Bai na kontenido

Bai na kontenido

 KAPÍTULO 19

Ta Bon pa Bringa?

Ta Bon pa Bringa?

BO KONOSÉ mucha ku ta purba hunga tòf?— Bo gusta bai serka nan? Òf bo ta preferá bai serka hende bondadoso ku gusta pas?— E Gran Maestro a bisa: ‘Felis ta hende ku ta hasi pas, pasobra nan lo wòrdu yamá yunan di Dios.’—Mateo 5:9.

Pero tin bes ku hende ta hasi kos ku ta pone nos rabia, no?— Ora e kos ei pasa, nos por sinti gana di hasi nan un kos bèk. Asina a yega di sosodé ku e disipelnan di Hesus un dia ku nan tabata ku Hesus riba kaminda pa Yerusalèm. Laga mi konta bo kiko a pasa.

Ora nan tabatin algun ratu ta kana, Hesus a manda un par di su disipelnan bai promé kuné na un pueblo samaritano chikitu pa buska un lugá pa nan sosegá. Pero e hendenan dje pueblo no tabata ke pa nan keda, pasobra nan tabatin otro religion. I nan no tabata gusta niun hende ku ta bai Yerusalèm pa adorá.

Kon Santiago ku Juan kier a tuma vengansa di e samaritanonan?

 Si ta ku bo e kos ei a pasa, kiko lo bo a hasi? Lo bo a rabia? Lo bo haña gana di hasi nan un kos bèk?— Esei ta loke Santiago ku Juan, dos disipel di Hesus, kier a hasi. Nan a bisa Hesus: ‘Bo ke pa nos manda kandela baha for di shelu i kaba ku nan?’ No ta nada straño ku Hesus a yama nan Yu di Dònder! Pero Hesus a bisa nan ku no ta bon pa trata hende asina.—Lukas 9:51-56; Marko 3:17.

Ta bèrdat ku tin bes hende ta trata nos malu. Tin bes otro mucha no ke pa nos hunga den nan wega. Kisas asta nan ta bisa nos: “Nos no ke hunga ku bo.” Ora un kos asina pasa, e por pone nos rabia, no? Nos por sinti gana di hasi nan un kos bèk. Pero, ta bon pa nos hasié?—

Bo por kohe bo Beibel? E ora ei nos por buska Proverbionan kapítulo 24, versíkulo 29. Ei tin skirbí: “No bisa: ‘Lo mi hasi kuné meskos ku el a hasi ku mi; lo mi paga e hòmber segun su obra.’”

Kiko bo ta komprondé for di e teksto aki?— E ta mustra ku nos no mester tuma vengansa, esta, hasi hende kos malu bèk. Nos no mester hasi hende algu djis pasobra nan a hasi nos un kos malu. Pero, kiko bo mester hasi si un hende ke purba bringa ku bo? Si e purba pone bo rabia dor di tenta bo, hari bo i bisa bo ku bo tin miedu, òf ku bo ta kobarde, kiko bo tin ku hasi? Bo mester dal bai i bringa kuné?—

Laga nos bolbe wak kiko Beibel ta bisa. Ban na Mateo kapítulo 5, versíkulo 39. Ei Hesus ta bisa: ‘No resistí hende malbado. Ma ken ku dal bo un bòftá na bo banda drechi di kara, dun’é e otro banda tambe.’ Kiko bo ta kere ku Hesus tabata kier men? Bo ta kere ku e tabata kier men ku si un hende dal bo un moketa na un banda di bo kara, bo mester lag’é dal bo na e otro banda tambe?—

 Nò, esei sigur no ta loke Hesus tabata kier men. Un bòftá no ta manera un moketa. Ora un hende bòfta bo, esei ta mas manera ora un hende pusha bo. Si un hende pusha bo, kisas ta bringa e ke bringa ku bo. E ke pa bo rabia. I si bo rabia anto push’é bèk, kiko ta sosodé?— Kasi sigur boso ta kuminsá bringa.

Pero Hesus no tabata ke pa su siguidónan bringa. P’esei el a bisa ku si un hende dal nos un bòftá, nos no mester dal e bèk. Nos no mester rabia i kuminsá bringa. Pasobra si nos hasié, nos ta mustra ku nos no ta mihó ku esun ku a kuminsá bringa promé.

Si bin problema, kiko bo ta kere ta e mihó kos pa hasi?— Bo tin ku bai for di eibanda. E otro hende por pusha bo un par di biaha mas. Pero kasi sigur lo e no sigui. Si bo kana bai, esei no kier  men ku bo ta suak. E kier men ku bo ta fuerte, pasobra bo ta hasi kos bon asta ora ta difísil.

Kiko nos mester hasi si un hende ke purba bringa ku nos?

Pero awor, si bo dal bai bringa anto gana, kiko por pasa e ora ei?— Esun ku bo a bati por bini bèk ku un par di amigu. Nan por asta bati bo ku un palu òf hinka bo ku kuchú. B’a mira pakiko Hesus no ke pa nos bringa?—

Kiko nos mester hasi si nos mira otro hende ta bringa? Nos mester tuma parti pa un di nan?— Beibel ta bisa nos kiko ta bon pa hasi. Ban na Proverbionan kapítulo 26, versíkulo 17. E ta bisa: “Esun ku pasa entremeté su mes den pleitu di otro ta manera un hende ku ta kohe un kachó na su orea.”

Dikon mete ora otro hende ta bringa ta meskos ku gara un kachó na su orea? Algu malu por pasa bo, awèl no hasié!

Kiko ta pasa si bo gara un kachó na su orea? E ta sinti doló i e ta purba morde bo. Òf nò? Mas e kachó purba lòs, mas duru bo tin ku ten’é na su orea, i mas rabiá e kachó ta bira. Si bo lag’é bai, kasi sigur e ta morde bo duru. Pero, bo por keda kuné tené na su orea pa semper?—

Awèl, ta den un problema asina nos ta haña nos si nos mete den pelea di otro hende. Kisas nos no sa ta kua di nan a kuminsá bringa promé, ni dikon nan ta bringa. Kisas bo ta mira nan ta bati un hende. Pero por ta ku ta hòrta el a hòrta un kos dje otro hende. Si nos tuma parti p’e, ta un ladron nos ta yuda. Esei lo no ta bon, tòg?

 Wèl, kiko bo mester hasi antó si bo mira hende ta bringa?— Si ta na skol, bo por kore bai bisa un maestro. I si no ta na skol, bo por yama bo mama, bo tata òf un polis. Sí, nos mester buska pas, evitá problema, asta ora otro hende tin gana di bringa.

Kiko bo mester hasi si bo mira hende ta bringa?

Berdadero disipel di Hesus ta hasi tur loke nan por pa evitá di haña nan den bringamentu. Asina nos ta mustra ku nos ta fuerte pa hasi kos bon, asta ora ta difísil. Beibel ta bisa ku un disipel di Hesus no tin nodi bringa, ma e mester ta amabel ku tur hende.—2 Timoteo 2:24.

Awor, laga nos wak mas bon konseho ku lo yuda nos evitá di haña nos den bringamentu: Romanonan 12:17-21 i 1 Pedro 3:10, 11.