi e ba busang le bomorwaayone.+ 24  Mme mo godimo ga moo, lo itsisiwe gore ga go a letlelelwa gore baperesiti, Balefi, baopedi,+ balebedi ba dikgoro, batlhanka ba ba direlang mo tempeleng,*+ le badiri ba mo ntlong eno ya Modimo, ba duedisiwe lekgetho, sehuba*+ kgotsa lekgetho la tsela. 25  “Mme wena, Esera, go ya ka botlhale jo Modimo wa gago a go neileng jone,* tlhoma bomagiseterata le baatlhodi gore ba atlhole batho botlhe ba ba kwa kgaolong e e Ka Kwa ga Noka, e leng botlhe ba ba itseng melao ya Modimo wa gago; mme ope fela yo o sa e itseng, o tshwanetse go mo e ruta.+ 26  Mme ope fela yo o sa ikobeleng Molao wa Modimo wa gago le molao wa kgosi o tshwanetse go atlholwa ntle le go senya nako, a ka tswa a atlholelwa loso, go lelekwa mo nageng, go duedisiwa madi kgotsa go tsenngwa mo kgolegelong.” 27  E kete Jehofa, Modimo wa borraaronamogolo a ka bakwa, yo o tlhotlheleditseng kgosi gore e kgabise ntlo ya ga Jehofa e e kwa Jerusalema!+ 28  Mme o mpontshitse lorato lo lo sa kgaotseng fa pele ga kgosi+ le bagakolodi ba yone+ le dikgosana tsotlhe tse di maatla tsa kgosi. Ka jalo, ke ne ka nna pelokgale* ka gonne Jehofa, Modimo wa me o ne a nthusa, mme ke ne ka phutha banna ba ba eteletseng pele* mo Iseraele gore ba tsamaye le nna.

Dintlha Tse di Kwa Tlase

Mo go kayang “Thuso.”
Kgotsa “mokwadi.”
Kgotsa “E ne e le mokwalolodi yo o setswerere wa.”
Kgotsa “le Banethinime.” Seheb., “le ba ba abilweng.”
Kgotsa “o ne a ikemiseditse mo pelong ya gagwe.”
Kgotsa “mokwadi.”
Kgotsa “mokwalolodi wa mafoko.”
Kwa tshimologong, Esr 7:12 go ya go 7:26 e ne e kwadilwe ka Searamaika.
Kgotsa “mokwadi.”
Seara., “o di fitlhelang.”
Kgotsa “mo kgaolong e e nang le taolo.”
Kgotsa “ba ba Ka Kwa ga Euferatese.”
Kgotsa “mokwadi.”
Talenta e lekana le 34,2 kg. Bona Dintlha B14.
Seheb., “dilekanyo tsa koro di le 100.” Bona Dintlha B14.
Seheb., “dilekanyo tsa bata di le 100.” Bona Dintlha B14.
Kgotsa “Banethinime.” Seara., “ba ba abilweng.”
Seara., “go ya ka botlhale jwa Modimo wa gago jo bo mo seatleng sa gago.”
Kgotsa “ke ne ka nonofa.”
Seheb., “ka phutha ditlhogo.”