Panagbasay Biblia​—Legay Bilay a Lapuay Biskeg Ko

Unong ed salaysay nen Marceau Leroy

“SANEN gapo say Dios pinalsa to so saray tawen tan say dalin,” so introduksion na babasaen ko. Iyaamot koy pambabasak ed kuartok. Akin ey? On, ta agmanisia ed Dios so tatay ko tan seguradon agto labay iyan libro, say Biblia.

Diad saman ko ni labat abasay Biblia tan talagan dumay epektod siak na gapoy Genesis. Say kuan kod sarilik, ‘Aya manayay eksplinasyon no akin et mankakasakey iray ganggan na palsa ya abayag ko lan pandinayewan!’ Lapud agusgustoan ko, binasak itan manlapud alas-otso na labi anggad alas-kuatro na palbangon. Ditan ginmapo so niyugalik a panagbasay Salita na Dios. Isalaysay kod sikayo no panon a nagmaliw ya legay bilay a lapuay biskeg ko so panagbasay Biblia.

“Inagew-agew Mo la ‘tan ya Basaen”

Nianak ak nen 1926 ed Vermelles, sakey a baryon panagminaay karbon ed amianen na France. Nen komaduan sankamundoan a guerra, kakkaukolan so karbon ed bansa mi. Kanian lapud sakey ak a minero, agak kaibad saray kapilitan a mansundalo. Balet, pian oninaway bilay ko, nanaral ak na radioelectronics tan pandinayewan koy agpankokontraan na saray ganggan na palsa. Nen 21 años ko, inter ed siak na kaklasek so sankaunaan ya Bibliak. Inkuan ton, “Balibalin basaen ‘ya.” Sanen abasak lay interon Biblia, akombinse ak ya Salita na Dios itan, say puyan to ed totoo.

Lapud abaloan kon labay met a basaen na saray kakaabay mi so Biblia, inyalaan ko ray waloran kopya. Balet abigbigla ak ta binalaw tan sinumpa da ak. Insan pinasakbayan ak na saray maaniton kakanayon ko, “Oras ya ginapoan mo ‘tan, inagew-agew mo la ‘tan ya basaen!” Ingen ta binasak nin siansia, tan agkon balot nagbabawiay ginawak. Niyugalik itan legay bilay ko.

Sanen naimano na saray kakaabay mi ya interesado ak ed Biblia, inter dad siak iray publikasyon na saray Tasi nen Jehova ya naawat da. Impaliwawa na bokletan Sakey a Mundo, Sakey a Gobierno * (diad litrato et French) no akin a say Panarian na Dios so alenleneg ya ilalo na totoo. (Mat. 6:10) Lalo ak a nansagpot ya inabang ed arum iyan ilalo.

Say sakey ed saray sankaunaan ya naikdan ko na Biblia et si Noël ya kaarok manlapu la nen ugaw ak. Lapud sikatoy sakey a Katoliko,  intagar to ak ed sakey a seminarista. Medyo talawan ak, balet amtak ya ibabaga na Salmo 115:4-8 tan Mateo 23:9, 10 ya aglabay na Dios a mangusar tayo na idolo ed panagdayew tan tawagen ed relihyoson titulo iray papari. Kanian akapampakpel ak ya mangidepensad balon sisisiaen ko. Bilang resulta, inawat nen Noël so katuaan tan anggad natan et siansia nin matoor ya Tasi.

Binisitak met si atsik. Walaray libro nen asawa to a nipaakar ed espiritismo kanian guguloen na saray demonyo. Nen unaan singa anggapoy nagawaan ko, balet akombinse ak na saray teksto ed Biblia a singa say Hebreos 1:14 ya tulongan ak na saray anghel nen Jehova. Sanen inyaplika na bayaw ko iray prinsipyo na Biblia tan imbabantak to ray amin ya mikonektaan ed espiritismo, sikatoy tinundaan na saray demonyo. Si atsik tan say bayaw ko et nagmaliw a maseseg a Tasi.

Nen 1947, pinasyar ak nen Arthur Emiot, sakey ya Amerikanon Tasi. Eksayted ak, tinepet kod sikato no iner so pantitiponan na saray Tasi. Inkuan ton walay sakey a grupo ed Liévin, manga 10 kilometro kaarawi. Dagdaiset ni bisikleta ed saman kanian pigay bulan ak ya manaakar kada miaral. Waloy taon a sebel so kimey na saray Tasi nen Jehova ed France. Wala labat lay 2,380 a Tasi ed interon lugar tan karaklan ed sikara ed nanlapud Poland. Balet nen Setyembre 1, 1947, aliwa lan sebel so kimey mi ed France. Inletneg lamet so sangan opisina diad Villa Guibert, Paris. Lapud anggapoy anggan sakey a payunir ed France, pinaseseg na Disyembre 1947 ya isyu na Informant (natan et Ministeryo Tayo ed Panarian) a manregular payunir iray agagi, ya manpulong na 150 oras kada bulan. (Nen 1949, ginawa la itan ya 100 oras.) Manisia ak ed imbaga nen Jesus ed Juan 17:17 a ‘say salita na Dios so katuaan,’ kanian nampabautismo ak nen 1948, tan nen Disyembre 1949 et ginmapo ak ya nampayunir.

Apriso tan Amawil ed Dunkerque

Agano ak labat a nanlingkor ed unonan asainmin ko diad Agen, abalaten na France. Lapud inmekal ak ed panagminaan, kapilitan a mansundalo ak. Balet, agak inmabuloy kanian apriso ak. Anggano sebel so pangawit na Biblia, akapangiyamot ak na pigaran pahina na libron Salmo. Apaseseg ak na impanbasak ed satan. Sanen nibulos ak la, walay kaukolan kon desisyonan: Itundak la kasi manpayunir pian mananap na pambilay? Diad saya et atulongan ak lamet na abasak ed Biblia. Dinalepdep ko imay imbaga nen Pablo diad Filipos 4:11-13: “Diad amin a bengatla et ombibiskeg ak diad panamegley na samay mangiiter ed siak na pakayari.” Nandesisyon ak ya ituloy koy manpayunir. Nen 1950, say balon asainmin ko et diad Dunkerque, sakey a baley a dati lan nampulongan ko.

Linma ak diman ya kalimalima. Talagan aderal so baley lapud Sankamundoan a Guerra II, tan mairap so makalmoy panayaman. Pinasyar koy pamilyan apulongan ko nensaman, tan malikeliket ya imbaga na samay asawan bii: “Oh, Mr. Leroy, maong ta imbulos da ki la! Say kuanen asawak no dakel kunoy kapara yo, agbalot komon nangguerra.” Walay ipapaabang dan abung, kanian pinatuloy da ak anggad anggapo ni ray turista. Diad saman met ya agew, tinulongan ak nen Evans a kuya nen Arthur Emiot ya makalmoy trabaho. * Sikatoy sakey ya interpreter diad pier tan manaanap na mangguardiad barko no labi. Inkabat to ak ed sakey ya first officer na barko. Kayari impakaprisok, agaylay ebeng ko, singa ak turok. Kanian impaliwawa nen Evans so rason, tan inkuan na officer ya mangala ak na naakan ed refrigerator. Diad loob na sanagew, awalaan ak na ayaman, trabaho, tan naakan! Lalon binmiskeg so talek ko ed samay imbaga nen Jesus a walad Mateo 6:25-33.

 Sanen mankisasbi la ray turista, kaukolan mi la nen Simon Apolinarski, a kaibak a payunir, so mananap na sananey a napundoan, balet labay mi mansiansia ed asainmin mi. Walay angiyopresid sikami na daan ya siromay kabayo, a say dukolan mi et dayami. Sanagew kamin walad teritorya. Tan pinulongan mi imay akan-gawa na siroman. Sikatoy sakey ed saray dakel ya angawat ed katuaan. Ag-abayag balet et walay insulat ed dyaryo a pasakbay ed saray tagad Dunkerque nipaakar ed “maples ya ilalaknab na kimey na saray Tasi nen Jehova ed satan a rehyon.” Anta say tua et pigpigara kami labat a Tasi diman! Diad satan a subok, apabiskeg kami na impandalepdep ed ilalo mi tan ed panangasikaso nen Jehova. Sanen nauman so asainmin ko nen 1952, walay manga 30 a regular a manangipalapag ed Dunkerque.

Pinabiskeg Parad Saray Balon Responsabilidad

Kayari antikey ya impanlingkor ed syudad na Amiens, niasain ak a man-espisyal payunir diad Boulogne-Billancourt, ya arawin parte na Paris. Dakel so inyaralan ko na Biblia, tan diad saginonor, arum ed sikara et nampayunir tan nanmisionero. Walay sakey a kalangweran, si Guy Mabilat, ya angawat ed katuaan tan akapanlingkor bilang manangasikaso na sirkito insan bilang manangasikaso na distrito. Ag-abayag, sikatoy angasikasod impangipaalagey ed printery ed kaplesan a sangan opisina diad Louviers, manga 96 kilometro manlapud Paris. Say regular a panagpulong so akatulong ed siak pian ontatak ed nonot ko so Salita na Dios. Satan so mamapaliket tan mamapaaligwas ed panagbangat ko.

Insan nen 1953, niasain ak bilang manangasikaso na sirkito diad Alsace-Lorraine, sakey a rehyon ya amiduan sinakop na Germany diad baetan na 1871 tan 1945. Kanian, kaukolan koy manaral na German. Diad saman et pigpigara ni luganan, telebisyon odino typewriter, tan anggapoy radyo o kompyuter. Balet aliwan maermen odino makapasaway bilay ko. Diad tua, saman so sankaliketan a panaon. Inunor koy simbawa na Biblia a pansiansiaen ya ‘simpli so mata’ tan daiset so akaabalad panaglingkor kod si Jehova.​—Mat. 6:19-22.

Nen 1955, agko nalinglingwanan imay “Triumphant Kingdom” ya Asemblea diad Paris. Ditan ko akabat so nagmaliw ya asawak, si Irène Kolanski. Sikatoy akaunad siak na sakey taon a nampayunir. Saray ateng to et abayag lan maseseg a Tasi. Sikaray inyaralan nen Adolf Weber, say hardinero nen Brother Russell ya linmad Europe pian iyabawag so maong balita. Nen 1956 et nankasal kami nen  Irène, tan kaibak diad kimey ed sirkito. Diad loob na dakel a taon, sikatoy akatulong ed siak a maong!

Kayari duay taon, asurprisa ak sanen tinuro ak a magmaliw ya manangasikaso na distrito. Balet, lapud kulang so kualipikadon agagi a lalaki, siansia nin dadalawen ko ray kongregasyon bilang mangasikaso na sirkito. Talagan busy ak ed saman! Nilikud nid 100 ya oras a pampupulong ko kada bulan, sinimba ak a manpapaliwawa, ondadalaw ed taloran panagaral na libro, mantsi-check na saray rekord, tan manggagawa na saray report. Panon kon nipapanaon so panagbasay Salita na Dios? Say anengneng kon solusyon et say pangatli na pigaran pahina na daan a Biblia pian walay naawit ko. Legan kon aalagaren iray katratok, babasaen ko iratan. Akatulong iraman ya antikey, ingen ta makapabiskeg a panagbasa pian mansiansia ak ed asainmin ko.

Nen 1967, sikami nen Irène et tinawag a magmaliw ya permanentin membro na pamilyan Bethel diad Boulogne-Billancourt. Nankimey ak ed Service Department, tan diad masulok lan 40 taon et siansia nin satan so pribilehyok. Sakey ed saray makapaliket ya parte na kimey ko so pangebat ed sulsulat na saray mantetepet nipaakar ed Biblia. Talagan labalabay kon aralen so Salita na Dios tan ‘idepensa so maong a balita’! (Fil. 1:7) Panggagayagaan ko met so pangidadaulo ed morning worship antis na almusal diad Bethel. Nen 1976, tinuro ak a magmaliw a membro na Branch Committee diad France.

Sankaabigan a Paraan na Kabibilay

Anggaman walaray adalan kon subsubok, say sankairapan a parte na bilay ko et natan ya maedad kami la, makapuy lay laman, tan daiset lay nagawaan mi nen Irène. Balet siansia nin say panagbasa tan panagaral na Salitay Dios a saniba so ontutulong ed sikami pian agnaandi so ilalo mi. Labalabay mi onlugan ed bus paonlad teritorya na kongregasyon mi pian inabang iyan ilalo ed arum. No panibaen, masulok a 120 taon so impanlingkor mi a sigpot panaon, tan masimoon min ipapaseseg ya aligen iya na amin a malabay a nawalaan na maliket tan makanan bilay. Sanen insulat nen Arin David so walad Salmo 37:25, sikatoy ‘masiken la.’ Balet singa sikato, “agko nin balot anengneng a say matunong et apaulyan.”

Legay bilay ko, pinabiskeg ak nen Jehova panamegley na Salita to. Masulok lan 60 taon so apalabas sanen binagaan ak na saray kakanayon kon magmaliw lan ugalik so pambasay Biblia. Ag-ira alingo-lingo. Talagan niyugalik itan, tan agkon balot pagbabawian!

[Saray paimano ed leksab]

[Litrato ed pahina 5]

Sikami nen Simon

[Litrato ed pahina 5]

Biblia a kapara na samay inmunan naawat ko

[Litrato ed pahina 5]

Sanen manlilingkor ak bilang manangasikaso na distrito

[Litrato ed pahina 6]

Nen kasal mi

[Litrato ed pahina 6]

Labalabay mi nen Irène ya basaen tan aralen so Salita na Dios