Bai na kontenido

Bai na kontenido

 KAPÍTULO 7

Obedensia Ta Skapa Bo

Obedensia Ta Skapa Bo

LO BO gusta si bo por a hasi tur loke bo ke? Tin biaha, bo no sa pensa: ‘Mare nunka niun hende no tin ku bisa mi kiko pa hasi’? Bisa mi di bèrdat-bèrdat kiko bo ta pensa.—

Pakiko bo mester tende di hende mas grandi ku bo?

Pero kiko ta mihó pa bo? Di bèrdat ta sabí pa bo hasi tur loke bo ke? Òf kos ta bai bo mihó ora bo hasi loke bo tata ku bo mama bisa bo?— Dios ta bisa ku bo mester obedesé bo mayornan, esta, hasi loke nan bisa bo. I si Dios bisa bo ku bo mester obedesé, mester tin un bon motibu. Laga nos wak si nos por saka afó kiko ta e motibu.

Kuantu aña bo tin?— Bo sa kuantu aña bo tata tin?— Kuantu aña bo mama, bo wela òf bo tawela tin?— Nan a biba hopi mas tantu tempu ku bo. I mas un hende biba, mas tantu tempu e tin pa siña kos. E ta tende mas tantu kos, mira mas tantu kos i hasi mas tantu kos kada aña ku pasa. P’esei hende yòn por siña for di hende mas grandi.

Bo konosé un mucha ku ta mas chikitu ku bo?— Ken sa mas tantu kos, abo òf e?— Dikon abo sa mas kos kuné?— Dor ku abo a biba mas tantu tempu. Bo tabatin mas tempu kuné pa siña kos.

 Anto ta ken a biba mas tantu tempu ku abo, ami i tur otro hende?— Sí, Yehova Dios. E sa mas ku abo, i e sa mas ku ami. Ora e bisa nos pa hasi un kos, nos por tin sigur ku e kos ei ta bon, asta ora ta un kos difísil. Bo tabata sa ku un biaha asta e Gran Maestro a haña ku ta difísil pa e hasi loke Dios a bis’é?—

Un biaha Dios a pidi Hesus hasi un kos hopi difísil. Hesus a resa na Dios tokante e kos ei, manera nos ta mira aki. El a bisa Dios: “Si ta bo boluntat, kita e kopa aki for di mi.” Dor di pidi e kos aki, Hesus a mustra ku no semper ta fásil pa hasi loke Dios ke. Pero kon Hesus a kaba su orashon? Abo sa?—

Kiko e orashon di Hesus ta siña nos?

Hesus a kab’é bisando: ‘No laga mi boluntat, ma di bo sosodé.’ (Lukas 22:41, 42) Sí, e tabata ke pa Dios su boluntat sosodé, no su mes boluntat. E ora ei el a dal bai i hasi loke Dios tabata ke, no loke é a pensa ku lo ta mihó.

Kiko e kos aki ta siña nos?— Nos ta siña ku semper ta korekto pa hasi loke Dios ta bisa, asta ora no ta fásil. Pero nos ta siña un kos mas tambe. Bo sa ta kiko?— Nos ta siña ku Dios i Hesus no ta e mesun persona, manera tin hende ta bisa. Yehova Dios ta mas bieu ku su Yu Hesus, i e sa mas tantu kos ku Hesus.

Ora nos obedesé Dios nos ta mustra ku nos ta stim’é. Beibel ta bisa: ‘Esaki ta loke e amor di Dios ta nifiká, ku nos ta kumpli ku su mandamentunan.’ (1 Juan 5:3) Manera bo mes por mira, nos tur tin ku obedesé Dios. Abo tambe ke obedes’é. Òf nò?—

 Laga nos kohe nos Beibel i wak kiko Dios ta manda mucha hasi. Nos ta bai lesa loke Beibel ta bisa na Efesionan kapítulo 6, versíkulo 1, 2 i 3. E ta bisa: “Yunan, obedesé boso mayornan den Señor, pasobra esaki ta hustu. Onra bo tata i bo mama (ku ta e promé mandamentu ku un promesa) pa bai bo bon i pa bo tin bida largu riba tera.”

B’a mira? Ta Yehova Dios mes ta bisa bo pa bo obedesé bo tata ku bo mama. Kiko kier men “onra” nan? E kier men ku bo mester respetá nan. Anto Dios ta primintí ku si bo obedesé bo mayornan, lo “bai bo bon.”

Laga mi konta bo historia di un par di hende ku a skapa nan bida pasobra nan a obedesé. Nan a biba hopi tempu pasá na un stat grandi ku yama Yerusalèm. Mayoria di e hendenan den e stat ei no tabata hasi loke Dios bisa. P’esei Hesus a spièrta nan ku Dios tabata bai laga destruí nan stat. Tambe Hesus a bisa nan kon nan por a skapa si nan a stima loke ta bon. El a bisa nan: ‘Ora boso mira Yerusalèm rondoná dor di ehérsitonan, boso lo sa ku su destrukshon ta yegando serka. E ora ei lo ta tempu pa boso sali bai laga Yerusalèm, anto hui bai na e serunan.’—Lukas 21:20-22.

Kon obedensia na loke Hesus a manda a skapa e hendenan aki?

Anto nèt manera Hesus a bisa, asina a sosodé. Un ehérsito di sòldá a bin ataká Yerusalèm. E ehérsito di Roma a pone nan tèntnan tur rònt dje stat. E ora ei, pa un motibu òf otro, e sòldánan a bai. Mayoria dje hendenan a kere ku e peliger a pasa kaba, anto nan a keda den e stat. Pero kiko Hesus a bisa ku nan mester a hasi?— Kiko abo lo a hasi si bo tabata biba na Yerusalèm?— E hendenan ku di bèrdat a kere Hesus a bai laga nan kas i a hui bai den seru, leu for di Yerusalèm.

Henter un aña a pasa, i nada no a sosodé ku Yerusalèm. Dos aña a pasa, i nada no a sosodé. I e di tres aña, tampoko nada no a  pasa. Kisas hende lo a pensa ku esnan ku a bai laga e stat tabata bobo. Pero e di kuater aña, e sòldánan di Roma a bini bèk. Nan a bolbe pone nan tèntnan tur rònt di Yerusalèm. Awor tabata muchu lat pa e hendenan hui bai. E biaha aki e sòldánan a destruí e stat. Kasi tur hende den e stat a muri, anto e sòldánan a hiba esnan ku a keda bibu komo katibu.

Pero kiko a pasa ku e hendenan ku a obedesé Hesus?— Nan sí a skapa. Nan tabata leu for di Yerusalèm. P’esei nada no a pasa nan. Obedensia a skapa nan.

Si bo obedesé, esei lo skapa abo tambe?— Kisas bo mayornan ta bisa bo pa nunka no hunga riba kaya. Pakiko nan ta bisa bo e kos ei?— Pasobra outo por dal bo. Awor, un dia bo por bisa: ‘Pero aworakí no tin niun outo riba kaya. Nada no ta bai pasa mi. Otro  mucha sí ta hunga riba kaya, i nunka mi no a mira nada pasa ku nan.’

Pakiko bo mester obedesé asta ora bo no ta mira niun peliger?

Ta asina kasi tur hende na Yerusalèm a pensa. Ora e sòldánan romano a bai, a parse ku no tabatin peliger mas. Tabatin otro hende ku tambe a keda den e stat. P’esei, nan tambe a disidí di keda. Hesus a spièrta nan, pero nan no a skucha. Dor di esei nan a pèrdè nan bida.

Laga nos wak un otro ehèmpel. Bo a yega di hunga ku lusafè?— Por parse prèt pa sende un lusafè anto wak e kandela. Pero hunga ku lusafè por ta peligroso. Henter e kas por kima, anto bo por muri tambe!

Kòrda ku obedesé de bes en kuando so no ta basta. Pero si bo obedesé tur ora, esei lo skapa bo sigur. Anto ta ken atrobe ta bisa nos: “Yunan, obedesé boso mayornan”?— Sí, Dios. I kòrda ku ta pasobra e ta stima bo e ta bisa bo e kos ei.

Awor, lesa e siguiente tekstonan. Nan ta mustra kon importante ta pa nos obedesé: Proverbionan 23:22; Eklesiastés 12:13; Isaias 48:17, 18 i Kolosensenan 3:20.