Bai na kontenido

Bai na kontenido

 KAPÍTULO 47

Kon Nos Por Sa Ku Armagedón Ta Serka

Kon Nos Por Sa Ku Armagedón Ta Serka

BO SA kiko un señal ta, tòg?— Na Kapítulo 46 nos a lesa di e señal ku Dios a duna pa nos por sa ku nunka mas e no ta bai kaba ku mundu dor di un diluvio. E apòstelnan tambe a pidi un señal pa nan por a sa ki ora Hesus a bolbe, i ki ora e fin di mundu ta serka.—Mateo 24:3.

Hesus lo tabata invisibel ora e kuminsá goberná den shelu. Dor di esei hende lo tabatin mester di un señal ku nan por a mira, pa nan sa ku el a kuminsá goberná. P’esei Hesus a bisa su disipelnan pa nan paga tinu i mira ki ora sierto kosnan lo sosodé aki na tera. Ora e kosnan ei sosodé, esei lo kier men ku el a bolbe i a kuminsá goberná den shelu komo Rei.

Hesus a siña su disipelnan ku ta hopi importante pa nan keda vigilá. El a bisa nan: “Wak e palu di figu i tur e palunan; asina ku nan ta saka  blachi, boso ta mira esei i lo sa pa boso mes ku awor zomer ta serka.” Hende ta ripará ora zomer ta serka. Ta meskos ku ora bo mira solo baha bo sa ku ta bai bira anochi. Asina tambe, ora bo mira ku e kosnan ku Hesus a papia di dje ta sosodé, bo por sa ku Armagedón ta serka.—Lukas 21:29, 30.

Ki lès Hesus a siña nos ora el a papia tokante e palu di figu?

Riba e página aki i esun despues di dje nos ta bai wak un par di plachi. Riba e plachinan nos por mira e kosnan ku Hesus a bisa ku ta parti di e señal di ku e Reino di Dios ta serka. Ora tur e  kosnan aki pasa, e Reino di Dios ku Kristu komo Gobernante ta bai garna tur otro gobièrnu, manera nos a lesa na Kapítulo 46.

P’esei, paga bon tinu na e plachinan riba e dos páginanan promé ku esun aki, anto nos lo papia riba nan. Na Mateo 24:6-14 i Lukas 21:9-11 bo por lesa tokante e kosnan ku bo ta mira riba e plachinan aki. Anto paga tinu riba e number chikitu ku tin riba kada plachi. Bo ta haña e mesun number ei na kuminsamentu di e paragraf ku ta splika e plachi. Awor, laga nos ban wak si e diferente partinan di e señal ku Hesus a duna ta kumpliendo awendia.

(1) Hesus a bisa: “Boso lo tende di gueranan i rumornan di gueranan; . . . nashon lo lanta kontra nashon, i reino kontra reino.” Abo a yega di tende notisia di guera?— E promé guera mundial a sosodé di 1914 te 1918. Despues a bini Segundo Guera Mundial, di 1939 pa 1945. Nunka promé no a yega di tin un guera mundial! Ma awor tin guera hopi kaminda na mundu. Ta parse manera kos ku ta tur dia nos ta tende òf lesa di guera na televishon, na radio i den korant.

(2) Tambe Hesus a bisa: “Na vários lugá lo tin hamber.” Kisas bo sa ku no ta tur hende tin sufisiente kuminda pa nan kome. Míles di hende ta muri tur dia dor ku nan no tin sufisiente kuminda.

(3) Ademas Hesus a bisa: ‘Lo tin pestilensia na vários lugá.’ Abo sa kiko ta un pestilensia, òf un pèst?— Esei ta un malesa òf enfermedat ku ta mata hopi hende. Malesa di kabouter ta un di e pèstnan hopi grandi ku a yega di tin. El a mata rònt di 20 mion hende, anto den mas o ménos un aña so. Awendia, kasi sigur asta mas tantu hende ta bai muri di AIDS. I tin yen di otro enfermedat, manera kanser i malesa di kurason, ku ta mata míles di hende tur aña.

 (4) Esaki ta un otro parti di e señal ku Hesus a duna: “Na vários lugá lo tin . . . temblor.” Abo sa kiko ta temblor?— Temblor ta ora tera sagudí. Kas ta basha abou, i hopi bes hende ta muri. For di aña 1914 tin hopi temblor tur aña. Abo a yega di tende di temblor?—

(5) Hesus a bisa ku un otro parti di e señal ta ku lo tin ‘mas i mas maldat.’ Ta p’esei tin asina tantu hòrtamentu i violensia. Tur kaminda hende tin miedu pa un hende purba kibra drenta den nan kas. Nunka promé no tabatin asina tantu krímen i violensia na tur parti di mundu manera tin awor.

(6) Hesus a duna un parti hopi importante di e señal ora el a bisa: ‘E bon notisia aki di e reino lo wòrdu prediká den henter mundu komo un testimonio pa tur nashon, i e ora ei e fin lo yega.’ (Mateo 24:14) Si bo ta kere den ‘e bon notisia aki,’ bo mester papia di dje ku otro hende. Asina bo tambe por kumpli ku e parti aki di e señal.

Tin biaha hende ta bisa ku e kosnan ku Hesus a bisa ku lo bai pasa ta kosnan ku semper tabata sosodé kaba. Pero nunka promé tur e kosnan ei no a yega di sosodé na asina tantu parti di mundu, anto pareu. Bo ta komprondé kiko e señal ta mustra nos?— E ta mustra nos ku, si nos mira tur e kosnan aki sosodé, ta falta poko tempu pa e mundu malu aki kaba i pa e mundu nobo di Dios bini na su lugá.

Ora Hesus a duna e señal aki, el a papia di un temporada di aña spesial tambe. El a bisa: “Hasi orashon pa boso huida no sosodé den wenter.” (Mateo 24:20) Kiko bo ta kere ku e tabata kier men?—

Wèl, kiko lo por sosodé si un hende mester skapa di un desaster  den wenter, ora mal wer ta pone ku ta difísil òf asta peligroso pa hende biaha?— Si e logra skapa mes, lo e mester pasa den yen di kos. Lo no ta tristu si un hende muri den un mal tempu di wenter djis pasobra e tabata muchu drùk ku otro kos, anto no a kuminsá su biahe mas promé?—

Ora Hesus a papia tokante skapa den tempu di wenter, ta ki lès el a siña nos?

B’a komprondé kiko Hesus tabata kier men ora el a bisa ku nos no mester warda te ora wenter yega pa nos hui?— El a mustra nos ku, ya ku nos sa ku Armagedón ta serka, no ta bon pa nos tarda pa tuma akshon pa mustra ku nos ta stim’é dor di sirbi Dios. Si nos tarda, por bira muchu lat pa nos sirbié. E ora ei nos lo ta meskos ku e hendenan ku a biba tempu di e gran Diluvio. Nan a tende Noe su spièrtamentu, pero nan no a drenta e arka.

Awor, ban papia riba kon kos lo ta despues ku e gran guera di Armagedón pasa. Nos ta bai siña kiko Dios tin prepará pa nos tur ku ta stim’é i sirbié awor.

E tekstonan aki tambe ta mustra ku Armagedón ta serka: 2 Timoteo 3:1-5 i 2 Pedro 3:3, 4.