Bai na kontenido

Bai na kontenido

 KAPÍTULO 41

Muchanan Ku Ta Hasi Dios Kontentu

Muchanan Ku Ta Hasi Dios Kontentu

KUA mucha na mundu bo ta kere ku a hasi Yehova mas kontentu ku tur?— Sí, su Yu Hesus. Laga nos papia riba algun kos ku Hesus a hasi pa hasi su Tata den shelu bira kontentu.

For di kaminda e famia di Hesus tabata biba, bo mester a kana tres dia pa yega Yerusalèm, kaminda e tèmpel bunita di Yehova tabata. Hesus a yama e tèmpel ei “e kas di mi Tata.” E ku su famia tabata bai n’e tèmpel tur aña pa selebrá Pasku Hudiu.

Un dje biahanan ei, tempu ku Hesus tabatin 12 aña, su famia a kuminsá kana bai kas bèk despues di Pasku Hudiu. Ma ta te ora ku nan a para un kaminda pa pasa anochi nan a bin ripará ku nan no por a haña Hesus. E no tabata serka nan amigunan ni nan famianan. Mesora Maria ku Hosé a bai Yerusalèm bèk pa buska Hesus. Unda bo ta kere ku e tabata?—

Nan a haña Hesus den tèmpel. E tabata skucha e maestronan i puntra nan kos. I ora nan puntr’é algu, semper e por a kontestá nan. Nan a keda asombrá di kon bon e por a kontestá nan. B’a mira dikon Dios tabata kontentu ku su Yu?—

Di mes, Maria ku Hosé a keda hopi mas trankil ora ku porfin nan a bin haña Hesus. Pero Hesus sí no tabata spantá. E tabata sa ku e tèmpel ta un bon lugá, un lugá sigur. P’esei el a puntra nan: “Boso no tabata sa ku mi mester tabata den e kas di mi Tata?” E tabata sa ku e tèmpel ta kas di Dios, i e tabata gusta ta den dje.

 Despues, Maria ku Hosé a bai nan kas na Nazarèt bèk ku Hesus, ku tabatin 12 aña. Kon bo ta kere ku Hesus a komportá su mes ku Maria i Hosé?— Wèl, Beibel ta bisa ku el a “keda sometí na nan.” Kiko bo ta kere ku e kos ei kier men?— E kier men ku el a keda obedesé nan. Sí, el a hasi tur kos ku Maria ku Hosé a bis’é, asta ora nan mand’é saka awa for di pos òf algu asina.—Lukas 2:41-52.

Kon Hesus a hasi Dios kontentu tempu ku e tabata mucha?

Awor, pensa riba esaki: Hesus tabata perfekto, i tòg el a obedesé Maria ku Hosé ounke nan tabata imperfekto. Esei a hasi Dios kontentu?— Sigur ku sí, pasobra e Palabra di Dios ta bisa mucha: “Obedesé boso mayornan.” (Efesionan 6:1) Si bo obedesé bo mayornan meskos ku Hesus a hasi, abo tambe lo hasi Dios kontentu.

Otro manera ku bo por hasi Dios kontentu ta dor di papia ku otro hende tokante dje. Tin hende ta bisa ku e kos ei no ta kos pa mucha hasi. Pero un biaha ku hende a purba stòp algun mucha hòmber di hasi esei, Hesus a bisa: ‘Boso no a lesa nunka ku e  Skritura ta bisa: “For di boka di mucha chikitu Dios ta prepará alabansa pa su mes”?’ (Mateo 21:16) Kier men antó, ku si di bèrdat nos ke, nos tur por papia ku hende tokante Yehova i bisa nan kon bon Dios ta. I si nos hasi asina, nos lo hasi Dios kontentu.

Unda nos por siña kos di Dios pa nos por konta hende?— Den nos studio di Beibel na kas. Pero nos ta siña mas n’e lugá kaminda e pueblo di Dios ta bini huntu pa studia. Pero kon nos por sa si sierto hendenan ta di Dios su pueblo òf nò?—

Wèl, puntra bo mes: Kiko nan ta hasi na nan reunionnan? E kosnan ku nan ta siña ta pará skirbí den Beibel di bèrdat? Nan ta lesa Beibel i papia tokante dje? Ta asina nos ta skucha Dios. Òf nò?— Awèl, lo bo spera ku na un reunion kristian hende ta papia kos ku Dios ta bisa. Bo no ta kere?— Pero awor, kiko bo ta pensa si un hende bisa bo ku bo no tin nodi biba manera Beibel ta bisa? Lo bo pensa ku un hende asina ta di e pueblo di Dios?—

Ata un otro kos aki pa bo pensa ariba. Beibel ta bisa ku e pueblo di Dios mester ta “un pueblo pa su nòmber.” (Echonan 15:14) Ya ku nos sa ku Dios su nòmber ta Yehova, nos por puntra e hende si Yehova ta su Dios. Si e bisa ku nò, e ora ei nos sa ku e no ta di e pueblo di Dios. Lo bo spera ku e pueblo di Dios ta papia ku otro hende tokante e Reino di Dios tambe. I lo bo spera pa nan mustra ku nan ta stima Dios, dor di kumpli ku su mandamentunan.—1 Juan 5:3.

Si bo konosé hende ku ta hasi tur e kosnan aki, anto bo mester reuní ku nan pa adorá Dios. Bo mester paga bon tinu na e reunionnan aki, anto duna kontesta ora nan hasi pregunta. Esei ta loke Hesus a hasi ora e tabata den kas di Dios. I si bo hasi e kosnan ei, abo lo hasi Dios kontentu, meskos ku Hesus.

 Bo por bisa mi kua mucha mas den Beibel a hasi Dios kontentu?— Timoteo ta un bunita ehèmpel. Su tata no tabata kere den Yehova. Pero su mama Eunise sí, i su wela Loida tambe. Timoteo a skucha nan, i asina el a siña tokante Yehova.

Maske su tata no tabata kere den Yehova, kiko Timoteo kier a hasi?

Ora Timoteo a bira grandi, apòstel Pablo a bishita e pueblo kaminda e tabata biba. Pablo a ripará kuantu gana Timoteo tabatin di sirbi Yehova. P’esei, el a invitá Timoteo pa bai kuné p’e hasi mas den Yehova su sirbishi. Unda ku nan a bai, nan tabata konta hende tokante e Reino di Dios i tokante Hesus.—Echonan 16:1-5; 2 Timoteo 1:5; 3:14, 15.

Pero, ta mucha hòmber so Beibel ta bisa ku a hasi Dios kontentu?— Sigur ku nò. Wak kon un mucha muhé israelita tambe a hasi Dios kontentu. Den e tempu ku e mucha muhé ei a biba, e nashon ku yama Siria i e nashon di Israel tabata enemigu di otro. Un dia e hendenan di Siria a bringa ku Israel, anto nan a bai ku e mucha muhé komo katibu. Nan a mand’é kas di e  kapitan di ehérsito, un hòmber ku yama Naaman, anto el a bira kriá di Naaman su kasá.

Awor, Naaman tabatin un malesa ku yama lepra. Niun dòkter no por a yud’é. Pero e mucha muhé di Israel tabatin sigur ku un profeta, un di e sirbidónan spesial di Dios, sí por a yuda Naaman. Di mes, Naaman ku su kasá no tabata adorá Yehova. Bo ta kere ku e mucha muhé mester a bisa nan e kos ku e tabata sa? Kiko abo lo a hasi?—

Kon e mucha muhé israelita aki a hasi Dios kontentu?

Wèl, e mucha muhé a bisa: ‘Mare Naaman por a bai serka e profeta di Yehova na Israel. Si Naaman hasi asina, su lepra lo kura.’ Naaman a tende di e mucha muhé i el a bai serka e profeta di Yehova. I ora el a hasi manera e profeta a bis’é, el a kura. Dor di esei Naaman a bira un adoradó di e Dios berdadero.—2 Reinan 5:1-15.

Abo ke yuda un hende siña tokante Yehova i tokante loke Yehova por hasi, meskos ku e mucha muhé?— Ken asina bo por yuda?— Por ta masha bon ku na kuminsamentu nan ta pensa ku nan no tin mester di yudansa. Pero bo por papia ku nan tokante e kosnan bon ku Yehova ta hasi. Kisas nan lo skucha. Bo por tin sigur ku e kos ei lo hasi Dios kontentu.

E siguiente tekstonan aki tambe ta animá hóbennan pa nan disfrutá di sirbi Dios: Salmo 122:1; 148:12, 13; Eklesiastés 12:1; 1 Timoteo 4:12 i Hebreonan 10:23-25.