Anggad kapigan tayo manpulong?

Oniay imbaga nen Jesus: “Sayan maong a balita na Panarian et nipulong ed interon dalin bilang pantasi ed amin a nasyon, insan onsabi so anggaan.” (Mat. 24:14) Amay salitan “anggaan” diad sayan bersikulo, tan ed bersikulo 6 tan 13 et teʹlos diad Griego. Ontutukoy iya ed anggaan na mundo nen Satanas ya nagawa no Armagedon. (Apo. 16:​14, 16) Labay ton ibaga sirin, tuloytuloy tayon ipulong so maong a balita anggad antis ya mismo na Armagedon. Pananguman iya ed datin pakatalos tayo.

Say amta tayo dati, agtayo la ipulong so maong a balita no ginmapo la so baleg a kairapan—no deralen la so Makapanyarin Babilonia. (Apo. 17:​3, 5, 15, 16) Dati say atalosan tayo, no ginmapo lay baleg a kairapan, anampot met lay simbolikon “taon na kaabigay-linawa nen Jehova.” (Isa. 61:2) Panisiaan tayo met nensaman ya say makaliktar labat ed baleg a kairapan et saramay matoor lan manlilingkor ed si Jehova antis ni na baleg a kairapan. Inisip tayo ya singa ira saramay Judio ya akaliktar nen aderal so Jerusalem nen 607 B.C.E. Amin ya Judion akaliktar ed satan et amarkaan la parad kililiktar antis nin naderal so Jerusalem ta abayag la ran mandadayew ed si Jehova tan kabusol day kaugsan. (Eze. 5:11; 9:4) Pero atan ya datin pakatalos tayo et kontra ed samay imbaga nen Jesus ya nabasa ed Mateo 24:14. Akin ey? On ta base ed satan ya teksto, napulongan ni na maong a balita iray totoo kanian wala ni tsansa dan manguman antis ya mismo na anggaan—on, antis ya mismo na Armagedon!

Lapud anguman so pakatalos tayo ed Mateo 24:​14, kaukolan tayo met ya umanen so pakatalos tayo ed samay impasakbay na Apocalipsis 16:21 nipaakar ed pangiyabawag tayoy mensahe ya inkompara ed uran a kristal. No aralen tayo so arum nin ibabaga na Biblia, nanengneng tayo ya mankonektaan nin siansia iyan duaran teksto. Akin et ontay nibaga tayo? Imanoen tayo pa no panon ya indeskribe na Biblia so magmaliw ya reaksion na totoo ed mensahe na Panarian. Diad samay sulat nen apostol Pablo ya nabasad 2 Corinto 2:​15, 16, imbaga to ya parad saray ondengel tan mangawat, say mensahe na Panarian et singa “ambalingit ya angob a mangitonton ed bilay.” Maong a balita itan parad sikara! Pero parad saray ag-ondengel, say mensahe na Panarian et singa ambanget ya “angob a mangitonton ed ipapatey.” On, mauges ya balita itan parad sikara! Kakkabusol da so mensahe na Panarian ta lapud satan et lalon napapaneknekan ya sayan mundo da et mauges, uuleyan nen Satanas, tan asingsingger lan naderal.—Juan 7:7; 1 Juan 2:17; 5:19.

Abitla met ed Apocalipsis 16:21 ya say simbolikon uran a kristal et “talagan grabe.” Labay ton ibaga, legan na baleg a kairapan, mas diretsaan so pampulong tayo tan mas dakel ya totoo so napasabian na mensahe na Panarian. Kanian talagan nakabkabat so ngaran nen Jehova! (Eze. 39:7) No aderal la so Makapanyarin Babilonia, wala ni kasi ondengel ed mensahe tayo tan ipasen da itan ya ambalingit ya angob? Nayarin wala ni! Ompan nanonotan da imay abaybayag tayo lan ipupulong ya naderal so palson relihyon. No nanengneng da lan mismo itan, ompan naisip da, ‘Aya la may ibabaga na saray Tasi!’ Kanian napakiwas iran ondengel ed sikatayo.

Pareho iya ed samay agawa ed Ehipto nensaman kayari na Samploran Salot. Ibabaga na Biblia ya kayarin ‘inukom nen Jehova so amin a dirios na Ehipto,’ akila ed saray Israelita so “baleg ya ulop na nanlalaok a totoo.” (Exo. 12:​12, 37, 38) Ontutukoy itan ed saray Ehipsio tan arum nin dayo ya pinili day mandayew ed si Jehova nen anengneng dan agawa imay Samploran Salot ya impasakbay nen Moises.

On, kayari kaderal na Makapanyarin Babilonia, nayarin wala ni ray totoon manguman tan pilien day mandayew ed si Jehova. Wala ni tsansa dan onsuporta ed saray nakekeran agagi nen Kristo diad dalin. (Mat. 25:​34-36, 40) No ontan so gawaen da, ipasen ira nen Jesus bilang karnero. Pero siempre, ayan pankanawnawa ya niiter ed saray totoo et manampot la antis ya mismo na Armagedon. Ta diad satan ya panaon, natipon la ed tawen so amin ya nakekeran alanaan diad dalin.

Sayan pananguman ed pakatalos tayo et patunay ya talagan maar-aro tan makasin Dios si Jehova. On, “agto labay a walay siopaman a naderal noagta labay to ya amin et naikday pankanawnawan magbabawi.”—2 Ped. 3:9.