Bai na kontenido

Bai na kontenido

 KAPÍTULO 32

Kon Yehova A Protehá Hesus

Kon Yehova A Protehá Hesus

TIN bes Yehova ta hasi kos grandi i straño pa protehá chikitinnan ku no por protehá nan mes. Ora bo ta kana den mondi lo bo por mira un di e maneranan ku Yehova ta hasi e kos ei. Pero tin chèns ku ora bo mir’é sosodé lo bo no komprondé mesora ta kiko ta pasando.

Kisas lo bo mira un kos asin’aki. Un para ta baha na suela banda di bo. Ta parse manera kos ku algu a pas’é. E ta lastra un di su alanan, anto ora bo purba yega serka dje e ta hala bai. Mas bo purba yega serka dje, mas e ta keda hala, pero djis un tiki so, nèt pa bo no por koh’é. E ora ei, diripiente e para ta bula bai. Nada no tabata falta su ala! Bo sa ta kiko e para tabata hasi?—

Wèl, e para a baha banda di bo dor ku su puitunan tabata skondí djis eibanda den mata. E mama tabatin miedu pa bo haña nan anto hasi nan algu. P’esei el a hasi manera kos ku ta malu e ta, pa e kita bo for di eibanda. Bo sa ken por protehá nos manera un mama para ta protehá su puitunan?— Den Beibel tin skirbí ku Yehova ta manera un para ku ta kuida su puitunan; un para ku yama águila.—Deuteronomio 32:11, 12.

Kon e mama para aki ta protehá su yunan?

 Hesus ta Yehova su Yu mas stimá. Tempu ku Hesus tabata den shelu, e tabata un spiritu poderoso manera su Tata. E mes por a kuida su kurpa. Pero ora Hesus a nase na tera komo beibi, e no por a yuda su kurpa. E tabatin mester di protekshon.

Pa Hesus por a kumpli ku loke Dios tabata ke pa e hasi na tera, e tabatin ku krese bira hende grandi: un hòmber perfekto. Pero Satanas a purba mata Hesus promé ku e bira grandi. Ta hopi emoshonante pa nos tende kon Yehova a protehá Hesus ora Satanas a purba mat’é tempu ku e tabata beibi. Bo ke tende e historia?—

Poko despues ku Hesus a nase, Satanas a pone algu manera un strea bria den shelu den Oriente. Un grupo di astrólogo, hòmbernan ku ta studia strea, a sigui e strea. Nan mester a kana masha hopi mes, sentenáres di kilometer, pa nan yega Yerusalèm. Ora nan a yega, nan a puntra ta na unda esun ku tin ku bira rei di hudiunan mester a nase. Herodes a laga puntra e hendenan ku tabata sa kiko Beibel ta bisa di e asuntu ei, anto nan a kontestá: “Na Bètlehèm.”—Mateo 2:1-6.

Pa Yehova por a skapa Hesus, ki spièrtamentu el a duna e astrólogonan despues ku nan a kaba di bishitá Hesus?

 Ora Herodes e rei malbado na Yerusalèm a tende ku un rei nobo a nase na Bètlehèm, un pueblo djis ei serka, el a bisa e astrólogonan: ‘Bai buska e mucha te ora boso hañ’é, anto bini bèk bin konta mi.’ Bo sa dikon Herodes kier a sa unda e por haña Hesus?— Dor ku Herodes tabata yalurs; e kier a mata Hesus!

Kon Dios a protehá su Yu?— Wèl, ora e astrólogonan a haña Hesus, nan a dun’é regalo. Despues Dios a spièrta e astrólogonan den un soño pa nan no bai bèk serka Herodes. P’esei nan a bai kas bèk via un otro ruta, sin bai Yerusalèm. Ora Herodes a haña sa ku e astrólogonan a bai, el a rabia mashá. E ora ei el a purba mata Hesus dor di laga mata tur mucha hòmber na Bètlehèm ku tin ménos ku dos aña! Pero ora e kos ei a pasa, ya Hesus no tabata na Bètlehèm mas.

Bo sa kon Hesus por a skapa?— Despues ku e astrólogonan a bai nan kas, Yehova a spièrta Hosé, kasá di Maria. El a bis’é pa nan lanta i hui bai leu, te na Egipto. Einan Herodes e malbado no por a hasi Hesus nada. Un par di aña despues, ora Maria ku Hosé a bolbe ku Hesus for di Egipto, Dios a bolbe spièrta Hosé. El a bis’é den un soño pa nan bai biba na Nazaret, kaminda nada lo no pasa Hesus.—Mateo 2:7-23.

Kon Dios a bolbe skapa Hesus tempu ku e tabata mucha?

B’a mira kon Yehova a protehá su Yu?— Segun bo, ken ta manera e puitunan ku nan mama a skonde den mata, òf manera Hesus tempu ku e tabata mucha chikitu? Abo no ta manera nan?— Tin persona ku ke hasi abo tambe daño. Bo sa ken?—

 Beibel ta bisa ku Satanas ta manera un leon ku ta gruña, i ku e ke kome nos. Anto meskos ku leon gusta buska bestia chikitu pa kome, Satanas ku su demoñonan tambe gusta hasi malu kontra mucha chikitu. (1 Pedro 5:8) Pero Yehova tin mas forsa ku Satanas. Yehova por protehá su muchanan i drecha kualkier kos malu ku Satanas hasi nan.

Bo ta kòrda kiko Kapítulo 10 di e buki aki a bisa ku Diabel i su demoñonan ta purba pone nos hasi?— Sí, nan ta purba pone nos tene e tipo di relashon seksual ku Dios a bisa ku ta malu. Pero, ta ken so tin mag di tene relashon seksual?— Sí, un hende hòmber i un hende muhé ku ta kasá ku otro.

Ta tristu pa bisa, pero tin hende grandi ku gusta tene relashon seksual ku mucha. Ora esei pasa, e mucha por kuminsá hasi kos malu ku el a siña serka e hende grandi ei. E tambe por kuminsá usa e parti seksual, òf privá, di su kurpa pa hasi kos ku no tin mag. Ta esei a pasa hopi tempu pasá den e stat ku yama Sodoma. Beibel ta bisa ku e hendenan den e stat ei, “tantu hóben komo bieu,” a purba tene relashon seksual ku dos hòmber ku a bin bishitá Lòt.—Génesis 19:4, 5.

P’esei, meskos ku Hesus tabatin mester pa nan protehá é, abo tambe tin mester pa nan protehá bo di hende grandi i asta di otro mucha ku por purba tene relashon seksual ku bo. Hopi bes e hendenan ei ta purba hasi manera kos ku nan ta bo amigu. Tin biaha nan ta asta ofresé bo un kos si bo primintí nan ku bo no ta bisa niun hende kiko nan ke hasi ku bo. Pero e hendenan ei ta egoista meskos ku Satanas i su demoñonan, i e úniko kos ku nan ke ta haña plaser pa nan mes. Anto nan ta purba haña plaser dor di tene relashon seksual ku mucha. E kos ei ta masha malu mes!

Bo sa kiko nan por purba hasi pa nan haña plaser?— Wèl, nan por purba frega bo parti privá di kurpa. Òf nan por asta purba frega nan  parti privá di kurpa kontra esun di bo. Pero nunka bo no mester laga niun hende hunga ku bo pénis òf ku bo vagina; ni bo ruman hòmber, ni bo ruman muhé, ni bo mama ni bo tata. Kòrda ku e partinan ei di bo kurpa ta privá.

Kiko bo mester bisa i hasi si un hende purba mishi ku bo na un manera ku no tin mag?

Kon bo por protehá bo kurpa kontra hende ku ta hasi kos malu asina?— Pa di promé, no laga niun hende hunga ku e parti privá di bo kurpa. Si un hende purba hasié, bis’é sin miedu i ku un stèm duru: “Stòp! Mi ta bai bisa riba bo!” Anto si e hende bisa ku e kos ku a pasa ta bo falta, no ker’é. No ta bèrdat. Djis bai bisa riba dje numa. No wòri ta ken e ta! Bo mester bai bisa riba dje asta si e bisa bo ku e kos ku boso ta hasi huntu ta un sekreto di boso dos so. Asta si e primintí bo un nèchi regalo, òf bisa bo kos pa spanta bo, tòg bo tin ku hui for di dje i bai konta un hende kiko el a hasi.

Bo no mester tin miedu, pero bo mester tene kuidou sí. Ora bo mama ku bo tata spièrta bo pa no bai serka sierto hende òf no bai sierto lugánan pasobra nan por ta peligroso pa bo, bo tin ku tende di nan. Si bo tende di nan, bo no ta duna mal hende chèns di hasi bo daño.

Lesa tokante kon bo por protehá bo mes kontra aktonan seksual robes na Génesis 39:7-12; Proverbionan 4:14-16; 14:15, 16; 1 Korintionan 6:18 i 2 Pedro 2:14.