Bai na kontenido

Bai na kontenido

 KAPÍTULO 26

Dikon Ta Difísil pa Hasi Bon

Dikon Ta Difísil pa Hasi Bon

KEN a keda kontentu ora Saulo a hasi malu?— Satanas e Diabel. Pero no ta e so. E lidernan religioso dje hudiunan tambe a keda kontentu. Anto ora Saulo a bira disipel di e Gran Maestro i hende a kuminsá yam’é Pablo, e lidernan religioso ei a haña rabia riba dje. B’a mira dikon ta difísil pa disipel di Hesus hasi bon?—

Kiko Pablo a pasa aden ora el a hasi bon?

Un biaha, e sumo saserdote ku yama Ananias a manda hende dal Pablo den su kara. Ananias a asta purba pa nan sera Pablo den prizon. Pablo a pasa den hopi kos despues ku el a bira disipel di Hesus. Por ehèmpel, mal hende a yega di bati Pablo i purba dal e mata ku barank’i piedra.—Echonan 23:1, 2; 2 Korintionan 11:24, 25.

Hopi hende lo purba pone nos hasi kos ku Dios no ta gusta. P’esei, puntra bo mes esaki: Kuantu mi ta stima loke ta bon? Mi ta stima loke ta bon asina tantu ku lo mi sigui hasi bon  asta ora esei ta pone hende haña rabia riba mi? Bo mester tin kurashi pa bo hasi asina, no?—

Kisas bo ta puntra bo mes: ‘Dikon hende mester haña rabia riba nos pasobra nos ta hasi bon? No ta kontentu nan mester ta?’ Esei ta loke hende lo a pensa. I ta bèrdat sí ku hopi bes ora Hesus a hasi kos bon, hende tabata keda kontentu kuné. Un dia Hesus tabata den un stat, anto tur hende di e stat a bini huntu na porta di e kas kaminda e tabata keda. Nan a bini pasobra Hesus tabata kurando hende malu.—Marko 1:33.

Pero no ta tur biaha hende a gusta e kosnan ku Hesus a siña.  Maske tur loke el a siña ta bon, tòg algun hende a haña hopi rabia riba dje pasobra el a papia e bèrdat. Ta esei a pasa un dia na Nazaret, e stat kaminda Hesus a krese. El a drenta snoa, e lugá kaminda hudiu ta bini huntu pa adorá Dios.

Ei Hesus a duna un diskurso masha bunita for di e Skritura. Na kuminsamentu e hendenan a gusta. Nan a keda boka habrí di e bunita palabranan ku tabata sali for di su boka. Kasi nan no por a kere ku ta e mucha hòmber ku a krese den nan mes stat tabata papia.

Pero e ora ei Hesus a bisa un otro kos. El a konta nan di un par di biaha ku Dios a hasi kos spesial pa hende ku no tabata hudiu. Ora Hesus a bisa e kos ei, e hendenan den snoa a rabia. Bo sa dikon?— Dor ku nan tabata kere ku ta pa nan so Dios ta hasi kos spesial. Nan a kere ku nan ta mihó ku otro hende. P’esei, e kos ku Hesus a bisa a pone nan haña rabia riba dje. Anto bo sa kiko nan a purba hasi kuné?—

Beibel ta bisa: ‘Nan a kohe Hesus tene, anto sak’é purá for di e stat. Nan a bai kuné na rant di un seru, i nan kier a tir’é for di baranka pa mat’é! Pero Hesus a skapa for di nan.’—Lukas 4:16-30.

Dikon e hendenan aki ta purba mata Hesus?

Si ta ku bo e kos ei a pasa, abo lo a bai bèk serka e hendenan ei pa papia ku nan di Dios?— Lo bo mester tin kurashi, no?— Wèl, rònt di un aña despues, Hesus a bai Nazaret bèk tòg. Beibel ta bisa: “El a kuminsá siña nan den nan snoa.” Miedu di hende ku no ta stima Dios no a pone Hesus stòp di papia e bèrdat.—Mateo 13:54.

Un otro dia, riba un sabat, Hesus tabata na un snoa kaminda tabatin un hòmber ku un man seku, esta, un man mankaron. Hesus tabatin poder di Dios pa kura e hòmber. Pero un par di  hende ku tabata einan a purba hinka Hesus den problema. Kiko e Gran Maestro a hasi?— Promé el a puntra: ‘Si un di boso karnénan kai den un pos riba sabat, boso ta sak’é?’

Sí, nan tabata yuda karné asta riba sabat, e dia ku nan mester a sosegá. P’esei Hesus a bisa nan: ‘Yuda un hende riba sabat ta asta mas mihó, pasobra un hende bal mas ku un karné!’ P’esei, tur hende por a mira ku Hesus mester a yuda e hòmber dor di kur’é!

Hesus a manda e hòmber rèk su man, i mesora e man a kura. Esta kontentu e hòmber a keda! Pero, kiko a para di e otro hòmbernan? Nan tambe a keda kontentu?— Nò. Nan a haña asta mas rabia riba Hesus. Nan a sali for di e snoa i kuminsá traha plan pa mat’é!—Mateo 12:9-14.

Awendia tambe ta asina. Ni maske kiko nos hasi, nunka nos no por tene tur hende kontentu. P’esei nos tin ku disidí ta ken nos ke hasi kontentu. Si ta Yehova Dios i su Yu Hesukristu nos ke pa keda kontentu ku nos, anto semper nos mester hasi loke nan ta siña nos. Pero si nos hasi Yehova i Hesus kontentu, ken ta haña rabia riba nos? Ken ta bai purba stroba nos di hasi bon?—

Sí, Satanas e Diabel. Pero ken mas lo purba stroba nos?— Hende ku Diabel a gaña pa nan kere kos robes. Hesus a bisa e lidernan religioso di su tempu: “Boso ta di boso tata e Diabel, i boso kier hasi e deseonan di boso tata.”—Juan 8:44.

Tin hopi hende ku Diabel ta gusta. Hesus ta yama nan “mundu.” Ta kiko Hesus tabata kier men ku “mundu”?— Wèl, laga nos wak Juan kapítulo 15, versíkulo 19 pa nos komprondé. Ei nos por lesa ku Hesus a bisa: “Si boso tabata di mundu, mundu lo a stima loke ta di dje; ma pasobra boso no ta di mundu, ma ami a skohe boso for di den mundu, p’esei mundu ta odia boso.”

 Kier men, e mundu ku ta odia e disipelnan di Hesus ta tur e hendenan ku no ta su siguidónan. Ma dikon mundu ta odia e disipelnan di Hesus?— Pensa un ratu. Ta ken ta manda riba mundu?— Beibel ta bisa: “Henter mundu ta bou di kontròl di e malbado.” E malbado ei ta Satanas e Diabel.—1 Juan 5:19.

B’a mira awor dikon ta asina difísil pa hasi bon?— Ta Satanas ku su mundu ta hasié difísil. Pero tin un kos mas. Bo ta kòrda ta kiko e ta?— Na Kapítulo 23 di e buki aki nos a siña ku nos tur a nase ku piká. Bo no ta kere ku lo ta dushi dia ku ni piká, ni Diabel ni su mundu no ta eksistí mas?—

Beibel ta primintí ku “e mundu ta pasa bai.” Esei kier men ku tur hende ku no ta siguidó di e Gran Maestro lo no eksistí mas. Dios no ta bai laga nan biba pa semper. Bo sa ken sí ta bai biba pa semper?— Beibel ta sigui bisa: “Esun ku hasi e boluntat di Dios ta permanesé pa semper.” (1 Juan 2:17) Sí, ta solamente hende ku ta hasi bon, hende ku ta hasi “e boluntat di Dios,” lo biba pa semper den e mundu nobo di Dios. P’esei, maske ta difísil, tòg nos ke hasi bon, no ta bèrdat?—

Ora e mundu aki pasa bai, kiko lo para di hende ku ta hasi bon?

Laga nos lesa huntu un par di teksto ku ta mustra dikon no ta fásil pa hasi bon: Mateo 7:13, 14; Lukas 13:23, 24 i Echonan 14:21, 22.