Esera 4:1-24

  • Ba a ganediwa fa ba ntse ba aga (1-6)

  • Baba ba ya go ngongorega kwa go Kgosi Aretaserese (7-16)

  • Karabo ya ga Aretaserese (17-22)

  • Tiro ya go aga tempele e a emisiwa (23, 24)

4  E rile baba ba Juda le ba Benjamine+ ba utlwa gore batho ba ba boileng kwa botshwarwa+ ba ne ba agela Jehofa, Modimo wa Iseraele tempele,  ka yone nako eo, ba ne ba ya kwa go Serubabele le ditlhogo tsa dikgotla tsa Baiseraele mme ba ba raya ba re: “Mma re lo thuseng go aga; ka gonne fela jaaka lona, re obamela* Modimo wa lona+ e bile re ntse re mo ntshetsa ditlhabelo fa e sa le mo malatsing a ga Kgosi Esare-hadone+ wa Asiria, yo o re tlisitseng fano.”+  Le fa go ntse jalo, Serubabele le Jeshua le ditlhogo tsotlhe tsa dikgotla tsa Iseraele ba ne ba ba raya ba re: “Ga re tlhoke thuso ya lona mo tirong ya go agela Modimo wa rona ntlo,+ ka gonne re tla agela Jehofa, Modimo wa Iseraele ntlo re le nosi, fela jaaka Kgosi Kurose, kgosi ya Peresia a re laetse.”+  Go tswa foo, batho ba lefatshe leo ba ne ba tswelela ba dira gore batho ba Juda ba kgobege marapo* e bile ba ne ba ba nyemisa moko gore ba se ka ba aga.+  Ba ne ba thapa bagakolodi gore ba kgoreletse dithulaganyo tsa bone+ malatsi otlhe a ga Kgosi Kurose wa Peresia go fitlha ka puso ya ga Kgosi Dario+ wa Peresia.  Kwa tshimologong ya puso ya ga Ahasueruse, ba ne ba kwala lekwalo le le latofatsang banni ba Juda le Jerusalema.  Mme mo motlheng wa ga Kgosi Aretaserese wa Peresia, Bishelame, Mitheredathe, Tabeele le badirikaene botlhe ba ne ba kwalela Kgosi Aretaserese; ba ne ba ranolela lekwalo leo mo puong ya Searamaika,+ ba le kwala ka mokwalo wa Searamaika.*  * Modiredimogolo wa puso e bong Rehume le mokwadi e bong Shimeshai ba ne ba kwalela Kgosi Aretaserese lekwalo le le latofatsang batho ba Jerusalema, ba le kwala jaana:  (Le ne le tswa kwa modiredimogolong wa puso e bong Rehume le mokwadi e bong Shimeshai le badirikabone botlhe, baatlhodi le balaodi ba babotlana, bakwaledi, batho ba kwa Ereke,+ Bababelona, banni ba Susa,+ e leng Baelama,+ 10  le kwa ditšhabeng tse dingwe tsotlhe tse Asenapare yo mogolo le yo o tlotlegang a neng a di isitse botshwarwa a bo a di baya mo metseng ya Samarea,+ le kwa bathong ba ba kwa kgaolong e e Ka Kwa ga Noka,* mme jaanong 11  eno ke khopi ya lekwalo le ba neng ba le mo romelela.) “Go Kgosi Aretaserese, go tswa kwa batlhankeng ba gago, banna ba kwa kgaolong e e Ka Kwa ga Noka: Mme jaanong 12  a kgosi e itse gore Bajuda ba ba neng ba tla kwa go rona ba tswa kwa go wena ba gorogile kwa Jerusalema. Mme ba aga motse oo sesha. Batho ba motse oo ba bosula e bile ke batlhanogi, mme ba tloga ba fetsa go aga dipota+ le go baakanya metheo. 13  Jaanong a kgosi e itse gore fa motse ono o ka agiwa sesha le dipota tsa one tsa wediwa, ga ba kitla ba ntsha lekgetho, sehuba*+ kgotsa lekgetho la tsela, mme seo se ka dira gore mabolokelamatlotlo a dikgosi a se ka a nna le sepe. 14  E re ka re amogela tuelo ya rona go tswa kwa ntlong ya segosi* e bile re bona go sa tshwanela gore re lebe fela dilo tsa kgosi di senngwa, ka jalo re rometse lekwalo leno gore kgosi e itsisiwe seno, 15  e le gore go tle go dirwe dipatlisiso mo bukeng ya dipego tsa dikgosi tse di busitseng pele ga gago.*+ Mo bukeng eo ya dipego, o tla bona e bile o tla lemoga gore batho ba motse oo ke batlhanogi, ba kotsi mo dikgosing le mo diporofenseng,* e bile mo go one go ntse go na le batho ba ba tlhotlheletsang boepapuso go tswa malatsing a bogologolo. Ke gone ka moo, motse oo o neng wa senngwa.+ 16  Re itsise kgosi gore fa motse ono o ka agiwa sesha le dipota tsa one tsa wediwa, ga o kitla o nna le taolo* mo kgaolong e e Ka Kwa ga Noka.”+ 17  Kgosi e ne ya romela molaetsa ono kwa modiredimogolong wa puso e bong Rehume le mokwadi e bong Shimeshai le badirikabone botlhe ba ba neng ba nna kwa Samarea le kwa kgaolong yotlhe e e Ka Kwa ga Noka: “Madume! 18  Lekwalo la semolao le lo le re romeletseng le ne la balwa ka tsela e e utlwalang sentle* fa pele ga me. 19  Ke ne ka ntsha taelo ya gore go dirwe dipatlisiso, mme go ne ga lemogiwa gore go tswa bogologolong motse oo o ntse o nna le dikgotlhang le dikgosi mme batho ba one ba ntse ba sa ikobe e bile ba baka dikhuduego.+ 20  Go ne go na le dikgosi tse di nonofileng tse di neng di busa kwa Jerusalema tse di neng di laola kgaolo yotlhe e e Ka Kwa ga Noka, mme di ne di duelwa lekgetho, sehuba le lekgetho la tsela. 21  Jaanong ntshang taelo ya gore banna bao ba emise tiro, gore motse oo o se ka wa agiwa sesha go fitlha ke ntsha taelo. 22  Lo tlhomamise gore lo dira sengwe ka ga seno, gore dilo tsa kgosi di se ka tsa senngwa go ya pele.”+ 23  Jaanong fa lekwalo la semolao le le kwalolotsweng la ga Kgosi Aretaserese le sena go balwa fa pele ga ga Rehume le mokwadi e bong Shimeshai le badirikabone, ba ne ba itlhaganela ba ya kwa Jerusalema kwa Bajudeng mme ba ne ba emisa tiro ya bone ka dikgoka. 24  Mme ka yone nako eo tiro ya ntlo ya Modimo, e e neng e le kwa Jerusalema, e ne ya ema; mme e ne ya tswelela e eme go fitlha mo ngwageng wa bobedi wa puso ya ga Kgosi Dario wa Peresia.+

Dintlha Tse di Kwa Tlase

Seheb., “batla.”
Seheb., “ba koafatsa diatla tsa batho ba Juda.”
Kgotsa gongwe “le ne le kwadilwe ka Searamaika morago le bo le ranolwa.”
Kwa tshimologong, Esr 4:8 go ya go 6:18 e ne e kwadilwe ka Searamaika.
Kgotsa “ba ba Ka Kwa ga Euferatese.”
Seheb., “re ja letswai la ntlo ya segosi.”
Seara., “tsa borrago.”
Kgotsa “mo dikgaolong tse di nang le taolo.”
Seara., “seabe.”
Kgotsa gongwe “le ne la ranolwa la bo la balwa.”