Bai na kontenido

Bai na kontenido

 KAPÍTULO 22

Pakiko Nos No Mester Gaña

Pakiko Nos No Mester Gaña

LAGA nos bisa ku un mucha muhé ta bisa su mama: “Sí, mi ta bin kas asina skol kaba.” Ma e no ta bai kas. E ta keda skol pa hunga ku su amiganan, anto despues e ta bisa su mama: “Mi yùfrou a pone mi keda skol.” Ta bon pa bisa un kos asina?—

Ki malu e mucha aki a hasi?

Òf, laga nos bisa ku un mucha hòmber ta bisa su tata: “Nò, mi no a skòp bala den kas.” Pero kiko awor si el a hasié tòg? Ta malu si e bisa ku e no a hasié?—

E Gran Maestro a mustra nos kiko ta bon pa hasi. El a bisa: ‘Laga bo nifiká sí, i bo nò, nò; pasobra kualkier otro kos ta bini di e malbado.’ (Mateo 5:37) Kiko Hesus tabata kier men?— E tabata kier men ku nos mester hasi loke nos bisa.

Tin un historia den Beibel ku ta mustra kon importante ta pa nos papia bèrdat. E ta tokante dos hende ku a bisa ku nan ta disipel di Hesus. Laga nos ban wak kiko a pasa.

 Ménos ku dos luna despues ku Hesus a muri, hopi hende di lugánan leu a bini Yerusalèm pa un fiesta importante di e hudiunan. E fiesta aki yama Pentekòste. Riba e dia ei apòstel Pedro a duna un diskurso masha bon mes pa siña e hendenan tokante Hesus, kende Yehova a lanta for di morto. Esei tabata e promé bes ku hopi di e hendenan ku a bini Yerusalèm a tende di Hesus. Awor nan tabata ke sa mas. Kiko nan a hasi?

Nan a keda mas tantu ku nan a plania. Pero despues di un par di dia, plaka a kaba ku algun di nan, i nan tabatin mester di yudansa pa nan por a kumpra kuminda. E disipelnan di Yerusalèm kier a yuda e bishitantenan aki. P’esei, hopi di nan a bende kos ku nan tabatin, anto trese e plaka serka e apòstelnan di Hesus. E ora ei e apòstelnan tabata parti e plaka pa e hendenan ku tabatin mester di yudansa.

Ananias ku su kasá Safira tabata di e kongregashon kristian di Yerusalèm, i nan a bende un tereno ku nan tabatin. Niun hende no a bisa nan bend’é. Ta nan mes a disidí di hasié. Pero  nan no a hasié pasobra nan stima e disipelnan nobo di Hesus. Nò, Ananias ku Safira kier a pone hende kere ku nan ta mas bon hende ku loke nan ta. P’esei, nan a disidí pa bisa ku ta tur e plaka ku nan a haña nan a duna pa yuda hende. Pero ta un parti di e sèn so nan a duna. Kon bo ta haña e kos ei?—

Awèl, manera nan a disidí, Ananias a bai serka e apòstelnan anto a duna nan e sèn. Pero, di mes, Dios sí tabata sa ku e no a duna nan tur e sèn. P’esei Dios a laga apòstel Pedro sa ku Ananias no a papia bèrdat.

Kiko Ananias ta gaña Pedro?

E ora ei Pedro a bis’é: ‘Ananias, pakiko bo a laga Satanas pone bo hasi e kos aki? Ta di bo e tereno tabata. Bo no tabatin nodi bend’é. I asta ora bo a kaba di bende e tereno, ta abo mes por a disidí kiko pa hasi ku e sèn. Pero pakiko bo ta hasi manera kos ku bo ta duna tur e sèn, si ta un parti di dje so bo ta duna? No ta nos so bo a gaña. Bo a gaña Dios tambe.’

Bo a mira kon grave e asuntu ta? Ananias a gaña! E no a hasi loke el a bisa. El a djis gaña hasié. Beibel ta konta nos kiko a pasa despues. E ta bisa: ‘Ora Ananias a tende loke Pedro a bisa, el a kita kai muri.’ Dios a pone Ananias kai muri! Despues nan a karga su kurpa hiba pafó, anto nan a der’é.

Kiko ta pasa ku Ananias dor ku el a gaña?

 Un tres ora despues, Safira a yega. E no tabata sa loke a pasa ku su kasá. P’esei, Pedro a puntr’é: ‘Ta e sèn ku boso dos a duna nos ta loke boso a haña pa e tereno ora boso a bend’é?’

Safira a kontestá: ‘Sí, ta pa presis e preis ei nos a bende e tereno.’ Pero ta gaña el a gaña! Nan a keda ku un parti di e sèn ku nan a haña pa e tereno. P’esei, Dios a pone Safira tambe kai muri.—Echonan 5:1-11.

Kiko nos mester siña for di loke a pasa ku Ananias i Safira?— Nos ta siña ku Dios no gusta hende gañadó. E ke pa semper nos papia bèrdat. Pero hopi hende ta bisa ku no ta nada si bo gaña. Bo ta kere ku e hendenan ei tin rason?— Bo tabata sa ku ta dor di un mentira tur malesa, doló i morto na mundu a kuminsá?—

Segun Hesus, ta ken a bisa e promé mentira, i kiko esei a hiba na dje?

Kòrda ku Diabel a gaña Eva, e promé hende muhé. El a bisa Eva ku lo e no muri si e desobedesé Dios i kome e fruta ku Dios a bis’é pa no kome. Eva a kere Diabel i el a kome e fruta. El a pone ku Adam tambe a kom’é. E ora ei nan a bira pekadó, i tur nan yunan tambe a nase pekadó. I dor ku tur Adam su yunan tabata pekadó, nan tur a sufri i muri. Kon tur e problemanan aki a kuminsá?— Nan a kuminsá ku un mentira.

No ta nada straño ku Hesus a yama Diabel “un gañadó i e tata di mentira”! E tabata e promé persona ku a gaña. Ora un hende gaña, e ta hasi un kos ku Diabel a hasi promé. Nos mester kòrda e kos ei ki ora ku nos sinti nos tentá pa gaña.—Juan 8:44.

 Ki ora bo sa sinti bo tentá pa gaña?— No ta ora bo a hasi malu?— Kisas bo a kibra un kos sin ku bo por a yuda. Si nan puntra bo ta ken a hasié, kiko bo mester bisa? Bo mester bisa ku ta un di bo rumannan a hasié? Bo mester hasi manera kos ku bo no sa ta kiko a pasa?—

Ki ora lo bo por sinti bo tentá pa gaña?

I si bo tabatin hùiswèrk pa hasi anto bo no a kab’é, bo mester bisa ku bo a kab’é maske no ta asina?— Nos mester kòrda e historia di Ananias ku Safira. Nan no a papia bèrdat, pasobra nan no a bisa tur kos. I Dios a mustra ku loke nan a hasi ta hopi malu, pasobra el a pone nan kai muri.

P’esei, ni maske kiko nos hasi, si nos gaña, ta pió so kos ta bira. I nos no mester ni sikiera papia mitar bèrdat so. Beibel ta bisa: “Papia bèrdat.” Tambe e ta bisa: “No gaña otro.” Yehova ta papia bèrdat semper, i e ke pa nos hasi meskos.—Efesionan 4:25; Kolosensenan 3:9.

Nos tin ku papia bèrdat semper. Esei e tekstonan aki ta mustra: Eksodo 20:16; Proverbionan 6:16-19; 12:19; 14:5; 16:6 i Hebreonan 4:13.