Roma 13:1-14
13 Manpasakop komon so balang kamarerwa ed saray atagey ya autoridad, ta anggapoy autoridad ya ag-inabuloyan na Dios; saray autoridad natan et impasen na Dios ed saray relatibon posisyon da.
2 Kanian samay onsusumpa ed autoridad et onsusumpa ed uksoyan na Dios; naukom iramay onsusumpa ed satan ya uksoyan.
3 Ta nepeg a takotan iramay manuuley, aliwan lapud maong a gawa, noagta lapud mauges. Sirin, labay mo ta so ag-ontakot ed autoridad? Mantultuloy kan manggawa na maong, tan nirayew ka lapud satan;
4 ta satan et lingkor na Dios parad pankaabigan mo. Balet ontakot ka no manggagawa kay mauges: ta ag-itan mangaawit na espada ya anggapoy gagala; ta satan et lingkor na Dios, sakey a manangibales pian mangipatnag na sanok ed samay manggagawa na mauges.
5 Wala sirin so mabiskeg a rason pian manpasakop kayo, aliwa labat a nisengeg ed satan a sanok noagta nisengeg met ed konsiensia yo.
6 Ta satan so makasengeg a manbabayar kayo met na saray buis; ta sikaray lingkor* na Dios a naynay a manusumpal ed sayan mismon gagala.
7 Iter yo ed amin iray kanepegan da, manbuis kayo ed samay akankanepegan na buis; manbayar kayo ed samay akankanepegan na bayar; takotan yo imay nepeg a takotan; igalang yo imay nepeg ya igalang.
8 Agkayo komon makautang ed siopaman na anggan sakey a bengatla, nilikud ed say pangaro ed sakey tan sakey; ta samay mangaaro ed kapara ton too et asumpal to lay ganggan.
9 Ta saray ganggan ya, “Agka mikakalugoran,* Agka mamapatey, Agka mantatakew, Agka mangaagum,” tan antokaman nin ganggan, so asegek ed oniaran salita, salanti, “Arom so kaparam a too a singa ed sikan dili.”
10 Say walaan na aro et agmanggagawa na mauges ed kapara ton too; kanian say aro so kasumpalan na ganggan.
11 Gawa yo met iya, lapud amta yo so panaon, a saya la so oras pian onliing kayo, ta natan et mas asingger lay kilalaban tayo nen say sanen nagmaliw itayon mananisia.
12 Magano lan mansampot so labi; asingsingger la so agew. Ekalen tayo la sirin iray gawa a nipaakar ed kabilungetan tan isulong tayo iray armas na liwawa.
13 Manakar itayon masimpit a singa no diad agew, aliwan diad maingal a panliliket tan panagbuanges, aliwan diad sebel a piaakdol tan anggapoy-baing a kagagawa,* aliwan diad pankokolkol tan imon.
14 Balet isulong* tayo so Katawan a Jesu-Kristo, tan agtayo manplaplano parad saray pilalek na laman.
