Zanafilla 38:1-30
38 Juda, pasi u nda nga vëllezërit, e ngriti tendën pranë një burri, një adulamiti,+ emri i të cilit ishte Hirah.
2 Atje, Juda pa vajzën e një kananiti,+ emri i të cilit ishte Shua. Kështu, ai e mori për grua dhe pati marrëdhënie me të.
3 Ajo mbeti shtatzënë, dhe lindi një djalë, të cilit ai ia vuri emrin Eri.+
4 Ajo mbeti përsëri shtatzënë, dhe lindi një djalë, të cilit ia vuri emrin Onan.
5 Lindi edhe një djalë tjetër, dhe atij ia vuri emrin Shelah. Juda ndodhej në Akzib, kur ajo lindi Shelahun.+
6 Juda mori një grua për Erin, të parëlindurin e tij, dhe emri i saj ishte Tamara.+
7 Por Eri, i parëlinduri i Judës, ishte i keq në sytë e Jehovait,+ prandaj Jehovai e bëri të vdiste.+
8 Kështu, Juda i tha Onanit: «Martohu me gruan e tët vëllai, ki marrëdhënie me të dhe bëj detyrën që i takon kunatit, që t’i lësh pasardhës vëllait tënd.»+
9 Por Onani e dinte se ata nuk do të ishin pasardhësit e tij,+ prandaj, kur kryente marrëdhënie me gruan e të vëllait, ai e derdhte farën përtokë, që të mos i linte pasardhës të vëllait.+
10 Por kjo ishte e keqe në sytë e Jehovait,+ prandaj ai e bëri edhe atë të vdiste.+
11 Kështu, Juda i tha Tamarës, së resë: «Shko në shtëpinë e atit tënd, dhe rri atje si vejushë derisa të rritet Shelahu, im bir.»+ Sepse thoshte me vete: «Edhe ai mund të vdesë si vëllezërit e tij.»+ Prandaj Tamara shkoi dhe banoi në shtëpinë e të atit.+
12 Kaloi shumë kohë dhe bija e Shuait, gruaja e Judës,+ vdiq. Pasi mbajti periudhën e zisë,+ Juda, bashkë me shokun e tij Hirahun, adulamitin,+ u ngjit në Timnah+ te qethësit e dhenve të tij.
13 Atëherë i thanë Tamarës: «Ja, vjehrri yt po ngjitet në Timnah për të qethur dhentë.»+
14 Prandaj, ajo hoqi rrobat e vejërisë, u mbulua me një shall, vuri një vello dhe u ul në hyrje të Enaimit, që ndodhet përgjatë rrugës për në Timnah. Sepse e kishte parë që Shelahu ishte rritur dhe ajo ende nuk ishte bërë gruaja e tij.+
15 Kur e pa, Juda e mori për një prostitutë,+ sepse ajo kishte mbuluar fytyrën.+
16 Kështu, ai u kthye tek ajo dhe i tha: «Lërmë të kem marrëdhënie me ty, të lutem.»+ Sepse nuk e dinte që ishte e reja e tij.+ Por ajo e pyeti: «Ç’do të më japësh, që të kesh marrëdhënie me mua?»+
17 Ai i tha: «Do të të dërgoj një kec nga kopeja.» Por ajo ia ktheu: «A do të më lësh një peng derisa ta dërgosh?»+
18 Ai vazhdoi: «Çfarë pengu të lë?» Ajo i tha: «Unazën tënde me vulë,+ kordonin tënd dhe shkopin që ke në dorë.» Atëherë ai ia dha, pati marrëdhënie me të, dhe ajo mbeti shtatzënë.
19 Pas kësaj, ajo u ngrit dhe shkoi, hoqi shallin dhe u vesh me rrobat e vejërisë.+
20 Juda e dërgoi kecin me anë të shokut të tij adulamit,+ që të merrte pengun nga duart e asaj gruaje, por ai s’e gjeti.
21 Ai nisi të pyeste njerëzit e vendit të saj: «Ku është ajo prostituta e tempullit në Enaim, përgjatë rrugës?» Por ata i thoshin: «Në këtë vend s’ka pasur kurrë ndonjë prostitutë tempulli.»+
22 Së fundi, ai u kthye te Juda dhe i tha: «S’e gjeta dot, por veç kësaj, njerëzit e vendit thoshin: ‘Në këtë vend s’ka pasur kurrë ndonjë prostitutë tempulli.’»
23 Atëherë, Juda tha: «Le t’i mbajë, që të mos na përçmojnë.+ Sidoqoftë, unë e dërgova kecin, por ti nuk e gjete.»
24 Gati tre muaj më vonë, i thanë Judës: «Tamara, nusja jote, është bërë prostitutë,+ dhe prandaj ka mbetur shtatzënë.»+ Atëherë Juda tha: «Nxirreni jashtë, vriteni dhe pastaj digjeni.»+
25 Kur po e nxirrnin jashtë, ajo i dërgoi fjalë vjehrrit të saj: «Kam mbetur shtatzënë me burrin që i takojnë këto gjëra.»+ Pastaj shtoi: «Shihi me kujdes,+ të lutem, se të kujt janë unaza me vulë, kordoni dhe shkopi.»+
26 Atëherë Juda i pa me kujdes dhe tha:+ «Ajo është më e drejtë se unë,+ sepse nuk ia dhashë për grua birit tim, Shelahut.»+ Pas kësaj, ai nuk pati më marrëdhënie me të.+
27 Kur i erdhi koha për të lindur, ajo kishte në bark binjakë.
28 Kur po lindte, njëri shtriu dorën dhe menjëherë mamia e mori dhe i lidhi rreth dorës një fill të kuq të ndezur, duke thënë: «Ky doli i pari.»
29 Sapo ky e tërhoqi dorën, ja, doli vëllai i tij, prandaj ajo tha me zë të lartë: «Pse e çave kështu barkun e nënës sate?!» Prandaj, ia vunë emrin Perez.*+
30 Pastaj doli vëllai i tij që kishte fillin e kuq të ndezur në dorë, dhe atij ia vunë emrin Zerah.+
Shënimet
^ Që do të thotë «çarje; shqyerje; e çarë».
