Bai na kontenido

Bai na kontenido

 KAPÍTULO 45

Kiko e Reino di Dios Ta? Kon Nos Por Mustra Ku Nos Ke pa E Bini

Kiko e Reino di Dios Ta? Kon Nos Por Mustra Ku Nos Ke pa E Bini

BO KONOSÉ e orashon ku Hesus a siña su siguidónan?— Si bo no konos’é, nos por les’é huntu den Beibel na Mateo 6:9-13. Hopi hende ta yam’é e Orashon di Nos Tata, i un di e kosnan ku e ta bisa ta: “Ku bo reino bin.” Bo sa kiko e reino di Dios ta?—

Wèl, un rei ta e hende ku ta manda den un pais. Anto su gobièrnu yama un reino. Tin pais kaminda e hende ku ta manda den gobièrnu yama presidènt. Kon Beibel ta yama Esun ku ta manda den e gobièrnu di Dios?— E ta yam’é e Rei. Ta p’esei e gobièrnu di Dios yama e Reino.

Bo sa ta ken Yehova Dios a skohe pa bira Rei di Su gobièrnu?— Su Yu Hesukristu. Dikon Hesus ta mihó ku kualkier otro gobernante ku hende por skohe?— Pasobra Hesus ta stima su Tata Yehova masha hopi. P’esei, tur ora e ta hasi kos bon so.

 Hopi aña promé ku Hesus a nase na Bètlehèm, Beibel a papia di su nasementu i a bisa ku é lo bira e Rei ku Dios a skohe. Laga nos lesa tokante esaki na Isaias 9:6 i 7. E ta bisa: “Un yu a nase pa nos, un yu hòmber ta duná na nos, i e gobernashon lo ta riba su skouder. Su nòmber lo ta . . . Prens di Pas. Lo no tin fin na e oumento di su gobernashon i di pas.”—Lèter skùin ta di nos.

Bo sa dikon Beibel ta yama e Gobernante di e Reino di Dios un “Prens”?— Wèl, e prens aki ta yu di un rei. I Hesus ta yu di Yehova e Gran Rei. Pero Yehova a hasi Hesus bira Rei di Su gobièrnu tambe. E gobièrnu ei ta bai goberná mundu pa mil aña largu. (Revelashon 20:6) Despues ku Hesus a batisá, el “a kuminsá prediká i bisa: ‘Repentí, pasobra e reino di shelu ta serka.’”—Mateo 4:17.

Dikon bo ta kere ku Hesus a bisa ku e Reino ta serka?— Dor ku e Rei ku tabata bai reina den shelu tabata ei mes meimei di nan! Ta p’esei Hesus a bisa nan: “E reino di Dios ta meimei di boso.” (Lukas 17:21) Lo bo no tin gana pa e Rei ku Yehova a skohe ta asina serka di bo ku bo por asta mishi kuné?—

Awor, bisa mi: Ki trabou importante Hesus a bin hasi na tera?— Hesus a kontestá e pregunta aki dor di bisa: “Mi mester prediká e reino di Dios na e otro statnan tambe, pasobra ta pa e propósito aki mi a wòrdu mandá.” (Lukas 4:43) Hesus tabata sa ku e so no por a prediká na tur hende. Awèl, kiko bo ta kere ku el a hasi?—

Hesus a buska mas hende, anto el a siña nan kon pa hasi e trabou di prediká. E promé hendenan ku el a siña tabata e 12 hòmbernan ku el a skohe pa bira su apòstelnan. (Mateo 10:5, 7) Pero ta su apòstelnan so Hesus a siña pa hasi e trabou ei? Nò, Beibel ta bisa ku Hesus a siña hopi otro hende mas pa  nan bai prediká. Un dia el a manda 70 otro disipel pa bai prediká dos-dos na kamindanan ku e lo bai prediká despues. Ta kiko nan a bai siña e hendenan?— Hesus di: “Bisa nan: ‘E reino di Dios a yega serka boso.’” (Lukas 10:9) Asina e hendenan a haña sa tokante e gobièrnu di Dios.

Hopi tempu pasá na Israel, ora un hende kaba di bira rei e tabata drenta stat riba un yu di buriku pa hende mir’é. Anto ora Hesus a bishitá Yerusalèm e último biaha, e tambe a hasi meskos. B’a komprondé dikon? Dor ku Hesus mester bira Gobernante di e Reino di Dios. Ma e pueblo tabata ke pa e bira nan Rei?—

Ki trabou Hesus a bin hasi na tera?

Wèl, segun ku e tabata pasa riba e yu di buriku meimei di e multitut, mayoria hende a kuminsá pone nan mantelnan abou na suela riba e kaminda pa e pasa riba nan. Otro hende a kòrta rama di palma anto pone nan abou riba e kaminda. E kosnan ei ku nan a hasi a mustra ku nan tabata ke pa Hesus bira nan Rei. Nan tabata grita: “Bendishoná ta e Rei ku ta bin den e nòmber di Señor!” Pero no ta tur hende a keda kontentu. Tabatin lider religioso ku a asta bisa Hesus: ‘Bisa bo disipelnan keda ketu.’—Lukas 19:28-40.

Kiko a pone ku e pueblo no tabata ke mas pa Hesus bira nan Rei?

Sinku dia despues nan a arestá Hesus anto hib’é den un palasio pa nan tres’é dilanti e gobernadó Ponsio Pilato. Hesus su enemigunan a bisa ku Hesus a pretendé di ta rei, i ku e ta kontra e gobièrnu romano. P’esei Pilato a wak kiko Hesus tin di bisa tokante e asuntunan ei. Hesus a splik’é ku e no ta purba kita puesto di rei for di niun hende. El a bisa Pilato: “Mi reino no ta di e mundu aki.”—Juan 18:36.

E ora ei Pilato a sali pafó anto bisa e pueblo ku e ta haña ku Hesus no a hasi nada malu. Pero awor e pueblo no tabata ke mas pa Hesus bira nan Rei. Nan no tabata ke pa Pilato lag’é liber. (Juan 18:37-40) Pilato a bolbe papia ku Hesus, i ora el a kaba e tabatin  sigur ku Hesus no a hasi nada malu. P’esei, Pilato a hiba Hesus pafó delaster biaha, anto el a bisa nan: “Ata boso rei!” Pero e pueblo a grita: ‘Bai kuné! Bai kuné! Klab’é na staka!’

Pilato a puntra nan: ‘Boso rei mi mester klaba na staka?’ E saserdotenan prinsipal a kontest’é: “Nos no tin otro rei, sino solamente Cesar.” Imaginá bo! E saserdotenan malbado ei a logra pone e pueblo bira kontra Hesus!—Juan 19:1-16.

Awendia, kos no ta muchu diferente ku den e tempu ei. Mayoria hende no ke di bèrdat pa Hesus bira nan Rei. Kisas nan ta bisa ku nan ta kere den  Dios, pero nan no ke pa ni Dios ni Kristu bisa nan kiko pa hasi. Nan ke tin nan mes gobièrnunan aki na tera.

Kiko di nos awor? Ora nos haña sa tokante e Reino di Dios i di tur e kosnan grandi i bunita ku e ta bai hasi, kiko esei ta pone nos sinti pa Dios?— Nos ta stima Dios, tòg?— Awèl, kon nos por mustra Dios ku nos ta stim’é i ku nos ke pa su Reino goberná nos?—

Pakiko Hesus a batisá, i kon Dios a mustra ku el a aprobá loke Hesus a hasi?

Nos por mustra Dios ku nos ta stim’é, dor di sigui ehèmpel di Hesus. Anto ta kiko Hesus a hasi pa mustra ku e ta stima Yehova?— El a bisa esaki: “Semper mi ta hasi e kosnan ku ta agrad’é.” (Juan 8:29) Sí, Hesus a bini na tera ‘pa hasi e boluntat di Dios’ i “pa kumpli ku su trabou.” (Hebreonan 10:7; Juan 4:34) Ban wak kiko Hesus a hasi promé ku el a kuminsá su trabou di prediká.

Hesus a bai serka Juan Boutista na Riu Hordan. Despues ku nan a kana drenta awa, Juan a baha Hesus tur-tur bou di awa, anto kaba bin ariba bèk kuné. Bo sa dikon Juan a batisá Hesus?—

Unda nos por papia ku hende tokante e Reino di Dios?

Ta Hesus mes a pidi Juan pa batis’é. Pero kon nos por sa ku Dios tabata ke pa Hesus batisá?— Nos sa ku ta asina pasobra ora Hesus a bin ariba bèk for di awa el a tende e stèm di Dios for di shelu bisa: “Abo ta  mi yu stimá, den bo mi tin goso.” Dios a asta pone su spiritu santu baha den forma di un palomba riba Hesus. Kier men, Hesus a batisá p’e mustra ku e tabata ke sirbi Yehova henter su bida, sí, pa semper.—Marko 1:9-11.

Abo tin ku krese ainda. Pero kiko bo ta bai hasi ora bo bira mas grandi?— Bo ta bai batisá meskos ku Hesus?— Ta importante pa bo imit’é, pasobra Beibel ta bisa ku el a laga ‘un ehèmpel pa bo, pa bo sigui den su pasonan.’ (1 Pedro 2:21) Dia bo batisá, lo bo mustra ku di bèrdat bo ke pa e Reino di Dios goberná riba bo. Pero batisá so no ta tur kos.

Nos tin ku obedesé tur kos ku Hesus a siña nos. Hesus a bisa ku nos no mester “ta di mundu.” Si nos kuminsá hasi kos di mundu, nos por bisa ku nos ta obedesé Hesus? Hesus ku su apòstelnan a keda leu for di e tipo di kosnan ei. (Juan 17:14) Pero kiko sí nan tabata hasi?— Nan tabata papia ku hende tokante e Reino di Dios. Esei tabata e trabou importante den nan bida. Nos tambe por hasi e trabou ei?— Sí, anto si di bèrdat nos ke pa e Reino di Dios bini, manera nos ta bisa ora nos ta resa, anto nos lo hasi e trabou ei tambe.

Ban wak e otro tekstonan aki ku ta siña nos kiko nos por hasi pa mustra ku nos ke pa e Reino di Dios bini: Mateo 6:24-33; 24:14; 1 Juan 2:15-17 i 5:3.