Bai na kontenido

Bai na kontenido

 KAPÍTULO 40

Kon pa Hasi Dios Kontentu

Kon pa Hasi Dios Kontentu

KON nos por hasi Dios kontentu? Tin algu ku nos por dun’é?— Yehova a bisa: “Tur bestia di mondi ta di mi.” Tambe el a bisa: “E plata ta di mi, i e oro ta di mi.” (Salmo 24:1; 50:10; Hageo 2:8) I tòg tin un kos ku nos por duna Dios. Bo sa ta kiko?—

Yehova ta laga nos mes disidí si nos ke sirbié òf nò. E no ta obligá nos hasi loke e ke. Laga nos wak si nos por haña sa ta dikon Dios a traha nos pa nos mes por disidí si nos ta sirbié òf nò.

Kasi sigur bo sa kiko ta un robòt. Un robòt ta un mashin trahá pa hasi tur loke esun ku a trah’é ke p’e hasi. Un robòt no tin moda di hasi; e tin ku obedesé. Awor, Yehova por a traha nos tur manera robòt. E por a pone ku nos no por hasi nada otro sino loke é ke pa nos hasi. Pero Dios no a traha nos asina. Bo sa dikon?— Wèl, pensa riba un robòt di ko’i hunga. Ora bo primi un kònòpi, e robòt ta hasi presis manera nan a trah’é p’e hasi. Abo a yega di mira un ko’i hunga asina?— Hopi bes, ora un ko’i hunga no por hasi nada otro ku loke nan a trah’é p’e hasi, hende ta fada di hunga kuné. Awèl, Dios no ke pa nos obedes’é djis pasobra nos ta manera robòt trahá  pa sirbié. Yehova ke pa nos sirbié dor ku nos ta stim’é i dor ku nos mes ke obedes’é.

Pakiko Dios no a traha nos manera e robòt aki?

Kon bo ta kere ku nos Tata den shelu ta sinti ora nos ta obedes’é pasobra nos mes ke?— Wèl, bisa mi: Kon bo komportashon ta pone bo mama ku bo tata sinti?— Beibel ta bisa ku un yu sabí “ta hasi su tata kontentu” pero un yu bobo “ta un tristesa pa su mama.” (Proverbionan 10:1) Bo a yega di ripará kon kontentu bo mama ku bo tata ta bira ora bo hasi manera nan a bisa bo?— Pero kon nan ta sinti ora bo desobedesé nan?—

Kon bo por hasi Yehova i bo mama ku bo tata tambe kontentu?

Awor, laga nos pensa riba nos Tata selestial Yehova. E ta bisa nos kiko nos mester hasi pa nos hasié sinti kontentu. Bo por kohe bo Beibel? Laga nos habrié na Proverbionan 27:11. Den e teksto ei Dios ta bisa nos: ‘Sea sabí, mi yu, i hasi mi kurason kontentu, pa mi por kontestá esun ku desafiá mi.’ Bo sa kiko e kier men aki ku “desafiá”?— Wèl, un hende ku ta desafiá bo lo por hari bo i bisa ku bo no por hasi un kos ku bo a bisa. Kon Satanas ta desafiá Yehova?— Laga nos ban wak.

Kòrda ku den Kapítulo 8 di e buki aki nos a siña ku Satanas ke ta Number Un. E ke pa tur hende hasi manera é ta bisa. Satanas ta bisa ku hende ku ta adorá Yehova ta hasié djis pasobra Yehova ta duna nan bida eterno si nan ador’é. Despues ku Satanas  a logra pa Adam ku Eva desobedesé Yehova, Satanas a desafiá Dios. El a bisa Dios: ‘Hende ta sirbi bo djis pa nan haña kos serka bo. Duna mi un chèns anto lo bo wak kon mi por pone tur hende hala for di bo.’

Kon Satanas a desafiá Yehova despues ku Adam ku Eva a peka?

Ta bèrdat sí ku e palabranan ei no ta pará skirbí den Beibel. Pero ora nos lesa e historia di un hòmber ku yama Jòb, nos ta komprondé bon kla ku Satanas lo a yega di bisa Dios un kos asina. Tantu pa Satanas komo pa Yehova tabata hopi importante si Jòb a keda fiel na Dios òf nò. Laga nos habri nos Beibel na Jòb kapítulo 12, anto nos lo mira kiko a pasa.

B’a ripará ku den Jòb kapítulo 1 Satanas ta den shelu mes ora e angelnan a bini serka Yehova? E ora ei Yehova a puntra Satanas: “For di unda bo ta bin?” Satanas a kontestá ku el a kaba di pasa wak rònt riba tera. E ora ei Yehova a puntr’é: ‘Bo a paga tinu riba Jòb? Bo a mira kon e ta sirbi mi sin hasi nada malu?’—Jòb 1:6-8.

 Mesora Satanas a bini ku un èksküs. El a bisa: ‘Jòb ta sirbi bo djis pasobra e no tin niun problema. Si bo stòp di proteh’é i bendishon’é, e ta maldishoná bo den bo kara.’ E ora ei Yehova a kontestá: ‘Bon anto, Satanas. Bo tin mag di hasi kiko ku bo ke kontra dje, pero no hasi Jòb mes niun daño sí.’—Jòb 1:9-12.

Kiko Satanas a hasi e ora ei?— El a laga hende hòrta Jòb su bakanan i su burikunan, anto mata esnan ku tabata kuida nan. Despues werlek a dal su karnénan mata, i e hendenan ku tabata kuida nan tambe. Mas despues algun hende a bin hòrta su kamelnan, anto mata e hendenan ku tabata kuida nan tambe. I despues Satanas a pone un mal tempu tumba e kas kaminda Jòb su dies yunan tabata, i nan tur a muri. Apesar di tur e kosnan ei, Jòb a keda sirbi Yehova.—Jòb 1:13-22.

Ora Yehova a topa Satanas atrobe, el a kòrda Satanas ku ainda Jòb tabata fiel. Satanas a bolbe bini ku un èksküs. El a bisa: ‘Si bo djis laga mi hasi su kurpa bira malu, e ta maldishoná bo den bo kara.’ E ora ei Yehova a laga Satanas pone Jòb bira malu, pero el a spièrt’é pa no mata Jòb sí.

Kiko Jòb a soportá, i dikon esei a hasi Dios kontentu?

 Satanas a dal Jòb ku un malesa ku a pone henter su kurpa habri na herida ku pus. E heridanan tabata hole asina malu ku niun hende no kier a pasa banda di dje. Asta Jòb su kasá a bis’é: “Maldishoná Dios i muri!” Un par di hende ku a hasi manera kos ku nan ta Jòb su amigu a bin bishit’é, anto nan a pon’é sinti asta mas malu ainda. Nan a bis’é ku ta un kos hopi malu e mester a hasi, pasobra sino lo e no a hañ’é ku asina tantu problema. Maske kuantu problema i doló Satanas a pone Jòb pasa aden, tòg el a keda sirbi Yehova fielmente.—Jòb 2:1-13; 7:5; 19:13-20.

Kon bo ta kere ku Jòb a pone Yehova sinti dor di keda fiel na dje?— El a hasi Yehova kontentu, pasobra awor Yehova por a bisa Satanas: ‘Wak Jòb! E ta sirbi mi pasobra e mes ke sirbi mi.’ Abo lo ta un hende manera Jòb, un hende ku Yehova por usa komo ehèmpel pa mustra ku Satanas ta un gañadó?— Ta un gran onor pa nos yuda mustra ku Satanas no tabatin rason ora el a pretendé ku e por kita tur hende di sirbi Yehova. Hesus, por ehèmpel, a sinti ku e kos ei ta un gran onor p’e.

Nunka e Gran Maestro no a laga Satanas pon’é hasi nada malu. Imaginá bo kon kontentu su ehèmpel a hasi su Tata! Yehova por a mustra riba Hesus anto kontestá Satanas: ‘Wak mi Yu! El a keda fiel na mi den tur-tur kos, i ta pasobra e ta stima mi el a hasié!’ Imaginá bo tambe kuantu goso Hesus ta sinti dor di hasi kurason di su Tata kontentu. E goso ei ta loke a yuda Hesus wanta asta morto na un staka di tormento.—Hebreonan 12:2.

Bo ke ta manera nos Gran Maestro i hasi Yehova kontentu?— E ora ei bo mester sigui siña kiko Yehova ke pa bo hasi, anto hasi Dios kontentu dor di obedes’é!

Lesa kon Hesus a hasi Dios kontentu, i kiko nos tambe tin ku hasi, na Proverbionan 23:22-25; Juan 5:30; 6:38; 8:28 i 2 Juan 4.