Bai na kontenido

Bai na kontenido

 KAPÍTULO 42

Pakiko Nos Mester Traha

Pakiko Nos Mester Traha

KIKO bo gusta mas, traha òf hunga?— Hunga no ta malu. Beibel ta papia di kayanan di Yerusalèm “yen di mucha hòmber i mucha muhé ku ta hunga.”—Zakarias 8:5.

E Gran Maestro tabata gusta mira mucha hunga. Pero promé ku el a bini na tera, el a bisa: ‘Mi tabata na Dios su lado manera un trahadó eksperto, semper kontentu su dilanti.’ Paga tinu; e ta bisa ku den shelu Hesus tabata un trahadó ku Yehova. I e tempu ei ku e tabata den shelu el a bisa: “Mi delisia tabata den e yunan di hende.” Sí, manera nos a siña kaba, e Gran Maestro tabatin hopi interes den tur hende; den mucha tambe.—Proverbionan 8:30, 31.

Di kiko e Gran Maestro a gosa promé ku el a bini na tera?

 Bo ta kere ku Hesus a yega di hunga tempu ku e tabata mucha?— Kasi sigur ku sí. Pero kòrda ku den shelu e tabata “un trahadó eksperto.” Bo ta kere ku el a traha ora e tabata na tera tambe?— Wèl, nan tabata yama Hesus “yu di e karpinté.” Pero nan tabata yam’é “e karpinté” tambe. Kiko esei ta laga nos komprondé?— Hosé a kri’é, i e lo mester a siñ’é su trabou. Asina Hesus tambe a bira karpinté.—Mateo 13:55; Marko 6:3.

Ki sorto di karpinté Hesus tabata?— Den shelu e tabata un trahadó eksperto. Bo no ta kere ku na tera tambe e lo tabata un karpinté eksperto?— Trabou di un karpinté tabata basta pisá e tempu ei. Kasi sigur  ta Hesus mes mester a sali bai kap palu, kòrt’é, karga e palu hiba kas, anto us’é pa traha mesa, banki i otro kos.

Bo ta kere ku Hesus tabata gusta hasi e trabou ei?— Abo lo a gusta si bo por a traha bon mesa, stul i kos asina pa hende usa?— Beibel ta bisa ku ta bon pa hende ‘gosa nan trabou.’ Trabou ta duna bo un tipo di goso ku bo no por haña ora bo ta hunga.—Eklesiastés 3:22.

Sí, traha ta bon pa nos mente i bon pa nos kurpa. Hopi mucha ta blo sinta wak televishon òf hunga video game. Nan ta bira muchu gordo, nan ta bira suak, i e no ta hasi nan felis di bèrdat. Anto nan no ta hasi otro hende felis tampoko. Kiko nos mester hasi pa nos ta felis?—

Na Kapítulo 17 di e buki aki nos a siña ku nos por bira felis dor di duna hende kos i hasi kos pa yuda hende. (Echonan 20:35) Beibel ta laga nos komprondé ku Yehova ta e Dios felis. (1 Timoteo 1:11) I den Proverbionan nos ta lesa ku Hesus tabata ‘semper kontentu su dilanti.’ Pakiko Hesus tabata kontentu?— Wèl, el a bisa nos un di e motibunan. E di: “Mi Tata ta traha te awor i mi tambe ta traha.”—Juan 5:17.

Hesus no a hasi trabou di karpinté henter su bida ora e tabata na tera. Yehova Dios tabatin un trabou spesial pa Hesus hasi na tera. Bo sa ki trabou?— Hesus a bisa: ‘Mi mester prediká e Reino di Dios, pasobra ta pa esei mi a wòrdu mandá.’ (Lukas 4:43) Tin bes ora Hesus tabata prediká, e hendenan a kere den dje anto nan a bai konta otro hende tokante e kosnan ku el a bisa. E señora samaritano riba e plachi aki ta un di nan.—Juan 4:7-15, 27-30.

Kua dos tipo di trabou Hesus a hasi tempu ku e tabata na tera?

Hesus a gusta e trabou ku e mester a hasi? Bo ta kere ku e  tabatin gana di hasié?— Hesus a bisa: “Mi kuminda ta pa hasi e boluntat di esun ku a manda mi, i pa kumpli ku su trabou.” (Juan 4:34) Bo gusta kome bo kuminda faborito, no?— Wèl, esei ta duna bo un idea di kuantu Hesus tabata gusta hasi e trabou ku Dios a dun’é.

E manera ku Dios a traha nos ta pone ku ora nos siña hasi un trabou, nos ta sinti kontentu. Dios ta bisa ku su regalo na hende ta pa nan ‘gosa di nan trabou.’ P’esei, si bo siña traha ora ku bo ta hóben, henter bo bida ta bai ta mas dushi.—Eklesiastés 5:19.

Esei no kier men ku mucha por hasi trabou di hende grandi. Pero di un manera òf otro nos tur por traha sí. Kisas bo mayornan ta bai trabou tur dia pa nan gana plaka pa bo famia tin kuminda i un kas pa biba aden. I manera bo mes lo sa, tin hopi trabou pa hasi na kas pa e keda nèchi i limpi.

Ki trabou abo por hasi pa bo yuda henter bo famia?— Bo por yuda drecha mesa, laba tayó, pone sushi pafó, limpia bo kamber i piki bo ko’i hunganan. Por ta bo ta hasi un par di e kosnan aki kaba. Ora bo traha asina, bo ta yuda bo famia masha hopi.

Dikon ta importante pa bo warda bo ko’i hunganan ora bo kaba di hunga ku nan?

Ban wak dikon ta asina bon pa bo hasi e trabounan ei. Ora bo kaba di hunga, bo mester warda bo ko’i hunganan. Dikon bo ta kere ku ta importante pa warda nan?— E ta yuda tene e kas nèchi, i asina bo ta yuda evitá desgrasia tambe. Si bo no piki bo ko’i hunganan, un dia bo mama por kana drenta ku yen di kos den man, anto trapa riba un di nan. E por trompeká, kai i hasi su mes daño. Por ta e mester asta bai hospital. E kos ei sí lo ta tristu, no?— P’esei, ora bo warda bo ko’i hunganan despues di kaba di hunga, bo ta yuda henter bo famia.

 Tin mas trabou ku mucha tin ku hasi, por ehèmpel hùiswèrk. Na skol bo ta siña lesa. Tin mucha ku gusta lesa, ma tin mucha ta hañ’é difísil. Pero asta si bo hañ’é difísil na kuminsamentu, despues lo bo keda kontentu si bo siña lesa bon. Ora bo sa kon pa lesa, tin yen di kos interesante ku bo por siña. Bo por asta lesa Beibel, e buki di Dios, pa bo mes. P’esei, si bo hasi bo hùiswèrk bon, esei lo ta hopi bon pa bo mes, no ta asina?—

Tin hende ta purba kore pa trabou. Kisas bo konosé un hende asina. Pero Dios a krea nos pa nos traha; awèl, nos mester siña gusta trabou. Kuantu e Gran Maestro a gusta su trabou?— Mes tantu ku el a gusta su kuminda faborito. Anto ta kua trabou el a bisa ku e gusta asina tantu?— E trabou di konta hende tokante Yehova Dios i tokante kon nan por haña bida eterno.

Ata un par di kos aki ku por yuda nos siña gusta nos trabou. Nos por puntra nos mes: ‘Pakiko e trabou aki ta importante?’ Si bo sa pakiko e ta importante, ta mas fásil pa bo haña gana di hasié. Anto sea ku e trabou ta grandi òf chikitu, hasi un bon trabou. Si bo hasi asina, bo tambe por gosa di bo trabou, meskos ku nos Gran Maestro.

Beibel por yuda un hende bira un bon trahadó. Lesa kiko Proverbionan 10:4; 22:29; Eklesiastés 3:12, 13 i Kolosensenan 3:23 ta bisa.