Bai na kontenido

Bai na kontenido

 KAPÍTULO 34

Kiko Ta Pasa si Nos Muri?

Kiko Ta Pasa si Nos Muri?

MANERA kasi sigur bo sa kaba, hende ta bira bieu, bira malu i muri. Tin biaha asta mucha ta muri. Bo mester tin miedu di muri, òf di hende morto?— Bo sa kiko ta pasa ku nos si nos muri?—

Wèl, niun hende ku ta na bida awe no a yega di muri anto biba bèk pa e por bisa nos kon morto ta. Pero ora Hesus e Gran Maestro tabata na tera sí tabatin un hòmber ku a yega di ta morto. Si nos lesa tokante dje nos por haña sa kiko ta pasa ku hende ora nan muri. E hòmber ei tabata un amigu di Hesus. E tabata biba na Betania, un pueblo chikitu, no muchu leu for di Yerusalèm. E tabata yama Lázaro, i e tabatin dos ruman muhé ku yama Marta i Maria. Laga nos wak den Beibel ta kiko a pasa.

Un dia Lázaro a bira hopi malu. Dor ku Hesus tabata hopi leu, Marta ku Maria a manda un mensahero bai bisa Hesus ku nan ruman hòmber Lázaro ta malu. Nan a manda bis’é esei dor ku nan tabata sa ku Hesus por a bini i pone nan ruman hòmber bira bon. Hesus no ta dòkter, pero e tin poder di Dios pa por kura tur sorto di malesa.—Mateo 15:30, 31.

Ma promé ku Hesus a bai serka Lázaro, Lázaro a bira asina malu ku el a muri. Pero Hesus a bisa su disipelnan ku ta drumí Lázaro ta, i ku e lo bai serka Lázaro pa lant’é. E disipelnan no a komprondé kiko Hesus tabata kier men. P’esei, Hesus a bisa nan frankamente: “Lázaro a muri.” Kiko esei ta laga nos komprondé tokante morto?— Sí, ku morto ta manera un soño profundo. E ta un soño asina profundo ku e hende no ta ni soña.

 Ora Hesus a yega serka Marta ku Maria, hopi amigu di nan famia a yega kaba. Nan a bini pa konsolá e ruman muhénan p’e morto di nan ruman. Ora Marta a tende ku Hesus ta bini, el a bai top’é. Djis un ratu despues, Maria tambe a bai serka Hesus. Maria tabata hopi tristu. E tabata yora, i el a kai na rudia dilanti Hesus. Algun amigu ku a bini huntu ku Maria tambe tabata yora.

E Gran Maestro a puntra nan na unda nan a pone Lázaro, anto e hendenan a hib’é n’e kueba kaminda nan a dera Lázaro. Ora Hesus a mira tur e hendenan ta yora, e tambe a kuminsá yora. E sa kon duru ta ora un hende ku bo ta stima ta muri i bo no tin e mas.

Dor ku tabatin un piedra na entrada di e kueba, Hesus a bisa nan: “Kita e piedra.” Bo ta kere ku nan mester a kit’é?— Marta no a haña ku e kos ei ta un bon idea. El a bisa Hesus: “Señor, ya e mester ta hole malu kaba, pasobra e tin kuater dia morto.”

Pero Hesus a bis’é: ‘Mi no a bisa bo ku si bo kere lo bo mira e gloria di Dios?’ Loke Hesus tabata kier men ta ku Marta tabata bai mira un kos ku lo trese onor pa Dios. Kiko Hesus tabata bai hasi? Despues ku nan a kita e piedra, Hesus a resa na Yehova pa tur hende tende. E ora ei Hesus a bisa ku un stèm duru: “Lázaro, bin pafó!” Lázaro a sali? E por a sali antó?—

Pensa un ratu. Abo por lanta un hende ku ta na soño?— Sí. Si bo yam’é ku un stèm duru, e ta lanta. Pero bo por lanta un hende ku ta drumí morto?— Nò. Ni maske kon duru bo grita, e hende morto no ta tende. No tin nada ku ni abo ni ami ni niun otro hende na tera awe por hasi pa lanta un hende morto.

Kiko Hesus a hasi pa Lázaro?

Pero ku Hesus sí no ta asina. Dios a dun’é poder spesial. P’esei, ora Hesus a yama Lázaro, un kos asombroso a sosodé. E hòmber  ku tabatin kuater dia morto a sali for di e kueba! El a bolbe biba! E por a hala rosea, kana i papia atrobe! Sí, Hesus a lanta Lázaro for di morto.—Juan 11:1-44.

Awor, pensa un ratu: Kiko a pasa ku Lázaro ora el a muri? Tabatin un parti di dje, un alma òf un spiritu, ku a sali for di su kurpa i bai biba otro kaminda? Lázaro su alma a bai shelu? El a biba e kuater dianan ayá serka Dios ku e angelnan santu?—

Nò, no ta esei a pasa. Kòrda ku Hesus a bisa ku Lázaro tabata na soño. Kon abo ta ora bo ta na soño? Ora bo ta den un soño hopi profundo bo no sa mes kiko ta pasa rònt di bo, no?— I ora bo lanta bo no sa ta kuantu tempu bo a drumi, te ora bo wak oloshi.

Asina ta tambe ku hende ora nan ta morto. Nan no sa nada. Nan no ta sinti nada. I nan no por hasi nada. Ora Lázaro tabata  morto, ta asina e tambe tabata. Ora un hende ta morto e ta manera den un soño profundo, i e no ta kòrda nada. Beibel ta bisa ku “e mortonan no sa nada.”—Eklesiastés 9:5, 10.

Den ki estado Lázaro tabata ora e tabata morto?

Pensa esaki tambe: Si Lázaro a pasa kuater dia den shelu, bo no ta kere ku e lo a konta hende kon shelu ta?— I si ta den shelu e tabata, bo ta kere ku Hesus lo a pon’é bini tera bèk for di un lugá asina bon?— Klaru ku nò!

Tòg tin hopi hende ta bisa ku nos alma ta un parti di nos, un kos ku nos tin, i ku ora nos kurpa muri, e alma ei ta sigui biba. Nan ta bisa ku Lázaro su alma tabata bibu un kaminda. Pero Beibel no ta bisa asina. E ta bisa ku Dios a hasi Adam, e promé hòmber bira “un alma bibu.” Adam tabata un alma. Beibel ta mustra tambe ku ora Adam a peka, el a muri. El a bira un alma morto, i el a bai bèk na e stòf ku Dios a trah’é di dje. I Beibel ta bisa ku tur Adam su yunan tambe a haña piká i morto for di Adam.—1 Korintionan 15:45; Salmo 107:9; Romanonan 5:12.

Esei ta mustra bon kla ku nos alma no ta un kos apart for di nos kurpa, òf un ku nos tin. Kada un di nos mes ta un alma. I dor  ku hende a heredá piká for di e promé hòmber Adam, Beibel ta bisa ku “e alma ku peka lo muri.”—Ezekiel 18:4.

Pakiko nos no mester tin miedu di hende morto?

Tin hende ku tin miedu di hende morto. Nan no ke bai banda di santana pasobra segun nan hende morto tin alma ku por sali for di nan kurpa i ku por hasi hende bibu daño. Pero un hende morto por hasi un hende bibu algu?— Nò, e no por.

Tin hende asta ta kere ku hende morto por bini bèk den forma di spiritu pa bishitá hende bibu. P’esei nan ta pone kuminda pa hende morto. Pero si un hende hasi asina, e no por ta kere kompletamente loke Dios ta bisa tokante hende morto. Si nos ta kere loke Dios ta bisa, e ora ei nos no tin miedu di hende morto. I si di bèrdat nos ta gradisidu na Dios pasobra el a duna nos bida, anto nos lo mustra ku nos ta gradisidu dor di hasi kos ku Dios ta keda kontentu kuné.

Pero kisas bo ta puntra bo mes: ‘Dios ta bai pone mucha ku a muri biba bèk? E ke hasié di bèrdat?’ Laga nos papia riba esei den e siguiente kapítulo.

Laga nos wak kiko mas Beibel ta bisa tokante e estado di hende morto, i kiko mas ta mustra ku hende ta alma, na Salmo 115:17; 146:3, 4 i Santiago 5:20.