Karta di Santiago 4:1-17

  • Bo no mester tin amistat ku mundu (1-12)

    • Resistí Diabel (7)

    • Hala serka Dios (8)

  • Nos no mester ta orguyoso (13-17)

    • “Si Yehova ke” (15)

4  Kon bini tin bringamentu i pleitamentu entre boso? No ta boso deseonan karnal, ku ta lucha kontra boso pa dominá boso, ta pone ku boso ta hasi e kosnan ei?+ 2  Boso ta deseá hopi kos. Tòg, boso no tin loke boso ta deseá. Boso ta sigui odia* otro i kudishá loke otro hende tin. Tòg, boso no ta haña loke boso ta deseá. Boso ta sigui pleita i bringa.+ Boso no ta haña loke boso ta deseá, pasobra boso no ta pidi Dios. 3  Te na ora ku boso pidi algu mes, boso lo no haña loke boso ta deseá, pasobra boso ta pidi ku mal intenshon. Loke boso ta pidi boso ta pidi pa satisfasé boso deseonan karnal. 4  Boso ku ta infiel,* boso no sa ku amistat ku mundu ta nifiká enemistat ku Dios? Ken ku ke ta amigu di mundu ta hasi su mes enemigu di Dios.+ 5  Boso ta kere ku ta pòrnada Skritura ta bisa: “Nos ta anhelá diferente kos, pasobra nos tin e tendensia di envidiá otro”?+ 6  Sinembargo, Dios ta masha bondadoso ku nos, i e ta yuda nos resistí mal deseo. Skritura ta bisa: “Dios no ta gusta hende orguyoso.+ Dios ta mustra bondat inmeresí na hende humilde.”+ 7  P’esei, obedesé* Dios.+ Resistí Diabel,+ i lo e hui bai for di boso.+ 8  Hala serka Dios, i lo e hala serka boso.+ Boso tur ku ta pekadó,+ hasi boso mannan limpi. Boso ku ta indesiso, purifiká boso kurason.+ 9  Sea tristu, yora i lamentá.+ Yora na lugá di hari; sea tristu na lugá di alegrá. 10  Humiá boso mes den bista di Yehova,*+ i lo e halsa boso.+ 11  Rumannan, stòp di papia malu di otro.+ Si boso ta papia malu di un ruman òf si boso ta husga boso rumannan, boso ta kritikando lei i kondenando lei. Si boso ta kondená lei, boso no ta hende ku ta kumpli ku lei. Mas bien, boso ta hues. 12  Ta Dios so ta Legisladó i Hues.+ E so por salba hende, i e so por destruí hende.+ P’esei, ken abo ta pa husga bo próhimo?+ 13  Algun di boso ta bisa: “Awe òf mañan, nos lo biaha bai tal i tal stat i keda un aña ayanan. Nos lo hasi negoshi i gana plaka.”+ 14  Sinembargo, boso no sa kon boso bida lo ta mañan.+ Boso ta manera neblina ku ta aparesé pa un ratu i disparsé despues.+ 15  Mihó boso bisa: “Si Yehova* ke,+ nos lo ta na bida i nos lo hasi esaki òf esaya.” 16  Boso ta kana broma tokante boso mes, i boso ta sinti boso mes masha orguyoso ora boso ta hasi esei. E bromamentu ei no ta bon. 17  Si un hende sa kiko ta korekto pa hasi i e no ta hasi esei, e ta kometiendo piká.+

Nota

^ Lit.: “mata.” Wak 1Hn 3:15.
^ Lit.: “Adúlteronan.” Den e kaso akí, “adúlteronan” ta referí na hende infiel na Dios.
^ Lit.: “someté boso mes na.”

Derecho di outor pa e publikashon akí