1. ¿Ima llakiykunapitaj hermanosninchej rikukushanku?

MUNDONTINMANTA hermanosninchejqa imaymana llakiykunasniyoj kanku. Congregacionninchejpipis chayta rikunchej. Wakin hermanosninchejqa, sinchʼi onqosqas kashanku. Wakintaj familiankumanta pillapis wañupusqanrayku, may phutisqas kashanku. Wakin hermanostaj, ujnin familiarninku chayri sumaj amigonku Jehová Diosta wasanchasqanrayku, llakisqas kashanku. Wakin hermanostajrí terremotos, sinchʼi paras chayri waj imas kasqanrayku sufrishanku. Tukuy chay hermanosqa sonqochanata necesitanku. Qhepan parrafospi, imaynatachus paykunata yanaparinata qhawarisun.

2. ¿Imaraykutaj Pablo wakin kutis sonqochanata necesitarqa?

² Apóstol Pabloqa imaymana llakiykunapi rikukorqa, ashkha kutispitaj wañuy patapi rikhurerqa (2 Cor. 11:23-28). Chantapis payqa ‘aychanpi khishkayoj jina’ karqa. Chaytaj ichapis uj onqoy karqa (2 Cor. 12:7). Mana chayllachu, Pablotaqa Demas sutiyoj compañeron sonqonta nanacherqa. Chay compañeronqa, “mundoj imasninta munakusqanrayku” payta saqerparerqa (2 Tim. 4:10). Apóstol Pabloqa Diospa atiyninwan ajllasqa karqa, mana manchachikoj cristianotaj karqa. Payqa wajkunata yanaparejpuni. Jinapis wakin kutisqa, paypis sonqochanata necesitarqa (Rom. 9:1, 2).

3. ¿Imaynatá Jehová Dios Pablota sonqocharqa, yanaparqataj?

³ Jehová Diosqa apóstol Pablota sonqocharqa, yanaparqataj. ¿Imaynatá chayta ruwarqa? Atiyninwan payta kallpacharqa (2 Cor. 4:7; Fili. 4:13). Chantapis hermanosnejta sonqochallarqataj. Chayrayku Pabloqa, paywan khuska llankʼaj hermanos ‘mayta sonqochasqankuta’ nerqa (Col. 4:11). Paykunamanta wakenqa, Aristarco, Tíquico, Marcos ima karqanku. Paykunaqa Pablota kallpacharqanku, aguantananpajtaj yanaparqanku. Qhepan parrafospi yachakusun, imaraykuchus paykuna sumaj  sonqochajkuna kasqankuta. Yachakullasuntaj imaynatachus noqanchejpis, paykuna jina wajkunata sonqochanata, kallpachanatataj.

4. ¿Imasta ruwaspataj Aristarco Pabloj sumaj amigon kasqanta rikucherqa?

⁴ Aristarcoqa Macedoniapi kaj Tesalónica llajtamanta cristiano karqa. Payqa Pabloj sumaj amigon kasqanta rikucherqa. Bibliaqa Aristarcomanta parlayta qallarin, Pablo Éfeso llajtaman visitaj chayasqanmantapacha. Chaypacha Pabloqa kinsa kaj kutipi misionero jina viajasharqa. Aristarcotaj chay kutipi acompañasharqa. Chay llajtamanta runastaj payta presocharqanku (Hech. 19:29). Jinapis chanta kachariporqanku. Aristarcotaj waj ladoman ripunanmantaqa, Pablowan khuska qhepakorqa. Chaymanta killasninman, Aristarcoqa Pablowan khuska Greciaman rerqa. Chaypitaj Pablotaqa enemigosnin wañuchiyta munarqanku. Chay kutipipis, Aristarcoqa nipuni Pablota saqerparqachu (Hech. 20:2-4). Chantá 58 watapi Pablota Romaman presochasqata apashajtinku, Aristarcoqa paywan khuska rerqa. Chayman rishajtinkutaj barconkoqa yakuman chinkaykorqa, phirikorqataj (Hech. 27:1, 2, 41). Romaman chayasqankutawan, Aristarcoqa Pablowan khuskasina uj tiempota carcelpi karqa (Col. 4:10). Pabloqa Aristarco mana saqerparisqanrayku, maytachá sonqochakorqa, kallpachakorqataj.

5. Proverbios 17:17 nisqanman jina, ¿imatataj ruwasunman sumaj amigos kanapaj?

⁵ Noqanchejpis hermanosninchejpaj, Aristarco jina sumaj amigos kasunman. Chaypajtaj mana tukuy ima allin kajtillanchu paykunawan khuska kananchej tiyan, manaqa llakiykuna kajtinpis (Proverbios 17:17 leey). Hermanosninchejpa llakiyninku pasajtinñapis, ichá paykunaqa sonqochanata necesitallanqankupuni. Hermananchej Franciscamanta * parlarina. Paypa tatanqa cáncer onqoywan wañuporqa, kinsa killanmantaj mamanpis chayllawantaj wañuporqa. Pay nin: “Llakiyninchejqa mana chay ratochu chinkapun. Tatasniy unayña  wañupojtinkupis, llakikullanipuni. Chayrayku mayta agradecekuni sumaj amigosniy yanapawasqankumanta”, nispa.

6. Mana saqerparikoj amigos, ¿imastataj ruwanku?

⁶ Mana saqerparikoj amigosqa, yanapanawanchejpaj tiemponkuta, kallpankuta ima churanku. Hermanonchej Pedromanta, señoranmantawan parlarina. Doctorqa hermanonchejta nisqa uj sinchʼi onqoyniyoj kasqanta, chaytaj wañuchinanta. Señoran nin: “Congregacionniykumanta uj qhariwarmi doctorman pusawarqayku. Chaypitaj qosay ima onqoyniyojchus kasqanta yacharqayku. Chay qhariwarmeqa, niwarqayku mana saqerparinawaykuta, aguantanaykupajpis yanapanawaykuta”, nispa. Ajina sumaj amigosqa, llakiypi kashajtinchej mayta yanapawanchej, kallpachawanchejtaj.

7, 8. Colosenses 4:7-9 nisqanman jina, ¿imaynatá Tíquico atienekunapaj jina kasqanta rikucherqa?

⁷ Tiquicoqa Asia provinciamanta cristiano karqa. Payqa Pabloj sumaj amigon karqa (Hech. 20:4). Kay 55 wata qayllata, Pabloqa Judeapi kaj hermanosta yanapanankupaj qolqeta tantacherqa. Chaypajtaj ichapis Tiquicowan yanapachikorqa (2 Cor. 8:18-20). Chantá Romapi ñaupaj kutipi presochasqa kashajtin, congregacionesman imatapis willachinanpaj Tiquicota kachaj. Tiquicotaj Pabloj apachisqan cartasta, willaykunata ima, Asiapi kaj congregacionesta kallpachananpaj aparqa (Col. 4:7-9).

⁸ Tiquicoqa Pabloj sumaj amigollanpuni karqa, atienekunapaj jinataj karqa (Tito 3:12). Chay tiempopeqa, mana tukuy cristianoschu Tíquico jina karqanku. Pabloqa 65 wata chaynejta iskay kaj kutipi presochasqa karqa. Chay kutipitaj qhelqarqa, Asia provinciamanta wakin cristianos paymanta karunchakusqankuta. Ichapis chay cristianosqa, qhatiykachajkunata manchachikusqankurayku Pablomanta karunchakorqanku (2 Tim. 1:15). Tiquicotajrí Pablollawanpuni karqa. Chayrayku Pabloqa waj llankʼaytawan payman qorqa (2 Tim. 4:12). Pabloqa chay jina sumaj amigoyoj kasqanmanta, maytachá kusikorqa.

9. ¿Imaynatá Tíquico jina kasunman?

⁹ Noqanchejpis Tíquico jina atienekunapaj  jina kasunman. Hermanosninchej yanapata necesitajtinku, mana “yanapasqayki” ninallachu, manaqa yanaparinapuni (Mat. 5:37; Luc. 16:10). Paykunaqa yanapananchejta yachaspa, sonqochasqas kanqanku. Uj hermana nin: “Amigosninchej yanaparinawanchejtapuni yachanchej chayqa, niña anchata llakikunchejchu”, nispa.

10. Proverbios 18:24 nisqanman jina, ¿piwan parlarispataj llakiypi tarikojkuna sonqochakunku?

¹⁰ Llakiypi tarikojkunaqa, atienekunku chay amigonkuman llakiyninkuta willarikuspa sonqochakuyta yachanku (Proverbios 18:24 leey). Bijay sutiyoj hermanoqa, kuraj wawan congregacionmanta qharqochikusqanrayku llakisqa kasharqa. Pay nin: “Imaynachus kashasqayta pillamanpis willarikuyta munarqani”, nispa. Hermano Carlosqa pantasqanrayku congregacionpi ruwanasninta qhechuchikorqa. Pay nin: “Llakiyniymanta pillawanpis parlariyta munarqani. Jinapis qhawaranawankuta manchachikorqani”, nispa. Carlosqa ancianosman llakiyninta willarerqa, ancianostaj mayta yanaparerqanku. Chantapis Carlosqa yacharqa, willarikusqanta ancianos ni piman cuentanankuta. Chaytaj payta sonqocharqa.

11. Atienekunapaj jina amigo kanapaj, ¿imatá ruwananchej tiyan?

¹¹ Atienekunapaj jina amigo kanapajqa, pacienciayoj kananchej tiyan. Hermananchej Zulemataqa qosan saqerparerqa. Payqa llakiyninta sumaj amigosninman willakuspa sonqochakorqa. Pay nin: “Amigosneyqa pacienciawan uyariwarqanku, llakiyniymanta kutin kutita parlajtiypis”, nispa. Pillapis llakiyninta willariwajtinchej, sumajta uyarina. Ajinamanta sumaj amigos kasqanchejta rikuchisun.

12. ¿Pitaj Marcos karqa, chanta imaynatá wajkunata yanaparqa?

¹² Marcosqa Jerusalenmanta uj cristiano karqa. Paypa primon Bernabeqa may rejsisqa misionero karqa (Col. 4:10). Marcospa familianqa qhapaj familiasina karqa. Jinapis Marcosqa mana kapuynintachu ñaupajman churarqa. Payqa manchay kʼuchi karqa, wajkunata yanaparispataj kusikorqa. Marcosqa ashkha kutispi apóstol Pablota, apóstol Pedrotawan Diospaj ruwanasninkuta juntʼanankupaj yanaparqa. Ichapis Marcosqa paykunapaj mikhunata rantiporqa, alojamientosta maskʼaporqa chayri waj imasta ruwaporqa (Hech. 13:2-5; 1 Ped. 5:13). Pabloqa Marcosmanta nerqa: ‘Payqa Diospa Gobiernonpaj ujnin llankʼaj masiy, maytataj yanapawan’, nispa (Col. 4:10, 11).

13. Kay 2 Timoteo 4:11 nisqanman jina, ¿imatataj Pablo Marcosmanta nerqa?

¹³ Marcosqa Pabloj sumaj amigonman tukorqa. Kay 65 wata qayllata Pabloqa watejmanta Romapi preso kasharqa, chaymantataj niña kacharerqankuchu. Chaypachataj Timoteoman iskay kaj cartanta qhelqarqa. Chay cartanpitaj Timoteoman nerqa: ‘Romaman jamuy, Marcostawan pusamuy’, nispa (2 Tim. 4:11). Pabloqa Marcos aswan ñaupajpi payta yanapasqanta mana qonqakorqachu. Chayrayku Marcosta wajyacherqa yanapachikunanpaj. Marcosqa Pablota kapuyninwan yanaparerqa. Ichapis yanaparqa mikhunata chayri qhelqananpaj imastachus necesitasqanta qospa. Apóstol Pablotaqa sonqochasqanku, kallpachasqanku ima, maytachá yanaparqa wañuchinanku qayllata.

14, 15. ¿Imaynatá Mateo 7:12 wajkunata yanaparinapaj yanapawanchej?

¹⁴ (Mateo 7:12 leey). Sinchʼi llakiypi kashaspaqa, wajkunaj yanapayninkuta mayta agradecekunchej. Ryan sutiyoj hermanonchejpa tatanqa uj accidentepi wañuporqa. Pay nin: “Llakisqa kashaspaqa, mana imatapis ruwayta atillanchejchu. Ajinapi kashajtinchej  wajkuna yanapariwasqanchejqa, mayta sonqochawanchej”, nispa.

¹⁵ Hermanosninchej imatachus necesitasqankuta reparaspaqa, imaynatachus paykunata yanaparinata yachasunman. Hermanonchej Pedromanta, señoranmantawan watejmanta parlarina. Paykunataqa uj hermana doctorman sapa kuti rinankupaj yanaparerqa. Paykunaqa mana autota apayta aterqankuñachu. Chayrayku hermanaqa, chay qhariwarmita doctorman pusanankupaj uj programata ruwarqa. Chaypajtaj congregacionmanta wakin hermanoswan parlarerqa. Chay hermanaj ruwasqan, ¿chay qhariwarmita yanaparqachu? Hermano Pedroj señoran nin: “Ajinata yanapariwasqaykoqa, llasa qʼepimanta jina samarichiwarqayku”, nispa. Wajkunata imallapipis yanaparispaqa, paykunata mayta sonqochasunman.

16. ¿Imatataj Marcosmanta yachakusunman?

¹⁶ Jesuspa yachachisqan Marcosqa, ashkha ruwanasniyoj karqa. Payqa Jehová Diosmanta sumaj llankʼaykunata japʼerqa. Chaykunamanta ujtaj, Marcos librota qhelqay karqa. Mana tiempoyoj kaspapis, Marcosqa Pablota sonqochananpaj tiempochakorqa. Pablotaj Marcospa yanapayninta mana manchachikuspa mañakoj. Hermananchej Angelaqa, awelitanta wañuchisqankumanta may llakisqa kasharqa. Chay kutispi hermanos sonqochasqankumanta mayta agradecekun. Pay nin: “Amigosninchej tukuy sonqo yanapariyta munawajtinchejqa, paykunawan parlariyta mana manchachikunchejchu. Paykunaqa yanapariytapuni munawanchej”, nispa. Waj hermanos, ¿ajinallatatajchu noqanchejmanta ninkuman?

17. ¿Imaynatá 2 Corintios 1:3, 4 wajkunata sonqochanapaj yanapawanchej?

¹⁷ Congregacionpeqa pikunachus sonqochanata necesitasqankuta sutʼita reparayta atisunman. Imatachus wajkuna sonqochanawanchejpaj niwarqanchej, chayllatataj hermanosninchejman nisunman. Hermananchej Ninoscamanta parlarina. Paypa awelitanqa wañuporqa. Pay nin: “Jehová Diospa makinpi churakojtinchejqa, payqa noqanchejnejta  wajkunata sonqochanqa”, nispa (2 Corintios 1:3, 4 leey). Hermananchej Franciscamanta parlarerqanchejña. Paytaj nin: “2 Corintios 1:4 nisqanqa cheqapuni. Imaynatachus wajkuna sonqochawarqanchej, ajinallatataj noqanchejpis wajkunata sonqochasunman”, nispa.

18. 1) ¿Imajtintaj wajkunata sonqochariyta manchachikusunman? 2) ¿Imaynatataj wajkunata sonqochasunman?

¹⁸ Wajkunata sonqochariyta manchachikuspapis, paykunata sonqocharinapaj kallpachakusunman. Ichapis mana yachanchejchu, llakiypi kajkunaman imatachus niyta chayri imaynatachus paykunata yanapayta. Pablo sutiyoj ancianomanta parlarina. Tatan wañupojtin, hermanosqa payta sonqocharinankupaj mayta kallpachakorqanku. Chaymanta yuyarikuspa pay nin: “Hermanosqa mana qayllaykamuwayta atillarqankuchu. Mana yacharqankuchu ima nispachus sonqochanawankuta. Jinapis mayta agradecekuni sonqocharinawankupaj, yanaparinawankupaj ima kallpachakusqankumanta”, nispa. Hermanonchej Tomasqa terremoto kasqanrayku, may llakiypi rikukorqa. Chaymanta yuyarikuspa nin: “Terremoto pasayta ashkha hermanos mensajesta apachimuwarqanku. Imastachus qhelqamuwasqankuta mana yuyarikunichu. Jinapis yuyarikuni chay días noqamanta mayta llakikusqankuta”, nispa. Hermanosninchejmanta llakikuspaqa, paykunata mayta sonqochasunman.

19. ¿Imaraykutaj hermanosninchejta sonqochananchej tiyan?

¹⁹ Kay sajra mundoj tukukuynin astawan qayllamusqanman jina, kay mundoqa astawan sajrayanqa, kausaypis aswan llakiy kanqa (2 Tim. 3:13). Chantapis juchasapas kasqanchejrayku pantallasunpuni, chayraykutaj sonqochanata necesitallasunpuni. Apóstol Pablotaqa hermanospa sonqochasqanku mayta yanaparqa, wañupunankama sinchʼita sayananpaj. Chayrayku Aristarco jina hermanosninchejwan khuska llakiypi kana. Tíquico jina wajkuna noqanchejpi atienekunankupaj jina kana. Marcos jinataj wajkunata tukuy sonqo yanaparina. Chayta ruwaspaqa, hermanosninchejta Jehová Diosta sirvinallankupajpuni yanapasun (1 Tes. 3:2, 3).