Bai na kontenido

Bai na kontenido

 KAPÍTULO 37

Keda Kòrda Yehova i Su Yu

Keda Kòrda Yehova i Su Yu

LAGA nos bisa ku un hende a duna bo un regalo masha spesial mes. Kiko bo ta hasi?— Bo ta djis bis’é danki anto lubidá limpi riba e hende ku a duna bo e regalo? Òf bo ta keda kòrda e hende i e kos ku el a hasi pa bo?—

Yehova Dios a duna nos un regalo masha spesial mes. El a manda su Yu na tera p’e muri pa nos. Bo sa dikon Hesus tabatin ku muri pa nos?— Ta hopi importante pa nos komprondé e kos ei.

Manera nos a siña na Kapítulo 23, Adam a peka dor di kibra e lei perfekto di Dios. Anto nos a haña piká for di Adam, pasobra e ta tata di nos tur. P’esei, kiko bo ta kere ku nos tin mester?— Nos tin mester di un tata nobo, na moda di papia; un tata ku a keda perfekto durante henter su bida riba tera. Ken bo ta kere ku por bira un tata asina pa nos?— Sí, Hesus ta esun ku por.

Yehova a manda Hesus na tera pa e por a bira manera un tata pa nos na lugá di Adam. Beibel ta bisa: “‘E promé hende, Adam, a bira un alma bibu.’ E último Adam a bira un spiritu ku ta duna bida.” Ken tabata e promé Adam?— Sí, esun ku Dios a krea for di stòf di tera. Anto ken ta e di dos Adam?— Esei ta Hesus. Beibel ta mustra ku ta Hesus, pasobra e ta bisa: “E promé hende [Adam] ta di tera, trahá di stòf; e di dos hende [Hesus] ta di shelu.”1 Korintionan 15:45, 47; Génesis 2:7.

Dor ku ta for di shelu Dios a tuma bida di Hesus, anto pon’é den barika di Maria, Hesus no a haña niun piká for di Adam. Ta p’esei Hesus tabata un hende perfekto. (Lukas 1:30-35) Ta p’esei  mes tambe, ora Hesus a nase, un angel a bisa e kuidadónan di karné: “A nase pa boso un Salbadó.” (Lukas 2:11) Pero pa Hesus por a bira nos Salbadó, e mester a hasi algu promé. Bo sa ta kiko?— E mester a krese bira hende grandi, meskos ku Adam tabata. E ora ei Hesus por a bira e ‘di dos Adam.’

Hesus, nos Salbadó, ta bai bira nos “Tata Eterno” tambe. Beibel ta yam’é asina. (Isaías 9:6, 7) Sí, Hesus, e hòmber perfekto, por bira nos tata na lugá di Adam, ku a bira imperfekto ora el a peka. Kier men, nos por skohe pa ‘e di dos Adam’ bira nos tata. Klaru ku Hesus mes tambe tin un Tata: Yehova Dios.

Kon asina Adam i Hesus tabata meskos, i dikon tabata asina importante pa nan ta meskos?

Si nos siña tokante Hesus, nos por asept’é komo nos Salbadó. Bo ta kòrda ta di kiko Hesus mester a salba nos?— Sí, di e piká i morto ku nos a haña for di Adam. Hesus a sakrifiká, òf duna, e bida perfekto ku e tabatin ora el a bira hende grandi. E sakrifisio ei yama e reskate. Yehova a sòru pa e reskate, pa asina nos por haña pordon di nos pikánan.—Mateo 20:28; Romanonan 5:8; 6:23.

Di mes, nos no ke lubidá kiko Dios i su Yu a hasi pa nos, no ta bèrdat?— Hesus a siña su siguidónan hasi un kos spesial ku por yuda nos keda kòrda loke el a hasi. Ban papia riba esei.

 Imaginá bo ku bo ta den un sala na di dos piso di un kas na Yerusalèm. Ta anochi. Hesus ku su apòstelnan ta na mesa. Riba mesa tin lamchi ku nan a roster riba kandela, pan plat i biña kòrá. Nan ta teniendo un komementu spesial. Bo sa dikon e ta spesial?—

E komementu aki ta pa hasi nan kòrda un kos ku Yehova a hasi sientos di aña pasá, tempu ku su pueblo, e israelitanan, tabata esklabo na Egipto. E dia ei Yehova a bisa su pueblo: ‘Mata un lamchi pa kada famia, anto pone su sanger riba kozein di boso kasnan.’ E ora ei el a bisa nan: ‘Bai den boso kas, anto kome e lamchi.’

Kon e sanger di e lamchi a protehá e hendenan di Israel?

 E israelitanan a hasi manera el a bisa. Anto e mesun anochi ei, un angel di Dios a pasa dor di henter e tera di Egipto. Den kasi tur kas, e angel a mata e yu mayó. Pero ora e angel a wak sanger di lamchi na e kozein di porta, e tabata pasa e kas bai sin hasi niun hende nada. E muchanan den e kasnan ei no a muri. Fárao, e rei di Egipto, a haña miedu di e kos ku e angel di Yehova a hasi. P’esei Fárao a bisa e israelitanan: ‘Boso ta liber pa bai. Sali for di Egipto!’ E ora ei e israelitanan a pone nan kosnan riba nan kamelnan ku nan burikunan, anto a bai.

Yehova no tabata ke pa su pueblo lubidá kon el a libra nan. P’esei el a bisa nan: ‘Un biaha pa aña boso mester kome un kuminda manera esun ku boso a kome awe nochi.’ Nan a yama e komementu spesial ei Pasku. Awendia nos ta yam’é Pasku Hudiu. Riba e anochi ei e angel di Dios a wak e kasnan ku tabata marká ku sanger, anto el a ‘pasa nan bai.’—Eksodo 12:1-13, 24-27, 31.

Ora Hesus ku su apòstelnan a kome e kuminda di Pasku Hudiu, nan a kòrda riba e dia ayá. Ora nan a kaba, Hesus a hasi un kos hopi importante. Pero promé el a manda Hudas e apòstel infiel bai. E ora ei Hesus a tuma un dje pannan ku a sobra, el a gradisí Dios p’e, kibr’é anto pas’é pa su disipelnan. El a bisa nan: “Tuma, kome.” Despues el a bisa: ‘E pan aki ta nifiká mi kurpa ku mi ta bai entregá ora mi muri pa boso.’

E ora ei Hesus a tuma un kopa di biña kòrá. Despues di gradisí Dios atrobe, el a pasa e kopa tambe rònt anto bisa nan: “Boso tur bebe for di dje.” Anto el a bisa: ‘E biña aki ta nifiká mi sanger. Djis aki mi ta bai laga mi sanger basha pa libra boso di boso pikánan. Keda hasi e kos aki pa boso kòrda mi.’—Mateo 26:26-28; 1 Korintionan 11:23-26.

Kiko e sanger di Hesus, ku Hesus a kompará ku biña, por hasi pa nos?

 Bo a nota ku Hesus a bisa e disipelnan pa keda hasi e komementu ei pa nan kòrd’é?— Despues di esei nan no mester a tene e komementu di Pasku Hudiu mas. Na lugá di esei, awor un bes pa aña nan tabatin ku tene e komementu spesial nobo ei, pa nan keda kòrda Hesus i su morto. E komementu ei yama E Sena di Señor. Awendia, hopi bes nos ta yam’é e Konmemorashon òf Memorial. Dikon?— Dor ku e ta trese na nos memoria loke Hesus i su Tata Yehova Dios a hasi pa nos.

E pan mester pone nos kòrda e kurpa di Hesus. E tabata dispuesto di entregá e kurpa ei pa nos por haña bida eterno. Anto kiko di e biña kòrá?— E biña mester pone nos kòrda e balor di e sanger di Hesus. E ta bal mas ku e sanger dje lamchi di Pasku na Egipto. Bo sa dikon?— Beibel ta bisa ku e sanger di Hesus por laga nos haña pordon di piká. I ora tur nos pikánan kita, nos no ta bai bira malu, ni bira bieu ni muri mas. Nos mester pensa riba e kos ei ora nos bai Memorial.

Ta tur hende mester kome e pan i bebe e biña na Memorial?— Wèl, Hesus a bisa e hendenan ku ta kome i bebe di nan: ‘Boso lo tuma parti ku mi den mi reino, i sinta riba trononan den shelu huntu ku mi.’ (Lukas 22:19, 20, 30) Esei a nifiká ku nan ta bai shelu pa bira rei huntu ku Hesus. P’esei, ta hende ku tin speransa di goberná huntu ku Hesus den shelu so mester tuma e pan i e biña.

Pero asta si nos no ta kome e pan ni bebe e biña, nos mester bai Memorial. Bo sa dikon?— Dor ku Hesus a duna su bida pa nos tambe. Dor di bai Memorial nos ta mustra ku nos no a lubidá. Nos ta keda kòrda e gran regalo ku Dios a duna nos.

Esakinan ta algun teksto ku ta mustra kon importante e reskate di Hesus ta: 1 Korintionan 5:7; Efesionan 1:7; 1 Timoteo 2:5, 6 i 1 Pedro 1:18, 19.