Ipapaamta ed sikatayo na Biblia ya diad anggaan et wala met so nagawan kadederal: “Wala naani so baleg a kairapan ya agni agawa manlapud inggapo na mundo anggad natan . . . Diad tua, no agnapatikeyan iratan ya agew, anggapo so laman a nisalba.” (Mateo 24:21, 22) Balet impormisa na Dios ya dakel so makaliktar: “Say mundo . . . et agmansiansia, balet samay manggagawa na linawa na Dios et mansiansia ed andi-anggaan.”—1 Juan 2:17.

No labay moy makaliktar ed anggaan na sayan mundo tan “mansiansia ed andi-anggaan,” antoy gawaen mo? Kasin man-stock kay naakan tan arum nin nausar mo odino manparaan ka pian protektaay sarilim? Andi. Bibilinen itayon maong na Biblia ya aliwan saratan so iyuna tayo. Oniay nabasa tayo: “Lapud natunaw irayan amin a bengatla, imano yoy inkatoo yo, a nepeg a masanto kayo ed saray ugali yo tan gagawaen yo iray bengatlan nipaakar ed maridios a debosyon, legan ya aalagaren tan sankanonot yo lawas so isabi na agew nen Jehova.” (2 Pedro 3:10-12) Ipapanengneng na arum a teksto ya kaibad “amin a bengatla” ya natunaw iray manuley ed sayan mauges a mundo tan amin ya pilien dan manuley imbes ya say Dios. Malinew sirin ya anggano mantipon tayo ray nausar, agda tayo iratan niliktar ed kadederal.

Talagan kaukolan so panmatoor ed Dios a Jehova tan aralen no anto ray ugali tan kagagawa ya makapaliket ed sikato. (Sofonias 2:3) Imbes ya aligen so karaklan tan ibaliwala iray malinew ya tanda ya manbibilay tayo lad kritikal a panaon, nepeg a ‘sankanonot tayon lanang so isabi na agew nen Jehova.’ Natulongan ka na saray Tasi nen Jehova pian nanengneng mod Biblia no panon kan makaliktar ed satan ya agew ya onsabi.