Esera 5:1-17

  • Bajuda ba tswelela ka go aga tempele (1-5)

  • Tatenai o kwalela Kgosi Dario lekwalo (6-17)

5  Go tswa foo, moporofeti Hagai+ le moporofeti Sekarea,+ setlogolwana sa ga Ido,+ ba ne ba porofetela Bajuda ba ba neng ba le kwa Juda le kwa Jerusalema, mo leineng la Modimo wa Iseraele yo o neng a ba okametse.  Ka yone nako eo, Serubabele+ morwa Shealatiele le Jeshua+ morwa Jehosadake ba ne ba simolola go aga ntlo ya Modimo sesha,+ e e neng e le kwa Jerusalema; mme baporofeti ba Modimo ba ne ba na le bone e bile ba ba eme nôkeng.+  Ka nako eo, Tatenai yo e leng mmusi wa kgaolo e e Ka Kwa ga Noka* le Shethare-bosenai le badirikabone ba ne ba tla mo go bone mme ba ba botsa ba re: “Ke mang yo o ntshitseng taelo ya gore lo age ntlo eno le gore lo wetse kago eno?”*  Go tswa foo, ba ne ba ba botsa ba re: “Maina a banna ba ba berekang mo kagong eno ke bomang?”  Mme gone, Modimo o ne a tlhokometse* bagolwane ba Bajuda,+ mme ga ba a ka ba ba emisa go fitlha pego e romelwa kwa go Dario le lekwalo la semolao le le buang ka kgang eo le tla.  Eno ke khopi ya lekwalo le Tatenai yo e leng mmusi wa kgaolo e e Ka Kwa ga Noka le Shethare-bosenai le badirikaene, e leng balaodi ba babotlana ba kgaolo e e Ka Kwa ga Noka, ba neng ba e romelela Kgosi Dario;  ba ne ba mo romelela pego eno, mme seno ke se ba neng ba se kwala: “Go Kgosi Dario: “A kagiso e nne le wena!  A kgosi e itse gore re ne ra ya kwa porofenseng* ya Juda kwa ntlong ya Modimo yo mogolo, mme e ntse e agiwa ka maje a matona a a pitikololwang, e bile go bewa dikota mo dipoteng. Batho ba dira tiro eo ka tlhagafalo e bile e tsweletse pele ka ntlha ya go bo ba dira ka natla.  Mme re ne ra botsa bagolwane ba bone ra re: ‘Ke mang yo o ntshitseng taelo ya gore lo age ntlo eno le gore lo wetse kago eno?’*+ 10  Gape re ne ra ba botsa maina a bone gore re kgone go kwala maina a banna ba ba eteletseng pele, gore re tle re go itsise gore ke bomang. 11  “Mme ba ne ba re araba ba re: ‘Re batlhanka ba Modimo wa magodimo le lefatshe, mme re aga sesha ntlo e e neng e agilwe dingwaga di le dintsi tse di fetileng, e kgosi e kgolo ya Iseraele e neng ya e aga ya bo ya e wetsa.+ 12  Le fa go ntse jalo, e re ka borraarona ba ile ba galefisa Modimo wa magodimo,+ o ne a ba tsenya mo seatleng sa ga Kgosi Nebukadenesare+ wa Babelona, yo e leng Mokaladia, yo o neng a thuba ntlo eno+ a bo a isa batho botshwarwa kwa Babelona.+ 13  Le fa go ntse jalo, mo ngwageng wa ntlha wa ga Kgosi Kurose wa Babelona, Kgosi Kurose o ne a ntsha taelo ya gore ntlo eno ya Modimo e agiwe sesha.+ 14  Mo godimo ga moo, Kgosi Kurose o ne a ntsha dijana tsa gauta le tsa selefera tsa ntlo ya Modimo mo tempeleng ya Babelona, tse Nebukadenesare a neng a di tsere mo tempeleng e e kwa Jerusalema a bo a di isa kwa tempeleng ya Babelona.+ Di ne tsa newa monna mongwe yo o bidiwang Sheshebasare,*+ yo Kurose a neng a mo tlhoma gore a nne mmusi.+ 15  Kurose o ne a mo raya a re: “Tsaya dijana tseno mme o ye kwa Jerusalema gore o tle o di busetse mo tempeleng, e e tla agiwang sesha mo lefelong le e neng e le mo go lone pele.”+ 16  Foo Sheshebasare o ne a tla, mme o ne a thaya metheo ya ntlo ya Modimo,+ e e kwa Jerusalema; mme e ntse e agiwa go tloga ka nako eo go fitlha jaanong, le fa go ntse jalo ga e ise e wediwe.’+ 17  “Jaanong fa kgosi e bona go le molemo, a go dirwe dipatlisiso mo bobolokelamatlotlong jwa kgosi jo bo koo kwa Babelona, go tlhomamisa gore a Kgosi Kurose o ne a ntsha taelo ya gore ntlo ya Modimo e e kwa Jerusalema e agiwe sesha;+ mme a kgosi e re itsise gore e dirile tshwetso efe ka kgang eno.”

Dintlha Tse di Kwa Tlase

Kgotsa “wa Ka Kwa ga Euferatese.”
Kgotsa “dikota tseno.”
Seara., “leitlho la Modimo wa bone le ne le le mo.”
Kgotsa “kwa kgaolong e e nang le taolo.”
Kgotsa “dikota tseno.”
Gongwe ke Serubabele mo go Esr 2:2; 3:8.