Bai na kontenido

Bai na kontenido

 KAPÍTULO 12

Hesus Ta Siña Nos Hasi Orashon

Hesus Ta Siña Nos Hasi Orashon

ABO sa papia ku Yehova Dios?— E ke pa bo papia kuné. Papia ku Dios ta loke nos ta yama hasi orashon, òf resa. Tur ora Hesus tabata papia ku su Tata na shelu. Tin bes e tabata ke ta su so p’e papia ku Dios. Beibel ta bisa ku un biaha “e so a subi bai riba seru pa hasi orashon. I ora anochi a sera, e tabata su so ayanan.”—Mateo 14:23.

Unda abo por bai pa bo resa bo so na Yehova?— Kisas anochi promé ku bo drumi bo por ta bo so pa papia ku Yehova. Hesus a bisa: “Ora bo ta hasi orashon, bai den bo kamber di mas paden, i ora bo a sera bo porta, hasi orashon na bo Tata.” (Mateo 6:6) Bo ta hasi orashon na Yehova tur anochi promé ku bo drumi?— Ta importante pa bo hasié.

Hesus a hasi orashon ora e tabata su so . . . i ora e tabata ku mas hende

Hesus a hasi orashon ora tabatin mas hende huntu kuné tambe. Ora su amigu Lázaro a muri, Hesus a  hasi orashon huntu ku mas hende n’e lugá kaminda Lázaro tabata derá. (Juan 11:41, 42) Ora Hesus tabata reuní ku su disipelnan tambe e tabata hasi orashon. Abo sa bai reunionnan kaminda nan ta hasi orashon?— Na reunion, hopi bes ta un hende grandi ta hasi orashon. Paga bon tinu kiko e ta bisa, pasobra ta pa abo e ta papiando ku Dios. Si bo skucha bon, e ora ei bo por bisa “Amèn” ora e kaba. Bo sa kiko kier men ora bo bisa “Amèn” despues di un orashon?— Esei kier men ku bo a gusta e orashon. E kier men ku bo ta di akuerdo kuné, i ku bo ke pa e orashon ta di bo tambe.

Dikon bo mester paga bon tinu ora nan ta hasi orashon na reunion?

Hesus tabata hasi orashon ora di kome tambe. E tabata gradisí Yehova pa su kuminda. Abo ta hasi orashon semper promé ku bo kome bo kuminda?— Ta bon pa nos gradisí Yehova pa e kuminda promé ku nos kuminsá kome. Ora boso ta kome huntu, kisas ta un otro hende ta hasi orashon. Pero kiko bo ta hasi si bo ta kome sin otro hende huntu ku bo? Òf, kiko bo tin ku hasi si e otro hendenan ku ta kome ku bo no ta gradisí Yehova?— E ora ei bo mes tin ku hasi bo orashon.

Semper bo mester hasi orashon na bos haltu? Òf Yehova por tende bo asta si bo hasi orashon den bo mes?— Nos por haña sa dor di wak kiko a pasa ku Nehemias. Nehemias tabata un adoradó  di Yehova ku tabata traha na palasio di Artaherhes, un rei di Persia. Un dia Nehemias a bira hopi tristu dor ku el a tende ku e murayanan di Yerusalèm, e stat prinsipal di su pueblo, tabata kibrá.

Ki ora bo por hasi un orashon den bo mes, manera Nehemias a hasi?

Ora e rei a puntra Nehemias dikon e tabata tristu, Nehemias a hasi un orashon den su mes promé. E ora ei Nehemias a bisa e rei dikon e tabata tristu, anto el a pidié p’e por a bai Yerusalèm pa lanta e murayanan bèk. Anto kiko a sosodé?—

Sí, Dios a kontestá e orashon di Nehemias. E rei a bis’é ku e tabatin mag di bai! E rei a asta duna Nehemias hopi palu pa lanta e murayanan kuné. Kier men ku di bèrdat Dios por kontestá nos orashonnan, asta ora nos resa den nos mes.—Nehemias 1:2, 3; 2:4-8.

Awor, ban papia riba un otro kos  ku tin di haber ku orashon. Bo mester baha kabes pa hasi orashon? Bo mester hinka rudia? Kiko bo ta kere?— Tin bes Hesus a hinka rudia pa e hasi orashon. Pero tin otro biahanan ku el a lanta para tambe. I tin bes el a hisa su kara na shelu ora e tabata resa, manera e biaha ku el a resa pa Lázaro.

Kiko esaki ta laga nos komprondé antó?— Sí, esei ta mustra ku bo posishon di kurpa no ta dje importante ei. Tin biaha ta bon pa bo baha kabes i sera wowo. I tin bes kisas asta lo bo ke hinka rudia, manera Hesus a yega di hasi. Pero kòrda ku nos por resa na Dios tur ora, di dia òf anochi, i lo e skucha nos. E kos di mas importante ta ku ora nos hasi orashon nos mester sinti nos sigur ku Yehova ta skucha nos. Abo ta sigur ku Yehova ta skucha bo orashonnan?—

Tokante kiko bo por papia ku Dios den orashon?

Kiko nos mester bisa Yehova den orashon?— Konta mi: Kiko bo ta papia ku Dios ora bo ta hasi orashon?— Yehova ta duna nos hopi kos bon, i ta bon pa nos gradisié pa nan, bo no ta kere?— Nos por yam’é danki p’e kuminda ku nos ta kome. Pero bo a yega di gradisié pa e shelu blou, e palunan bèrdè i e flornan bunita?— Ta Dios a traha nan tambe.

Un dia Hesus su disipelnan a pidié p’e siña nan hasi orashon. E Gran Maestro a siña nan; el a mustra nan kiko ta e kosnan mas importante pa pidi p’e. Bo sa kiko nan ta?— Kohe bo Beibel, anto habrié na Mateo kapítulo  6. Na versíkulo 9 te ku 13 nos ta haña loke hopi hende ta yama e Orashon di Nos Tata. Laga nos les’é huntu.

Aki Hesus ta siña nos pa nos resa tokante e nòmber di Dios. El a bisa nos pidi pa e nòmber di Dios sea santifiká, esta, pa hende trat’é komo un nòmber santu. Kon Dios su nòmber ta?— Sí, Yehova. Nos mester stima e nòmber ei.

Na di dos lugá, Hesus a siña nos resa pa e Reino di Dios bini. E Reino aki ta importante, pasobra e ta bai trese pas na tera i hasi tera bira un paradeis.

Na di tres lugá, e Gran Maestro a bisa ku nos mester pidi pa e boluntat di Dios sosodé na tera meskos ku den shelu. Anto si nos ta resa pa su boluntat sosodé, nos mester hasi loke Dios ke tambe.

Despues di esei Hesus a siña nos pidi pa e kuminda ku nos tin mester pa kada dia. Tambe el a bisa ku ora nos hasi kos ku ta malu, nos mester bisa Dios ku nos ta sinti duele di loke nos a hasi. I nos mester pidi Dios pordoná nos. Pero pa e pordoná nos, nos tambe mester pordoná hende si nan hasi nos algu. Abo ta haña ku ta fásil pa bo pordoná?—

Na final Hesus a bisa ku nos mester pidi Yehova Dios pa e protehá nos kontra e malbado, Satanas e Diabel. Kier men, tur e kosnan aki ta bon kos ku nos por resa na Dios p’e.

Nos mester konfia ku Yehova ta skucha nos orashonnan. I nos no mester pidié yuda nos so. Nos mester sigui gradisié tambe. E ta keda kontentu ora nos ta men e kosnan ku nos ta bis’é den orashon, i ora nos pidié kos korekto. I lo e duna nos loke nos pidié tambe. Abo ta konfia ku lo e hasié?—

Bo por haña mas bon konseho tokante orashon na Romanonan 12:12; 1 Pedro 3:12 i 1 Juan 5:14.