Bai na kontenido

Bai na kontenido

 KAPÍTULO 13

Hendenan Ku A Bira Disipel di Hesus

Ken e hòmber aki ta, i kon el a bira disipel di Hesus?

Hendenan Ku A Bira Disipel di Hesus

KEN ta e mihó sirbidó di Dios ku a yega di eksistí?— Asina mes, Hesukristu. Bo ta kere ku nos por ta manera é?— Wèl, Beibel ta bisa ku ta é a pone e ehèmpel ku nos mester sigui. I Hesus mes ta invitá nos pa bira su disipel.

Bo sa kiko kier men bira disipel di Hesus?— E kier men vários kos. Pa kuminsá, nos mester siña for di Hesus. Pero esei no ta tur kos. Nos mester kere di bèrdat den loke e ta bisa tambe. I si nos ta kere den dje, nos lo hasi loke e ta bisa.

Hopi hende ta bisa ku nan ta kere den Hesus. Abo ta kere ku di bèrdat nan tur ta su disipel?— Nò, mayoria di nan nò. Kisas nan ta bai misa. Pero hopi di nan no a tuma tempu nunka pa siña e kosnan ku Hesus a siña su disipelnan. Ta hende ku ta sigui Hesus su ehèmpel so ta berdadero disipel di dje.

Laga nos papia di un par di e hendenan ku tabata disipel di Hesus tempu ku el a biba komo hende riba tera. Un dje promé hendenan ku a bira disipel di Hesus ta Felipe. Anto Felipe a bai buska su amigu Natanael (ku yama Bartolomé tambe). Aki bo por mira Natanael sintá bou di palu. Ora Natanael a bini serka Hesus, Hesus a bis’é: ‘Ata un hòmber onesto aki, un berdadero yu di Israel.’ Natanael a keda sorprendí. El a puntra Hesus: “Di unda bo konosé mi?”

Ken Hesus ta yamando aki pa bira su disipel?

 Hesus a bis’é: “Promé ku Felipe a yama bo, ora bo tabata bou di e palu di figu, mi a mira bo.” Natanael a keda masha straño ku Hesus tabata sa presis unda e tabata. P’esei, Natanael a bis’é: “Abo ta e Yu di Dios; Abo ta e rei di Israel.”—Juan 1:49.

Hudas Iskariot, Hudas (yamá Tadeo tambe), Simon

E dia promé ku Felipe i Natanael a bira disipel di Hesus, un par di otro hende tambe a bira disipel. Nan tabata Andres, Pedro ruman di Andres, i Juan. I kisas Santiago ruman di Juan tambe. (Juan 1:35-51) Pero despues e kuater disipelnan aki a bolbe na nan negoshi di piskamentu. Un dia, ora Hesus tabata kana kantu di Laman di Galilea, el a mira Pedro ku Andres ta baha reda den laman. Hesus a bisa nan: “Sigui mi.”

Santiago (yu di Alfeo), Tomas, Mateo

Hesus a sigui kana un tiki mas, anto el a mira Santiago ku Juan. Nan tabata sintá den boto ku nan tata, drechando nan reda. Hesus  a yama nan tambe pa siguié. Kiko abo lo a hasi si Hesus a yama bo? Lo bo a bai kuné mesora?— E hòmbernan aki tabata konosé Hesus. Nan tabata sa ku ta Dios a mand’é. P’esei, nan a bai laga nan negoshi di piskamentu mesora, anto a sigui Hesus.—Mateo 4:18-22.

Natanael, Felipe, Juan

Ma, bo ta kere ku ta kos bon so e hòmbernan aki a hasi despues ku nan a bira disipel di Hesus?— Nò. Bo ta kòrda kon nan a asta pleita ku otro tokante kua di nan ta mas importante? Pero nan tabata tende di Hesus sí, i nan tabata dispuesto pa kambia nan manera. Si nos ta dispuesto pa kambia, nos tambe por ta disipel di Hesus.

Santiago (ruman di Juan), Andres, Pedro

Hesus a invitá tur sorto di hende pa bira su disipel. Un biaha, un gobernante hóben riku a bini serka Hesus pa puntr’é kon e por haña bida eterno. Ora el a bisa Hesus ku e ta kumpli ku Dios su mandamentunan for di tempu ku e ta mucha, Hesus a invit’é: “Bin, sigui mi.” Bo sa kiko a sosodé?—

Wèl, ora e hòmber a haña sa ku bira disipel di Hesus mester ta mas importante ku rikesa, el a bira hopi tristu. E no a bira disipel di Hesus, pasobra el a stima su plaka mas ku el a stima Dios.—Lukas 18:18-25.

Ora Hesus tabatin kasi un aña i mei ta prediká, el a skohe 12 di su disipelnan pa nan bira su apòstelnan. E apòstelnan ei ta hòmbernan ku el a manda pa hasi trabou spesial. Bo sa nan nòmber?— Laga nos wak si nos por siña kòrda nan. Mira nan riba e plachi aki, anto wak si bo por bisa nan nòmber. Ora bo kaba, purba bisa nan nòmber for di kabes.

Wak e hende muhénan aki ku ta yuda Hesus ora e ta prediká. Bo sa ken nan ta?

Ku tempu un di e 12 apòstelnan a bira mal hende. Su nòmber ta Hudas Iskariot. P’esei, despues a skohe un otro disipel pa bira  apòstel. Bo sa kon yam’é?— Su nòmber ta Matias. Mas despues, Pablo ku Barnabas tambe a bira apòstel, pero nan no tabata dje grupo di 12 apostel.—Echonan 1:23-26; 14:14.

Manera nos a siña den kapítulo 1 dje buki aki, Hesus tabatin interes den mucha chikitu. Dikon?— Pasobra e tabata sa ku nan tambe por a bira su disipel. Sí, hopi bes mucha por asta bisa kos na un manera ku ta pone hende grandi skucha i haña gana di siña mas tokante e Gran Maestro.

Hopi hende muhé tambe a bira disipel di Hesus. Un par di nan a biaha huntu kuné ora e tabata bai otro stat pa prediká.  Algun di nan tabata Maria Magdalena, Juana i Susana. Kisas nan a yuda kushiná i laba paña tambe p’e.—Lukas 8:1-3.

Abo ke ta disipel di Hesus?— Kòrda ku si nos djis bisa ku nos ta su disipel, esei no kier men ainda ku nos ta su disipel di bèrdat. Nos mester mustra ku nos ta su disipel dor di komportá nos manera un disipel unda ku nos ta, no ora nos ta na reunion kristian so. Bo por pensa unda asina ta importante pa nos komportá nos manera un disipel di Hesus?—

Sí, na kas tambe nos mester komportá nos asina. Pero tin un kaminda mas: na skol. Loke ami i abo no mester lubidá nunka ta ku pa nos ta berdadero disipel di Hesus, nos mester komportá nos manera Hesus henter dia, tur dia, i unda ku nos ta.

Na unda ta importante pa nos komportá nos manera disipel di Hesus?

Awor, ban lesa huntu kiko Beibel ta bisa tokante disipel di Hesus na Mateo 28:19, 20; Lukas 6:13-16; Juan 8:31, 32 i 1 Pedro 2:21.