Esera 10:1-44

  • Kgolagano ya go tsamaisa basadi ba batswakwa (1-14)

  • Basadi ba batswakwa ba a tsamaisiwa (15-44)

10  Fa Esera a ntse a rapela+ e bile a bolela maleo a batho ba gagabo, a lela e bile a namaletse sefatlhego sa gagwe se lebile fa fatshe, a le fa pele ga ntlo ya Modimo wa boammaaruri, boidiidi jo bogolo jwa banna, basadi le bana ba Iseraele bo ne jwa phuthega go mo dikologa ka gonne batho ba ne ba lela thata.  Foo Shekania morwa Jehiele+ wa bomorwa Elama+ o ne a raya Esera a re: “Ga re a ka ra ikanyega mo Modimong wa rona ka go nyala* basadi ba ba tswang mo ditšhabeng tse dingwe.+ Le fa gone seemo se ntse jaana, go sa ntse go na le tsholofelo ka Iseraele.  Jaanong a re direng kgolagano le Modimo wa rona+ ya gore re tsamaise basadi botlhe le bana ba ba ba tshotseng, go dumalana le kaelo ya ga Jehofa le ya ba ba boifang* taelo ya Modimo wa rona.+ A re direng go dumalana le Molao.  Ema, ka gonne kgang eno ke boikarabelo jwa gago, mme re na le wena. Nna pelokgale mme o dire se se tlhokegang.”  Fa a rialo, Esera o ne a tsoga mme a laela balaodi ba baperesiti, Balefi le Baiseraele botlhe gore ba ikane gore ba tla dira se se sa tswang go buiwa.+ Ka jalo, ba ne ba ikana.  Jaanong Esera o ne a tswa fa pele ga ntlo ya Modimo wa boammaaruri mme a ya kwa ntlwaneng* ya ga Jehohanane morwa Eliashibe. Le fa gone a ile a ya koo, ga a ka a ja dijo e bile ga a ka a nwa metsi, ka gonne o ne a hutsafaditswe ke go bo batho ba ba neng ba boile kwa botshwarwa ba ne ba sa ikanyege.+  Go tswa foo, ba ne ba dira kitsiso mo Juda yotlhe le mo Jerusalema ya gore batho botlhe ba ba boileng kwa botshwarwa ba phuthegele kwa Jerusalema;  mme go ya ka tshwetso e e dirilweng ke dikgosana le bagolwane, ope fela yo o neng a ka se tle mo malatsing a le mararo, dithoto tsotlhe tsa gagwe di ne di tla gapiwa mme ene o ne a tla lelekwa mo phuthegong ya batho ba ba boileng kwa botshwarwa.+  Ka jalo, batho botlhe ba Juda le ba Benjamine ba ne ba phuthegela kwa Jerusalema mo malatsing a le mararo, mo kgweding ya borobongwe, mo letsatsing la bo20 la kgwedi eo. Batho botlhe ba ne ba ntse mo lolwapeng lwa ntlo ya Modimo wa boammaaruri, ba roroma ka ntlha ya kgang eno le ka gonne pula e ne e na thata. 10  Go tswa foo, moperesiti Esera o ne a ema mme a ba raya a re: “Ga lo a ka lwa ikanyega mo Modimong wa rona ka go nyala basadi ba batswakwa,+ mme ka go dira jalo lo okeditse molato wa Iseraele. 11  Jaanong ipoleleng boleo jwa lona mo go Jehofa, Modimo wa borraalonamogolo mme lo dire thato ya gagwe. Ikgaoganyeng le ditšhaba tsa mafatshe a mangwe le basadi bano ba batswakwa.”+ 12  Phuthego yotlhe e ne ya araba jaana ka lentswe le le kwa godimo: “Re tla dira fela jaaka o buile. 13  Le fa go ntse jalo, go na le batho ba bantsi, mme eno ke paka ya dipula. Ga go kgonege gore re eme kwa ntle, e bile kgang eno ga e kitla e tsaya letsatsi le le lengwe kgotsa a mabedi, ka gonne re leofile re le bantsi. 14  Ka jalo, tsweetswee mma dikgosana tsa rona di emele phuthego eno yotlhe;+ mme a botlhe mo metseng ya rona ba ba nyetseng basadi ba batswakwa ba tle ka nako e e tlhomilweng, mmogo le bagolwane le baatlhodi ba motse mongwe le mongwe, go fitlha re faposa bogale jo bo tukang jwa Modimo wa rona mo go rona ka kgang eno.” 15  Le fa go ntse jalo, Jonathane morwa Asahele le Jahaseia morwa Tikefa ba ne ba se ka ba dumalana le seno, mme Meshulame le Shabethai+ ba e leng Balefi ba ne ba ba ema nôkeng. 16  Mme gone, batho ba ba boileng kwa botshwarwa ba ne ba dira se go neng go dumalanwe ka sone; mme moperesiti Esera le ditlhogo tsa dikgotla tsa bone, botlhe ba ba neng ba tlhophilwe ka maina, ba ne ba kopana ba le bosi mo letsatsing la ntlha la kgwedi ya bolesome gore ba sekaseke kgang eno; 17  mme mo letsatsing la ntlha la kgwedi ya ntlha ba ne ba fetsa go rarabolola kgang e e amanang le banna botlhe ba ba neng ba nyetse basadi ba batswakwa. 18  Mme go ne ga lemogiwa gore barwa bangwe ba baperesiti ba ne ba nyetse basadi ba batswakwa:+ go tswa mo go bomorwa Jeshua+ morwa Jehosadake le bomorwarraagwe, e ne e le Maaseia, Eliesere, Jaribe le Gedalia. 19  Le fa go ntse jalo, ba ne ba solofetsa* gore ba tla tsamaisa basadi ba bone, mme e re ka ba ne ba le molato, ba ne ba tla ntsha phelefu mo letsomaneng la bone ba e ntshetsa molato wa bone.+ 20  Go tswa mo go bomorwa Imere,+ e ne e le Hanani le Sebadia; 21  mme go tswa mo go bomorwa Harime,+ e ne e le Maaseia, Elija, Shemaia, Jehiele le Usia; 22  mme go tswa mo go bomorwa Pashure,+ e ne e le Elioenai, Maaseia, Ishemaele, Nethanele, Josabade le Eleasa. 23  Mme go tswa mo Balefing, e ne e le Josabade, Shimei, Kelaia (go tewa Kelita), Pethahia, Juda le Eliesere; 24  mme go tswa mo baopeding, e ne e le Eliashibe; mme go tswa mo badiseng ba dikgoro, e ne e le Shalume, Teleme le Uri. 25  Mme go tswa mo Baiseraeleng, ba bomorwa Paroshe,+ e ne e le Ramia, Isia, Malekija, Mijamine, Eliasare, Malekija le Benaia; 26  mme go tswa mo go bomorwa Elama,+ e ne e le Matania, Sekarea, Jehiele,+ Abedi, Jeremothe le Elija; 27  mme go tswa mo go bomorwa Satu,+ e ne e le Elioenai, Eliashibe, Matania, Jeremothe, Sabade le Asisa; 28  mme go tswa mo go bomorwa Bebai,+ e ne e le Jehohanane, Hanania, Sabai le Athelai; 29  mme go tswa mo go bomorwa Bani, e ne e le Meshulame, Maluke, Adaia, Jashube, Sheale le Jeremothe; 30  mme go tswa mo go bomorwa Pahathe-moabe,+ e ne e le Adena, Kelale, Benaia, Maaseia, Matania, Besalele, Binui le Manase; 31  mme go tswa mo go bomorwa Harime,+ e ne e le Eliesere, Ishija, Malekija,+ Shemaia, Shimeone, 32  Benjamine, Maluke le Shemaria; 33  go tswa mo go bomorwa Hashume,+ e ne e le Matenai, Matata, Sabade, Elifelete, Jeremai, Manase le Shimei; 34  go tswa mo go bomorwa Bani, e ne e le Maadai, Amerame, Uele, 35  Benaia, Bedeia, Keluhi, 36  Fania, Meremothe, Eliashibe, 37  Matania, Matenai le Jaasu; 38  mme go tswa mo go bomorwa Binui, e ne e le Shimei, 39  Shelemia, Nathane, Adaia, 40  Makenadebai, Shashai, Sharai, 41  Asarele, Shelemia, Shemaria, 42  Shalume, Amaria le Josefa; 43  mme go tswa mo go bomorwa Nebo, e ne e le Jeiele, Matithia, Sabade, Sebina, Jadai, Joele le Benaia. 44  Bano botlhe ba ne ba nyetse basadi ba batswakwa,+ mme ba ne ba tsamaisa basadi ba bone mmogo le barwa ba bone.+

Dintlha Tse di Kwa Tlase

Kgotsa “ka go tsenya mo matlong a rona.”
Seheb., “ba ba roromisiwang ke.”
Kgotsa “kwa phaposing ya bojelo.”
Seheb., “ba ne ba ntsha diatla tsa bone.”