Di Dos Karta pa e Korintionan 11:1-33
11 Maske por parse ku mi ta un poko irasonabel, lo mi tin gana pa boso soportá mi un ratu. Aunke, bon mirá, boso ta soportá mi kaba!
2 Mi ke protehá boso, meskos ku Dios ke protehá boso, pasobra mi mes a primintí di laga boso kasa ku un solo esposo, esta, Kristu. I mi ke presentá boso komo un bírgen puru na dje.+
3 Ma mi tin miedu ku un hende, di un manera òf otro, lo por daña boso manera di pensa meskos ku e kolebra a gaña Eva ku su astusia.+ Esei lo pone ku boso no ta puru ni sinsero mas. Pero un disipel di Kristu mester ta puru i sinsero.+
4 Manera boso situashon ta aworakí, si un hende bini i prediká tokante un Hesus ku ta diferente for di e Hesus ku nos a prediká, boso ta kla pa aseptá loke e hende ei ta bisa. Òf si un hende influensiá boso mediante un spiritu* ku ta diferente for di e spiritu* ku boso a risibí, òf si un hende trese bon notisia ku ta diferente for di e bon notisianan ku boso a aseptá,+ boso ta kla pa aseptá loke nan ta bisa.
5 Pasobra segun mi, di niun manera mi no ta inferior na e apòstelnan ei ku boso tin ku ta hasi manera nan ta masha kos.*+
6 Pero asta si mi no tin bon abilidat di papia,+ konosementu di Dios sí mi tin. Na tur manera posibel i den tur loke nos a hasi, nos a mustra boso esei bon kla.
7 Di buena gana, mi a prediká e bon notisianan di Dios na boso sin kobra nada.+ Akaso mi a kometé un piká pasobra mi a humiá mi mes pa boso por ser onrá?
8 Mi a aseptá yudansa material di e otro kongregashonnan miéntras mi tabata sirbi boso; ta komo si fuera mi a pluma* nan pa sirbi boso.+
9 Sí, tempu mi tabata serka boso i mi a haña mi den nesesidat, mi no a bira un karga pa niun hende. Mas bien, e rumannan ku a bini di Masedonia a sòru pa tur loke mi tabatin mester.+ Sí, mi a hasi tur loke tabata posibel pa mi no bira un karga pa boso, i lo mi sigui sòru pa esei no sosodé tampoko.+
10 Tanten ku mi ta un disipel di Kristu,* nada lo no stroba mi di sinti mi orguyoso ku mi no tabata un karga pa e rumannan+ den e regionnan di Akaya.
11 Dikon mi no a tuma nada for di boso? Akaso ta pasobra mi no stima boso? Dios sí sa ku mi stima boso.
12 Pues, lo mi sigui hasi loke semper mi a hasi,+ pa asina mi no duna e hendenan ku ta broma i bisa ku nan ta apòstel meskos ku nos un motibu* pa broma.
13 Pasobra e hendenan ei ta apòstel falsu. Nan ta engañá hende, i nan ta hasi komo si fuera nan ta* apòstel di Kristu.+
14 I esei no ta nada straño, pasobra Satanas mes ta sigui hasi komo si fuera e ta* un angel di lus.+
15 P’esei, no ta nada straño ku su sirbidónan tambe ta sigui hasi komo si fuera nan ta hende ku ta hasi loke ta korekto. Pero nan fin lo ta di akuerdo ku nan obranan.+
16 Mi ta bolbe bisa boso: No pensa ku mi ta irasonabel. Pero asta si boso ta pensa esei, soportá mi komo un hende irasonabel pa mi tambe por broma un ratu meskos ku nan.
17 Loke mi ta bai bisa awor ta manera un hende ku ta broma. Den esei, mi no ta siguiendo e ehèmpel di Señor. Mas bien, mi ta papia manera un hende irasonabel lo a papia, un hende ku ta konfia muchu den su mes.
18 Hopi hende ta broma ku e kosnan di e mundu akí,* pues mi tambe lo hasi esei.
19 Boso ta bisa ku boso ta rasonabel. Pero ku masha smak boso ta tolerá hende irasonabel. Kon por ta?
20 Bon mirá, boso ta tolerá tur hende ku ta hasi boso katibu, tur hende ku ta probechá di boso i gara loke boso tin, tur hende ku ta subi boso kabes* i tur hende ku ta dal boso wanta.
21 Ta un bèrgwensa pa nos bisa esei, pero mi ta bisa esei pasobra den bista di algun di boso por parse ku nos ta muchu suak i ku nos no a usa nos outoridat manera mester ta.
Pero si algun hende no tin bèrgwensa di broma, e ora ei ami tampoko lo no tin bèrgwensa di broma, maske hende lo por pensa ku mi ta un hende irasonabel.
22 Nan ta hebreo? Ami tambe.+ Nan ta israelita? Ami tambe. Nan ta desendiente* di Ábraham? Ami tambe.+
23 Nan ta sirbidó di Kristu? Awor por parse ku ta hende loko mi ta, pero mi ta un sirbidó di Kristu mas sobresaliente ku nan: Mi a traha mas tantu ku nan den mi sirbishi na Dios;+ mi tabata mas tantu biaha den prizòn ku nan;+ hende a bati mi masha hopi biaha, i hopi biaha, mi tabata serka di muri.+
24 Sinku biaha, mi a haña di e hudiunan e kastigu di 39 gòlpi.*+
25 Tres biaha, mi a haña un halá di sota ku bara.+ Un biaha, nan a piedra mi.+ Tres biaha, mi tabata riba barku ku a senk,+ i mi a pasa un dia i un anochi riba laman ganchu.
26 Tur ora bai, mi tabata di biahe. Mi tabata den peliger pa motibu di riu, pa motibu di atrakadó, pa motibu di hende di mi mes nashon+ i pa motibu di hende di otro nashon.+ Mi tabata den peliger den stat,+ na lugá desolá, riba laman i entre ruman falsu.
27 Ademas, mi a traha ku sodó di mi frenta. Mi a pasa hopi anochi sin drumi;+ mi a pasa hamber i set.+ Hopi biaha, mi no tabatin kuminda.+ Mi a pasa friu, i mi no tabatin paña.*
28 Fuera di tur e kosnan ei, mi ta preokupá tur dia* pa tur e kongregashonnan.+
29 Ora un hende ta suak, esei ta afektá mi.* Ora un hende pone un otro hende kai for di fe,* esei ta pone mi rabia.
30 Si mi mester broma, lo mi broma ku e kosnan ku ta mustra ku mi ta suak.
31 E Dios i Tata di Señor Hesus, kende mester ser alabá pa semper, sa ku mi no ta gaña.
32 Na Damasko, e gobernador ku tabata sirbi bou di Rei Arétas a pone sòldá vigilá e portanan di e stat pa gara mi.
33 Pero via un bentana den muraya di e stat, e rumannan a baha mi den un makutu,+ i mi a skapa for di su gara.
Nota
^ Òf: “un manera di pensa.”
^ Òf: “e forsa di Dios.”
^ Òf: “na e superapòstelnan ei ku boso tin.”
^ Lit.: “hòrta.”
^ Òf: “ku e bèrdat di Kristu ta biba den mi.”
^ Òf: “preteksto.”
^ Lit.: “nan ta disfrasá nan mes na.”
^ Lit.: “sigui disfrasá su mes na.”
^ Lit.: “broma segun karni.”
^ Òf: “ta halsa nan mes riba boso.”
^ Lit.: “simia.”
^ Lit.: “40 gòlpi ménos un.”
^ Lit.: “tabata sunú.”
^ Òf: “mi ta sinti tur dia un peso riba mi, esta, e preokupashon.”
^ Òf: “ta laga mi sinti mi suak.”
^ Òf: “pone un otro hende trompeká.”
