Bai na kontenido

Bai na kontenido

 KAPÍTULO 9

Nos Tin Ku Resistí Tentashon

Nos Tin Ku Resistí Tentashon

HENDE a yega di pidi bo hasi un kos malu?— Nan a bisa bo ku si bo no hasié bo ta kobarde? Òf nan a bisa bo ku lo bo pasa dushi, i ku no ta nada malu?— Ora hende hasi asina ku nos, nan ta purba tenta nos, esta, hinka nos den tentashon.

Kiko nos mester hasi ora nos sinti tentashon? Nos tin ku dal bai numa i hasi kos malu?— Yehova Dios lo no keda kontentu si nos hasi esei. Pero bo sa ken sí lo keda kontentu?— Sí, Satanas e Diabel.

Satanas ta enemigu di Dios, i Satanas ta nos enemigu tambe. Nos no por mir’é, pasobra e ta un spiritu. Pero e sí por mira nos. Un dia Diabel a papia ku Hesus e Gran Maestro, i a purba tent’é. Laga nos wak kiko Hesus a hasi. E ora ei nos lo sa kiko pa hasi ora nos tambe sinti nos tentá.

Kiko kisas Hesus a kuminsá kòrda ora el a batisá?

Tur ora Hesus kier a hasi loke Dios ke. P’e laga tur hende sa esei, el a batisá den Riu Hordan. I asina ku Hesus a kaba di batisá, Satanas a purba tent’é. Beibel ta bisa ku ‘shelu a habri’ pa Hesus. (Mateo 3:16) Por ta esei kier men ku e ora ei Hesus a kuminsá kòrda tur kos di su bida di promé, esta, ora e tabata den shelu serka Dios.

 Despues di su boutismo Hesus a bai den un desierto pa pensa riba e kosnan ku el a kuminsá kòrda. Kuarenta dia i kuarenta anochi a pasa. Tur e dianan ei Hesus no a kome nada. P’esei, Hesus a haña hopi hamber. I ta nèt e ora ei Satanas a purba hinka Hesus den tentashon.

Kon Diabel a usa piedra pa tenta Hesus?

Diabel a bis’é: ‘Si bo ta e yu di Dios, manda e piedranan aki pa nan bira pan.’ Esta bon un pida pan lo a baha! Pero ta bèrdat ku Hesus por a pone piedra bira pan?— Sí, e por a hasié. Bo sa dikon? Pasobra Hesus ta e Yu di Dios, i e tabatin poder spesial.

Abo lo a hasi un piedra bira pan si Diabel a pidi bo hasié?— Hesus tabatin hamber. Kiko bo ta kere? E no tabatin mag di hasié ni un biaha so?— Hesus tabata sa ku ta malu pa e usa su poder pa un kos asina. Yehova a dun’é poder pa e hala hende serka Dios, no p’e us’é pa su mes.

P’esei, na lugá di hasi loke Satanas a bisa, Hesus a bis’é kiko ta pará skirbí den Beibel: “Hende lo no biba di pan so, ma di tur palabra ku ta sali for di boka di Dios.” Hesus tabata sa ku hasi loke Yehova gusta ta mas importante ku kuminda.

Pero Diabel a bolbe purba. El a hiba Hesus Yerusalèm i a pon’é para riba un  parti dje tèmpel te na haltu. E ora ei Satanas a bisa: ‘Si bo ta yu di Dios, tira bo kurpa abou. Pasobra ta pará skirbí ku Dios su angelnan lo skapa bo pa bo no dal bo kurpa.’

Dikon Satanas a bisa asina?— El a bisa e kos ei pa tenta Hesus p’e hasi un kos di bobo. Pero Hesus a bolbe keda sin skucha Satanas. El a bisa Satanas: “Ta pará skirbí: ‘No pone Señor bo Dios na prueba.’” Hesus tabata sa ku ta malu pa pone Yehova na prueba dor di pone bo bida den peliger.

Pero ainda Satanas no a stòp. Awor el a hiba Hesus riba un seru masha haltu. Anto el a mustr’é tur reino, esta, tur gobièrnu di mundu i nan gloria. E ora ei Satanas a bisa Hesus: “Tur e kosnan aki lo mi duna bo, si bo tira bo kurpa abou i adorá mi.”

Pensa riba loke Satanas a ofresé Hesus. Ta bèrdat ku tur reino, tur gobièrnu di hende, ta di Satanas?— Wèl, kòrda ku Hesus no a nenga ku nan ta di Satanas. I si nan no tabata di Satanas, Hesus lo a bis’é esei. Kier men, ta bèrdat anto ku Satanas ta goberná tur nashon na mundu. Beibel ta asta yam’é “e prens di e mundu aki.”—Juan 12:31.

Dikon Satanas por a ofresé Hesus tur e reinonan aki?

Kiko abo lo hasi si Diabel primintí di duna bo un kos si bo ador’é?— Hesus tabata sa ku ta malu pa adorá Diabel, ni maske kiko Diabel por a dun’é. P’esei Hesus a bisa: ‘Bai djaki, Satanas! Pasobra Beibel ta bisa ku ta Yehova bo Dios bo mester adorá, i ta e so bo mester sirbi.’—Mateo 4:1-10; Lukas 4:1-13.

Kiko abo lo hasi si bo sinti tentashon?

Nos tambe sa haña tentashon. Bo sa kiko asina nan por ta?— Wak un ehèmpel aki. Laga nos bisa ku bo mama a traha un bolo masha dushi mes pa pasaboka, anto el a bisa bo no mishi kuné te ora boso bai kome. Pero awor bo tin hopi hamber, i bo ta sinti tentashon pa kom’é. Lo bo tende di bo mama?— Satanas ke pa bo desobedesé bo mama.

 Kòrda riba Hesus. E tambe tabatin hopi hamber. Pero e tabata sa ku hasi Dios kontentu ta mas importante ku kome. Si bo hasi loke bo mama ta bisa, bo ta mustra ku bo ta manera Hesus.

Otro mucha lo por bisa bo guli un par di píldora. Nan por bisa bo ku e píldoranan ta bai pone bo sinti masha bon mes. Pero e píldoranan ei por ta droga. Nan por hasi bo bira hopi  malu. Nan por mata bo mes. Òf, kisas un hende ta duna bo un sigaria i bisa bo ku si bo no hum’é, bo ta kobarde. Sigaria tambe tin droga aden. Kiko bo ta hasi e ora ei?—

Kòrda riba Hesus. Satanas a purba pone Hesus riska su bida dor di bis’é tira su kurpa abou for di e tèmpel. Pero Hesus a nenga di hasié. Kiko abo lo hasi si un hende bisa bo hasi un kos peligroso, pasobra si bo no hasié bo ta kobarde?— Hesus no a tende di Satanas. I abo tampoko no mester tende di niun hende ku ke pone bo hasi malu.

Dikon ta malu pa usa imágen pa adorá Dios?

Un dia un hende por pidi bo adorá un imágen, kisas komo parti di un seremonia na skol. Pero Beibel ta bisa ku nos no mag hasi e kos ei. (Eksodo 20:4, 5) Nan por asta bisa bo ku si bo nenga di hasié, bo no tin mag di bai skol mes mas. Kiko bo ta hasi e ora ei?—

Ta fásil pa hasi bon ora tur otro hende ta hasi bon. Pero ora otro hende ta purba pone nos hasi malu, por bira hopi duru pa nos hasi bon. E hendenan ei por bisa bo ku e kos ku nan ta hasi no ta dje malu ei. Pero e pregunta importante ta: Kiko Dios ta bisa tokante e kos ei? Ta Dios sa mihó.

P’esei, ni maske kiko hende bisa, nunka nos no mester hasi kos ku Dios a bisa ku ta malu. Asina, semper nos lo hasi Dios felis, i nunka nos lo no hasi Satanas kontentu.

Bo por haña mas informashon tokante kon pa resistí tentashon pa hasi malu na Salmo 1:1, 2; Proverbionan 1:10, 11; Mateo 26:41 i 2 Timoteo 2:22.