Bai na kontenido

Bai na kontenido

 KAPÍTULO 10

Hesus Tin Mas Poder ku Demoño

Hesus Tin Mas Poder ku Demoño

BO TA kòrda dikon un di Dios su angelnan a bira Satanas e Diabel?— Ta su deseo egoista pa hende ador’é a pon’é bai kontra Dios. Tin mas angel ku a bira siguidó di Satanas?— Sí, tin mas. Beibel ta yama nan ‘angel di Satanas,’ òf demoño.—Revelashon 12:9.

E demoñonan òf angelnan malu aki ta kere den Dios?— Beibel ta bisa: ‘E demoñonan ta kere ku Dios ta eksistí.’ (Santiago 2:19) Pero aworakí nan tin miedu, pasobra nan sa ku Dios ta bai kastigá nan pa e kosnan malu ku nan a hasi. Kiko ta e kosnan malu ku nan a hasi?—

Beibel ta bisa ku e angelnan ei a bai for di shelu, e lugá kaminda nan mester biba, i a bini na tera pa biba manera hende. Nan a bini pasobra nan kier a tene relashon seksual ku e hende muhénan bunita riba tera. (Génesis 6:1, 2; Hudas 6) Kiko abo sa tokante relashon seksual?—

 Relashon seksual ta ora un hende hòmber i un hende muhé bini serka otro na un manera hopi spesial. Despues di esei un beibi por kuminsá krese den barika di e mama. Pero ta malu pa angel tene relashon seksual. Dios ke pa hòmber ku muhé ku ta kasá so tene relashon seksual ku otro. E ora ei, si un beibi nase, e hòmber i su kasá por kri’é.

Ki kos malu e angelnan aki a hasi?

Despues ku e angelnan a traha kurpa di hende pa nan mes i a tene relashon seksual ku hende muhé riba tera, nan beibinan ku a nase a krese bira gigante, sí, ‘reus.’ Nan tabata abusador, i nan tabata hasi hende daño. P’esei Dios a manda un diluvio grandi pa kaba ku e gigantenan i tur e mal hendenan. Pero el a laga Noe traha un arka, un kos manera un barku grandi, pa skapa e poko hendenan ku sí tabata hasi bon. E Gran Maestro a bisa ku ta importante pa nos keda kòrda loke a pasa tempu di e Diluvio.—Génesis 6:3, 4, 13, 14; Lukas 17:26, 27.

Bo sa kiko a pasa ku e mal angelnan ora e Diluvio a bini?— Nan a stòp di usa e kurpanan di hende ku nan a traha, anto nan a bai shelu bèk. Pero ya nan no por tabata angel di Dios  mas. P’esei nan a bira demoño, angel di Satanas. Anto kiko a pasa ku nan yunan, e gigantenan?— Nan a muri den e Diluvio. I tur e otro hendenan ku no a hasi loke Dios a bisa tambe a muri.

Dikon awendia tin mas tantu problema ku nunka na mundu?

For di tempu dje Diluvio, Dios no a laga demoño bira manera hende mas. Pero maske nos no por mira demoño, ainda nan ta purba pone hende hasi kos hopi malu. Awor nan ta kousa mas tantu problema ku nunka, pasobra nan a ser saká for di shelu, i tirá riba tera.

Bo sa dikon nos no por mira demoño?— Dor ku nan ta invisibel. Pero nos por tin sigur ku nan ta eksistí. Beibel ta bisa ku Satanas ta ‘gaña hende rònt mundu,’ i su demoñonan ta yud’é.—Revelashon 12:9, 12.

Bo ta kere ku Diabel i su demoñonan por gaña nos tambe?— Sí, nan por hasié si nos no tene kuidou. Pero nos no mester tin miedu. E Gran Maestro a bisa: ‘Diabel no tin poder riba mi.’ Si nos keda serka di Dios, e ta protehá nos kontra Diabel i su demoñonan.—Juan 14:30, BPK.

Ta importante pa nos sa ta kiko ta e kosnan malu ku e demoñonan ta purba pone nos hasi. P’esei, pensa un ratu. Kua ta e kosnan malu ku e demoñonan a hasi ora nan a bini na tera?— Promé ku e Diluvio, nan tabata tene relashon seksual ku hende muhé, maske angel no tin mag di hasi e kos ei. Awendia, demoño gusta pa hende keda sin obedesé e lei di Dios tokante relashon seksual. Laga mi puntra bo: Ken so tin mag di tene relashon seksual ku otro?— Korekto, hende kasá so.

Awendia tin mucha yòn ku ta tene relashon seksual. Pero e kos ei ta malu, pasobra nan no tin mag di hasié. Beibel ta papia tokante e parti privá di kurpa di hende hòmber, ku yama pénis.  (Deuterononmio 23:1) I hende ta yama e parti privá di kurpa di hende muhé vagina. Yehova a traha e partinan di kurpa aki pa un motibu spesial ku ta pa hende kasá so. E demoñonan ta bira kontentu ora hende hasi kos ku Yehova a bisa ku no tin mag. Por ehèmpel, demoñonan gusta ora mucha hòmber i mucha muhé hunga ku pénis òf vagina di otro mucha. Nos no ke hasi e demoñonan kontentu, tòg?—

Tin un otro kos mas ku demoño ta gusta, pero ku Yehova tin rabia riba dje. Bo sa kiko e ta?— Violensia. (Salmo 11:5) Violensia ta ora hende ta abusá di otro hende i hasi nan daño. Kòrda ku ta esei ta loke e yunan gigante dje demoñonan tabata hasi.

Demoño gusta spanta hende tambe. Tin biaha nan ta hasi manera kos ku nan ta hende ku a muri. Nan sa asta imitá stèm di hende ku a muri. Asina e demoñonan ta pone hopi hende kere ku hende morto ta  na bida, i ku hende morto por papia ku hende bibu. Sí, demoño ta pone hopi hende kere den spiritu di hende morto.

P’esei nos tin ku paga tinu pa Satanas ku su demoñonan no gaña nos. Beibel ta spièrta nos ku ‘Satanas ta purba parse manera un bon angel, i su sirbidónan ta hasi meskos.’ (2 Korintionan 11:14, 15) Pero bèrdat ta ku demoño ta malbado. Laga nos wak kon nan ta purba pone nos bira meskos ku nan.

Unda hende ta siña yen di kos di violensia, di relashon seksual ku no tin mag, i di spiritu?— No ta den algun programa na televishon, pelíkula, wega di kòmpiuter i di vidio, Internet i dor di lesa comics? E kosnan aki ta hala nos mas serka di Dios, òf mas serka di Diabel ku su demoñonan? Kiko abo ta kere?—

Kiko por pasa si nos wak violensia?

Segun bo, ta ken ke pa nos mira i skucha kos malu?— Sí, Satanas ku su demoñonan. P’esei, kiko nos mester hasi?— Nos mester lesa, skucha i mira kos ku ta bon pa nos; kos ku ta yuda nos sirbi Yehova. Kiko ta algun kos ku ta bon ku nos por hasi?—

Kiko ta kosnan bon pa nos hasi?

Si nos hasi bon, nos no tin nodi sinti miedu di demoño. Hesus tin mas poder ku nan, i nan tin miedu di dje. Un dia e demoñonan a grita Hesus: “Bo a bin pa destruí nos?” (Marko 1:24) Bo no ta kere ku nos lo ta kontentu ora e dia yega pa Hesus destruí Satanas ku su demoñonan?— Tanten, nos por tin sigur ku Hesus lo protehá nos kontra demoño si nos keda serka di dje i su Tata den shelu.

Laga nos lesa ta kiko nos tin ku hasi, na 1 Pedro 5:8, 9 i Santiago 4:7, 8.