Bai na kontenido

Bai na kontenido

 KAPÍTULO 38

Dikon Nos Mester Stima Hesus

Dikon Nos Mester Stima Hesus

IMAGINÁ bo ku bo ta den un boto ku ta senk. Lo bo ke pa un hende skapa bo?— Anto kon lo bo sinti si e hende ei pèrdè asta su bida p’e skapa bo?— Wèl, esei ta loke Hesukristu a hasi. Manera nos a siña na Kapítulo 37, el a duna su bida komo un reskate pa salba nos.

Klaru, no ta hoga nos tabata hoga anto Hesus a bin skapa nos. Bo sa ta di kiko el a skapa nos? Bo ta kòrda?— Di e piká i morto ku nos tur a haña for di Adam. Tin hende ku a hasi kos hopi malu, i tòg Hesus a muri pa nan tambe. Abo lo riska bo bida pa purba skapa un hende asina?—

Beibel ta bisa: “Apénas un hende lo muri pa un hende hustu; ounke ku kisas pa un bon hende un hende por riska muri.” Pero Beibel ta splika ku Hesus ‘a muri pa mal hende.’ Tin di e hendenan ei ku no ta sirbi Dios mes! Beibel ta sigui bisa: “Tempu nos tabata pekadó [hasiendo kos malu] ainda, Kristu a muri pa nos.”—Romanonan 5:6-8.

Bo ta kòrda un apòstel ku a yega di hasi kos hopi malu?— E apòstel ei a skirbi: “Kristu Hesus a bin na mundu pa salba pekadó, entre kendenan ami ta esun di promé.” E apòstel ku a bisa esei ta Pablo. El a bisa ku ‘un tempu e tabata bobo’ i ku el a biba ta hasi malu.—1 Timoteo 1:15; Tito 3:3.

Imaginá bo kuantu amor Dios mester tabatin pa el a manda su Yu bin muri pa hende asina! Dikon bo no ta kohe bo Beibel pa nos ban lesa tokante esei na Juan kapítulo 3, versíkulo 16? Ei e ta bisa: “Dios a stima mundu [esta, hende ku ta biba riba mundu] asina  tantu, ku el a duna su Yu unigénito, pa ken ku kere den dje no bai pèrdí, ma tin bida eterno.”

Ki kosnan Hesus a pasa aden ora el a duna su bida pa nos?

Hesus a mustra ku e tambe ta stima nos meskos ku su Tata ta stima nos. Kisas bo ta kòrda ku na Kapítulo 30 di e buki aki nos a lesa di un par di kos ku Hesus a pasa aden riba e anochi ku nan a koh’é prezu. Nan a hiba Hesus kas di Sumo Saserdote Kaifas i a tene un huisio kontra dje. Nan a trese testigu falsu pa gaña riba dje, anto e hendenan a dal e ku moketa. I ta e ora ei Pedro a nenga ku e konosé Hesus. Awor, laga nos imaginá nos mes ku nos ta ayanan nèt ora e kosnan ei tabata sosodé, anto ku nos ta mira kiko mas a pasa.

Ta bira mainta. Hesus no a drumi henter anochi. Dor ku e huisio ku nan a tene anochi no a bai manera mester ta, e saserdotenan ta manda yama e Sanedrin awor, e korte supremo hudiu, den purá pa nan tene un otro huisio. Den e huisio aki nan ta bolbe akusá Hesus bisando ku el a kometé krímen kontra Dios.

E ora ei e saserdotenan ta laga mara Hesus, anto nan ta hib’é dilanti Pilato, e gobernadó romano. Nan ta bisa Pilato: ‘Hesus ta kontra gobièrnu. Mester mat’é.’ Pero Pilato a komprondé ku ta gaña nan ta gaña. P’esei Pilato ta bisa nan: ‘Mi no ta haña nada malu den e hòmber aki. Mi ta lag’é bai.’ Pero e saserdotenan i e otro hendenan ta grita: ‘Nò! Mat’é!’

Mas despues Pilato ta bolbe purba bisa e hendenan ku e ta laga Hesus liber. Ma e saserdotenan ta pone tur e hendenan grita: ‘Si bo lag’é bai, anto bo tambe ta kontra gobièrnu! Mat’é!’ E multitut ta kuminsá hasi masha hopi bochincha. Bo sa kiko Pilato ta hasi awor?—

E ta hasi loke nan ta pidi numa. Promé e ta laga bati Hesus ku zuip. Despues e ta laga e sòldánan bai kuné pa mat’é. Nan  ta pone un korona di sumpiña riba Hesus su kabes, anto nan ta hasi mofa di dje dor di bùig su dilanti. E ora ei nan ta duna Hesus un staka, esta, un palu grandi p’e karga, anto nan ta hib’é pafó dje stat na un lugá ku yama Lugá di Karpachi. Ora nan yega nan ta klaba Hesus su man i su pia na e staka. E ora ei nan ta lanta e staka, pon’é para, pa Hesus keda kologá na dje. Su kurpa ta basha sanger. E tin hopi, hopi doló.

Hesus no ta muri mesora. E ta keda kologá bibu na e staka. E saserdotenan prinsipal ta hasi mofa di dje. I hende ku ta pasa eibanda ta bisa: ‘Si ta yu di Dios  bo ta, baha for di e staka!’ Pero Hesus sa kiko su Tata a mand’é hasi. E sa ku e tin ku duna su bida perfekto pa nos por haña chèns di biba pa semper. Ta te banda di tres or di mèrdia Hesus ta sklama na su Tata, anto e ta muri.—Mateo 26:36–27:50; Marko 15:1; Lukas 22:39–23:46; Juan 18:1–19:30.

Hesus no tabata niun tiki manera Adam! Adam no a mustra ku e ta stima Dios. El a desobedesé Dios. I Adam no a mustra ku e stima nos tampoko. Ta pasobra el a peka, nos tur a nase ku piká. Pero Hesus sí a mustra ku e ta stima Dios i nos tambe. El a obedesé Dios den tur kos. Anto el a duna su bida pa e por drecha tur e malu ku Adam a hasi nos.

Kiko nos por hasi pa mustra ku nos ta stima Hesus?

Abo ta gradisidu pa e kos grandi ei ku Hesus a hasi pa nos?— Ora bo ta resa na Dios, bo sa bis’é danki ku el a duna nos su Yu?— Apòstel Pablo a sinti hopi apresio pa loke Kristu a hasi p’e. Pablo a skirbi: ‘E Yu di Dios a stima mi, i a entregá su mes pa mi.’ (Galationan 2:20) Hesus a muri pa ami ku bo tambe. El a duna su bida perfekto pa nos por haña bida eterno! Kon nos por keda sin stima Hesus despues di loke el a hasi pa nos?

Apòstel Pablo a skirbi e kristiannan ku tabata biba na e stat Korinto: “E amor di Kristu ta pone nos aktua.” Segun bo, ki tipo di kos e amor di Kristu ta pone nos hasi?— Wak kiko Pablo a kontestá: “Kristu a muri pa tur hende, pa nan biba p’e. Nan no mester  biba pa komplasé nan mes.”—Lèter skùin ta di nos; 2 Korintionan 5:14, 15, New Life Version.

Bo por pensa riba un par di kos ku bo por hasi pa mustra ku bo ta biba pa komplasé Kristu?— Wèl, un kos ku bo por hasi ta konta otro hende loke bo a siña tokante dje. Òf, wak un otro kos: Laga nos bisa ku bo ta bo so un dia; ni bo mama ni bo tata ni niun otro hende no por mira kiko bo ta hasi. Lo bo wak un programa na televishon òf un kos riba Internet, si bo sa ku Hesus lo no keda kontentu kuné?— Kòrda ku Hesus ta bibu awor, i e por mira tur kos ku nos hasi!

Ken por mira tur kos ku nos hasi?

Un otro motibu ku nos tin pa stima Hesus ta ku nos ke imitá Yehova. Hesus a bisa: “E Tata ta stima mi.” Bo sa dikon e ta stima Hesus i dikon nos tambe mester stim’é?— Pasobra Hesus tabata dispuesto di muri pa Dios su boluntat sosodé. (Juan 10:17) P’esei, laga nos hasi manera Beibel ta bisa nos: “Sea imitadónan di Dios, manera yunan stimá, i kana den amor, meskos ku Kristu tambe a stima boso, i a entregá su mes pa nos.”—Efesionan 5:1, 2.

Pa nos apresio pa Hesus i pa loke el a hasi pa nos por bira mas grandi, laga nos lesa Juan 3:35; 15:9, 10 i 1 Juan 5:11, 12.