Roma 3:1-31
3 Anto sirin so pidumaan na saray Judio ed arum, odino anto so gunggona na panagsegat?
2 Diad amin a paraan et balbaleg. Manuna ed amin, lapud nimatalek ed sikara so sagrado iran mensahe na Dios.
3 Anto sirin so nagawa? No say arum et ag-angipatnag na pananisia, kasin magmaliw ya andiay kakanaan so katooran na Dios lapud andian ira na pananisia?
4 Agbalot komon nagawa itan! Balet, napaneknekan komon a tua so Dios, anggano napaneknekan a matila so kada too, ta unong a nisulat: “Pian sika so napaneknekan a matunong ed saray salitam tan manalo ka sano uukomen ka.”
5 Balet, no say ag-inkatunong na too et lalon mangipabitar ed inkatunong na Dios, antoy ibaga tayo? Agta say Dios et makatunongan sano ipatnag toy sanok to? (Mansasalita ak a singa ed panagsalita na totoo.)
6 Agbalot komon nagawa itan! Ta no andi, panon so pangukom na Dios ed mundo?
7 Balet no bilang ta mantila ak, tan lapud saya et lalon nitandoro so katuaan na Dios diad kigloriaan to, akin et uukomen ak ni bilang sakey a managkasalanan?
8 Tan akin ya agtayo ibaga imay palson iyaakusa ed sikatayo na arum a totoo, a kuan da ya ibabaga tayon: “Manggawa itayo na mauges iran bengatla ta pian onsabi iray maong a bengatla”? Mitunosan ed inkahustisya so pangukom ed saratan a totoo.
9 Anto sirin? Mas maabig kasi so kipapasen tayo? Andin balot! Ta impabitar tayo la a walad silong na kasalanan so amin a Judio ontan met iray Griego;
10 unong a nisulat: “Anggapo so matunong a too, anggapo anggan sakey;
11 anggapoy siopaman a walaan na aralem a pakatalos, anggapoy siopaman a manaanap ed Dios.
12 Amin a totoo et sinmian ed dalan, amin da et nagmaliw ya anggapoy kakanaan; anggapoy siopaman a manggagawa na kaabigan, anggapo anggan sakey lambengat.”
13 “Saray kulokulong da et singa sakey a lukas a lubok, angusar ira na panamalikdo diad panamegley na saray dila ra.” “Dita na saray uleg so walad dalem na saray bibil da.”
14 “Tan say sangi ra et napno na panag-ayew tan ampait a balbalikas.”
15 “Saray sali ra et mapmaples a mamaagus na dala.”
16 “Say kabagbag tan kaermenan et walad saray dalan da,
17 tan agda akabatan so dalan na kareenan.”
18 “Agda tatakotan so Dios.”
19 Natan, amta tayo a say amin ya ibabaga na Ganggan et parad saramay walad silong na Ganggan, ta pian napepetan so balang sangi tan say sankamundoan et dusaen na Dios.
20 Kanian diad panamegley na saray gawa na ganggan et anggapo so toon niyabawag a matunong ed arap to, ta peteg a naamtaan tayo no anto so kasalanan diad panamegley na ganggan.
21 Balet natan et aliwan diad panamegley na ganggan so kipapatnag na inkatunong na Dios, unong a tatasian itan na say Ganggan tan saray Propeta;
22 on, say inkatunong na Dios diad panamegley na pananisia ed si Jesu-Kristo, parad saramay amin a walaan na pananisia. Ta anggapo so pandudumaan.
23 Ta amin et nankasalanan tan agmakadampot ed gloria na Dios,
24 tan say kiyaabawag dan matunong lapud agnaparaan a kaabigan to diad panamegley na kibulos lapud dondon a binayaran nen Kristo Jesus et singa sakey a regalon andi-bayar.
25 Si Kristo et intarya na Dios bilang apay parad pipupulangan diad panamegley na pananisia ed dala to. Ginawa iya na Dios ta pian ipanengneng toy inkatunong to diad impamerdona to ed saray kasalanan ya agawa ed apalabas legan a sikatoy mantetepel;
26 ta pian ipanengneng to met so inkatunong to diad sayan peles a panaon, sano iyaabawag ton matunong so toon walaay pananisia ed si Jesus.
27 Kawalaan la sirin na panagpasirayew? Inekal la itan. Diad panamegley na anton ganggan? Samay nipaakar ed saray gawa? Andi, noagta diad panamegley na ganggan na pananisia.
28 Ta ipapasen tayo a say sakey a too et niyabawag a matunong lapud pananisia, ya aliwan lapud saray gawa na ganggan.
29 Odino kasin sikatoy Dios labat na saray Judio? Agta sikatoy Dios met na saray totoo na nasyones? On, sikatoy Dios met na saray totoo na nasyones
30 lapud saksakey so Dios, ya iyabawag ton matunong iray totoon asegat lapud pananisia ra tan saray totoon ag-asegat diad panamegley na pananisia ra.
31 Sirin, kasin papaandien tayo so ganggan diad panamegley na pananisia tayo? Agbalot komon nagawa itan! Imbes, pansiasiansiaen tayo so ganggan.
