Bai na kontenido

Bai na kontenido

 KAPÍTULO 24

Nunka Bira Ladron!

Nunka Bira Ladron!

HENDE a yega di hòrta un kos for di bo?— Anto kon bo a sinti?— Esun ku a hòrta bo tabata un ladron, i niun hende no gusta ladron. Dikon bo ta kere ku hende ta bira ladron? Ta asina nan ta nase?—

Nos a kaba di siña ku hende ta nase ku piká. Esei kier men ku nos tur ta imperfekto. Pero niun hende no ta nase ladron sí. Tin ladron ku ta bini di bon famia. Kisas su mama, su tata i su rumannan ta hende onesto. Pero si e tin deseo pa haña sèn òf kos ku e por kumpra ku sèn, e deseo ei por pon’é bira ladron.

Segun bo, ken tabata e promé ladron?— Laga nos pensa un ratu. Tempu ku e Gran Maestro tabata biba den shelu e tabata konosé e persona ei. E ladron ei tabata un angel. Pero si Dios a traha tur angel perfekto, ta kon bin e angel ei a bira ladron?— Wèl, manera nos a siña den Kapítulo 8 di e buki aki, e tabata deseá un kos ku no ta di dje. Bo ta kòrda ta kiko?—

Despues ku Dios a krea e promé hende hòmber i e promé hende muhé, e angel ei tabata ke pa nan adorá é. E no tabatin derecho pa nan ador’é. Ta Dios so tin e derecho ei. Pero e angel ei a hòrta e derecho aki for di Dios! El a bira un ladron, pasobra el a pone Adam ku Eva adorá é. El a bira Satanas e Diabel.

Ta kiko ta pone hende bira ladron?— Un deseo pa kos ku no ta di nan. E deseo aki por bira asina fuerte ku e ta pone asta bon hende hasi kos malu. Tin bes, hende ku ta bira ladron no ta repentí i kambia pa hasi kos bon atrobe. Un di Hesus  su apòstelnan tabata un hende asina. Su nòmber ta Hudas Iskariot.

Hudas tabata sa ku ta malu pa hòrta, pasobra el a siña e Lei di Dios for di tempu ku e tabata mucha chikitu. E tabata sa ku un biaha Dios a asta papia for di shelu i bisa su pueblo: “No hòrta.” (Eksodo 20:15) Ora Hudas a bira grandi el a konosé e Gran Maestro i a bira un di su disipelnan. Despues Hesus a asta skohe Hudas pa bira un di su 12 apòstelnan.

Hesus ku su apòstelnan tabata kana huntu di un lugá pa otro. Nan tabata kome huntu tambe. I nan tabata warda tur nan plaka huntu den un kaha. Hesus a laga Hudas sòru pa e kaha. Klaru ku no ta di Hudas e sèn tabata. Pero, bo sa kiko Hudas a kuminsá hasi despues?—

Kiko a pone Hudas hòrta?

Hudas a kuminsá kohe plaka for di e kaha, sin ku e tin mag. E tabata kohe plaka ora e otro disipelnan no ta wak. I asta el a buska manera pa haña mas plaka. El a kuminsá pensa riba plaka henter dia. Laga nos wak kiko e mal deseo aki a pon’é hasi nèt un par di dia promé ku nan a mata e Gran Maestro.

Maria, ruman di Hesus su amigu Lázaro, a kohe un bòter di zeta masha karu, anto bash’é riba Hesus su pia. Pero Hudas a kuminsá kik. Bo sa dikon?— E di ku lo tabata mihó si nan a bende e zeta anto parti e plaka pa hende pober. Pero loke e tabata ke ta pa nan a pone e sèn den e kaha pa e por a hòrt’é.—Juan 12:1-6.

Hesus a bisa Hudas p’e laga Maria na pas, pasobra ta un kos hopi bondadoso el a hasi. Hudas no a keda kontentu ku Hesus a bis’é e kos ei. P’esei, el a bai serka e saserdotenan prinsipal. Nan tabata enemigu di Hesus. Nan tabatin gana di kohe Hesus prezu, pero nan kier a hasié anochi, pa hende no mira nan.

 Hudas a bisa e saserdotenan: ‘Mi ta bisa boso kon boso por haña Hesus si boso duna mi plaka. Kuantu boso ta duna mi?’

E saserdotenan a kontest’é: ‘Nos ta duna bo trinta pida plata.’—Mateo 26:14-16.

Hudas a tuma e plaka. Ta manera kos ku el a bende e Gran Maestro ku e hòmbernan ei! Bo por imaginá bo ku un hende por hasi un kos asina malu?— Wèl, ta asina ta pasa ora hende bira ladron i hòrta plaka. Nan ta kuminsá stima plaka mas ku nan ta stima otro hende, i asta mas ku nan ta stima Dios.

Kisas bo ta bisa: ‘Nunka lo mi no stima nada mas tantu ku mi ta stima Yehova Dios.’ Ta bon ku bo ta pensa asina. Kasi sigur Hudas tambe a pensa asina ora Hesus a skoh’é pa bira su apòstel. I kisas otro hende ku a bira ladron tambe tabata pensa asina. Laga nos papia di un par di nan.

Riba ki kos malu Akan i David ta pensando?

Un di nan tabata un sirbidó di Dios ku yama Akan. Akan a biba hopi tempu promé ku e Gran Maestro a nase. Akan a mira un mantel masha bunita, un bara di oro i un par di pida plata. Nan no tabata di dje. Beibel ta bisa ku  nan tabata di Yehova, pasobra e pueblo di Dios a kita nan for di nan enemigunan. Pero Akan tabata ke nan asina tantu ku el a hòrta nan.—Josué 6:19; 7:11, 20-22.

Ata un otro ehèmpel aki. Hopi tempu pasá, Yehova a skohe David pa bira rei di e pueblo di Israel. Un dia David a kuminsá wak Bètsabé, un hende muhé masha bunita. El a keda wak Bètsabé, i a keda pensa di hib’é su kas p’e bira su kasá. Pero Bètsabé tabata kasá di Urias. Kiko David mester a hasi?—

David mester a stòp di pensa riba e asuntu di hiba Bètsabé su kas. Pero e no a stòp. P’esei, David a hib’é su kas tòg. Anto despues el a laga mata Urias tambe. Dikon David a hasi e kosnan malu  ei?— Dor ku el a keda deseá kasá di otro hende.—2 Samuel 11:2-27.

Dikon nos por bisa ku Absalon tabata ladron?

Dor ku David a sinti duele di loke el a hasi, Yehova a lag’é sigui biba. Pero awor David a hañ’é ku hopi problema. Su yu Absalon kier a kita David su puesto di rei for di dje. P’esei, ora hende tabata bini serka David, Absalon tabata brasa nan i sunchi nan. Beibel ta bisa: “Absalon a hòrta kurason di e hòmbernan di Israel.” El a pone e hendenan ei deseá pa é bira rei na lugá di David.—2 Samuel 15:1-12.

Bo a yega di deseá un kos asina tantu, meskos ku Akan, David i Absalon?— Si e kos ei ku bo ta deseá ta di otro hende, anto bo koh’é sin ku bo tin mag, ta hòrta bo a hòrta. Bo ta kòrda kiko Satanas, e promé ladron, tabata ke?— E tabata ke pa hende adorá é na lugá di Dios. Esei kier men ku ta hòrta Satanas a hòrta ora el a pone Adam ku Eva obedesé é.

Ora un kos ta di un hende, e hende ei tin derecho di bisa ken tin mag di us’é. Por ehèmpel, laga nos bisa ku bo a bai hunga na kas di un otro mucha. Bo tin mag di kohe un kos di su kas i bai kas kuné?— Ta si e tata òf e mama dje mucha bisa bo ku bo tin mag so bo por hasié. Si bo bai kas ku un kos sin pidi, ta hòrta bo a hòrta.

Ki ora lo bo por sinti tentashon pa hòrta?— Ora bo ta deseá un kos ku no ta di bo. I asta si niun otro hende no wak bo koh’é, ken sí ta wak bo?— Yehova Dios. I nos mester keda kòrda ku Dios tin rabia riba hòrtamentu. P’esei, si bo ta stima Dios i bo próhimo, nunka lo bo no bira ladron.

Beibel ta mustra nos bon kla ku ta malu pa hòrta. Ban lesa Marko 10:17-19; Romanonan 13:9 i Efesionan 4:28.