Bai na kontenido

Bai na kontenido

 KAPÍTULO 33

Hesus Por Protehá Nos

Kon bo ta imaginá ku Hesus ta—manera un Rei poderoso òf manera un beibi ku no por yuda su kurpa?

Hesus Por Protehá Nos

ORA Hesus a bira grandi anto a haña sa kon Dios a proteh’é dia ku e tabata chikitu, bo ta kere ku el a resa na Yehova pa yam’é danki?— I ora Hesus a haña sa ku Maria i Hosé a hib’é Egipto pa skapa su bida, kiko bo ta kere ku e por a bisa nan?—

Klaru ku awor Hesus no ta beibi mas. E no ta biba na tera mes mas manera ántes. Pero bo a nota ku awendia ora hende kòrda riba Hesus, tin bes ku tur loke nan ta kòrda ariba ta tempu ku e tabata beibi, drumí den un pesebre?— Den tempu di Pasku di Nasementu bo por mira e kos ei, pasobra tur kaminda tin figura di Hesus tempu ku e tabata beibi.

Pero, abo ta kere ku Hesus ta na bida maske e no ta biba na tera mas?— Sí, Dios a lant’é for di morto, i awor e ta un Rei poderoso den shelu. Kiko bo ta kere ku e por hasi pa protehá hende ku ta sirbié?— Wèl, tempu ku Hesus tabata na tera el a mustra kon e por a protehá hende ku ta stim’é. Laga nos wak kon el a protehá su disipelnan un dia ku el a bai den boto ku nan.

 Tabata atardi lat. Hesus a pasa henter dia ta siña hende kantu di Laman di Galilea, un lago di mas o ménos 20 kilometer largu i 12 kilometer hanchu. E ora ei el a bisa su disipelnan: “Laga nos krusa bai na e otro banda di e lago.” Awèl, nan a subi un boto i kuminsá krusa e lago. Hesus tabata hopi kansá, i el a bai drumi riba un kusinchi n’e parti patras di e boto. Den un ratu di ora e tabata morto na soño.

Kiko Hesus ta bisa e bientu i e olanan?

E disipelnan a keda lantá pa nan tene e boto riba rumbo. Promé, tur kos a bai bon. Pero diripiente un bientu duru a lanta. E bientu a kuminsá supla mas i mas duru, i e olanan tabata bira mas i mas grandi. Ola a kuminsá drenta e boto, i e boto a kuminsá yena ku awa.

E disipelnan tabatin miedu. Nan a kere ku e boto tabata bai senk ku nan. Pero Hesus sí no tabatin miedu. Ainda e tabata morto na soño patras den e boto. Porfin e disipelnan a lant’é. Nan a bis’é: ‘Maestro, Maestro, skapa nos; nos ta bai muri den e mal tempu aki.’ E ora ei Hesus a lanta, anto el a papia ku e bientu i e olanan. El a bisa nan: “Keda ketu!”

 Mesora bientu a stòp di supla. A bira ketu-ketu den e lago. E disipelnan a keda boka habrí. Nunka nan no a yega di mira un kos asina. Nan a kuminsá bisa otro: “Ta ken esaki ta anto, ku e ta asta ordená e bientunan i e awa, i nan ta obedes’é?”—Lukas 8:22-25; Marko 4:35-41.

Bo sa ta ken Hesus ta?— Bo sa ta di unda e ta haña tantu poder?— E disipelnan no tabatin nodi spanta, pasobra Hesus tabata huntu ku nan. I Hesus no tabata un hende manera tur otro hende. E por a hasi kos masha grandi mes, kos ku niun otro hende no por a hasi. Laga mi konta bo un otro kos ku el a yega di hasi riba laman ora tabatin mal tempu.

Un otro dia Hesus a bisa su disipelnan pa nan subi boto i bai su dilanti na e otro banda di e lago. Tabata birando anochi, anto Hesus a subi un seru p’e bai hasi orashon su so. Aya riba tabata ketu, un bon lugá pa e papia ku su Tata Yehova Dios.

 E disipelnan a subi boto i a krusa bai na e otro banda di e lago. Pero djis despues, bientu a kuminsá supla. Kada bes e tabata supla mas duru. A bira anochi kaba. E hòmbernan a baha e bela i kuminsá rema, pero e boto no kier a bai dilanti, pasobra tabatin bientu duru ta supla kontra nan. E boto tabata zuai bai-bin meimei di e olanan haltu, i awa tabata drent’é. E hòmbernan a lucha pa yega kantu, pero nan no tabata por.

Ainda Hesus tabata su so riba seru. El a pasa hopi ratu kaba aya riba. Pero awor e por a mira ku su disipelnan tabata den peliger meimei di e olanan haltu. P’esei, el a baha e seru bai kantu di e lago. Dor ku Hesus kier a yuda su disipelnan, el a kuminsá kana riba e laman brutu pa bai serka nan!

Kiko ta pasa si abo purba kana riba awa?— Bo ta senk i bo por hoga. Pero Hesus nò. E tin poder spesial. Hesus a kana basta ratu pa el a yega banda di e boto. P’esei, ora ku e disipelnan a mir’é ta bini serka nan riba awa, ya kasi a bira mainta. Pero nan no por a kere nan bista. Nan a haña hopi miedu. Nan a grita di spantu. E ora ei Hesus a bisa nan: “Tene kurashi, ta ami; No tene miedu.”

Pakiko Hesus a hasi milager?

Asina ku Hesus a drenta e boto, e mal tempu a para. E disipelnan a bolbe keda boka habrí. Nan a kai na rudia dilanti Hesus i bis’é: “Di bèrdat bo ta e Yu di Dios.”—Mateo 14:22-33; Juan 6:16-21.

Lo no ta dushi si nos por a biba den e tempu ei pa mira Hesus hasi kos asina?— Bo sa pakiko Hesus a hasi e milagernan ei?— El a hasi nan pasobra el a stima su disipelnan i e kier a yuda nan. Pero tambe el a hasi nan pasobra e kier a mustra kuantu poder e tin, pasobra e ta bai usa e poder ei den futuro komo Gobernante di e Reino di Dios.

Kon Hesus ta protehá su siguidónan den nos tempu?

 Te awe ainda Hesus ta usa su poder hopi biaha pa protehá su siguidónan ora Satanas ta purba hasi kos pa stroba nan di konta otro hende di e Reino di Dios. Pero Hesus no ta usa su poder pa su disipelnan no bira malu, ni pa e kura nan ora nan ta malu. Ku tempu, tur e apòstelnan di Hesus mes a muri. Hende a mata Santiago ruman di Juan, i nan a tira Juan mes den prizon.—Echonan 12:2; Revelashon 1:9.

Awendia ta meskos. Sea ku hende sirbi Yehova òf nò, nan tur por bira malu i muri. Pero djis akí, ora Hesus ta reina komo Rei di Dios su gobièrnu, e kos ei ta bai kambia. E ora ei, nunka niun hende lo no mester tin miedu mas, pasobra Hesus ta bai usa su poder pa trese bendishon pa tur hende ku ta obedes’é.—Isaias 9:6, 7.

Esakinan ta algun teksto mas ku ta mustra e gran poder di Hesus, esun ku Dios ta hasi Gobernante di e Reino di Dios: Daniel 7:13, 14; Mateo 28:18 i Efesionan 1:20-22.