Roma 8:1-39
8 Kanian saramay akikasakey ed si Kristo Jesus et agnaukom bilang nankasalanan.
2 Ta say ganggan na samay espiritu a mangiiter na bilay a nikasakey ed si Kristo Jesus et imbulos to ka la ed ganggan na kasalanan tan ipapatey.
3 Ta anggano sikay agnayarian ya ibulos na Ganggan, ta makapuy itan lapud ag-inkayadyari na too, imbaki na Dios so mismon Anak to a kaulibay na makasalanan a totoo tan nipaakar ed kasalanan, pian ukomen so kasalanan diad laman,
4 ta pian nasumpal tayo so matunong a kakaukolanen na Ganggan diad pambilay tayo unong ed espiritu, ya aliwan unong ed laman.
5 Ta saramay mitunosan ed laman et iyaapasakey da iray nonot da ed saray nipaakar ed laman, balet saramay mitunosan ed espiritu et diad saray nipaakar ed espiritu.
6 Ta say pannonot nipaakar ed laman et mangitonton ed ipapatey, balet say pannonot nipaakar ed espiritu et mangitonton ed bilay tan kareenan;
7 lapud say pannonot nipaakar ed laman et mangitonton ed pibubusolan ed Dios, ta say laman et agpapauleyan ed ganggan na Dios, tan ag-itan nayarian na laman.
8 Kanian saramay mitutunosan ed laman et agda napaliket so Dios.
9 Balet, sikayo et mitutunosan ed espiritu, aliwan diad laman, no peteg a manaayam ed sikayo so espiritu na Dios. Balet no say siopaman et andian na espiritu nen Kristo, sikatoy agto kayarian.
10 Balet no si Kristo et nikasakey ed sikayo, say laman so peteg ya inatey nisengeg ed kasalanan, balet say espiritu et bilay nisengeg ed inkatunong.
11 Natan, no walad sikayo so espiritu na samay amaoli ed si Jesus manlapud inaatey, sayan amaoli ed si Kristo Jesus manlapud inaatey et pabilayen to met iray ompatey a laman yo diad panamegley na espiritu to a walad sikayo.
12 No ontan sirin, agagi, walaan itayoy obligasyon, aliwan diad laman pian manbilay a mitunosan ed laman;
13 ta no manbibilay kayo a mitunosan ed laman, seguradon ompatey kayo; balet no pateyen yo iray gawa na laman diad panamegley na espiritu, manbilay kayo.
14 Ta say amin ya iwawanwan na espiritu na Dios et ananak na Dios.
15 Ta lapud espiritu na Dios, ag-itayo magmaliw ya ariripen tan antakot lamet, balet diad panamegley na satan ya espiritu et sikatayoy tinagibi bilang ananak tan saya so mamakiwas ed sikatayon onkelyaw: “Abba,* Ama!”
16 Say espiritu so mantatasi a kaiba na espiritu tayo a sikatayoy ananak na Dios.
17 Sirin, no sikatayoy ananak, tomatawir itayo met: peteg a tomatawir na Dios, balet tomatawir a kaiba nen Kristo, daput no manirap itayon kaiba to ta pian nigloria itayo met a kaiba to.
18 Lapud saya et ipapasen ko a baliwala iray kairapan ed sayan peles a panaon no ikompara ed gloria a niparungtal ed sikatayo naani.
19 Ta saray pinalsa a manaalagar ed kiparungtal na ananak na Dios et maniilalon maong.
20 Ta saray pinalsa et nipasakop ed kaapaan, aliwan lapud panlabay da noagta diad panamegley na samay angipasakop ed satan, unong ed ilalo
21 a nibulos met iray pinalsa ed impakaaripen ed kabubulok pian magmaliw iran ananak na Dios a walaan na maglorian kawayangan.
22 Ta amta tayo a say amin a pinalsa et saniiban oneey-ey tan nasasakitan anggad natan.
23 Aliwan satan labat, noagta sikatayo met a mismo a walaan na unonan bungabunga, salanti, say espiritu, on, sikatayon mismo et oneey-ey ed dalem tayo legan tayon iilaloan so pakatagibi bilang ananak, say kibulos ed saray laman tayo diad panamegley na dondon.
24 Ta lapud sayan ilalo et nilaban itayo la; balet say ilalo a nanenengneng et aliwan ilalo, ta sano nanenengneng la na too so sakey a bengatla, ilaloan to ni kasi itan?
25 Balet no manilalo itayo ed agtayo nanenengneng, itultuloy tayon alagaren itan tekep na panagsungdo.
26 Diad ontan met a paraan, say espiritu so ontutulong met ed sikatayo diad kakapuyan tayo; ta walaray panaon a nakaukolan tayoy manpikasi balet agtayo amtay ipikasi tayo. Balet, say espiritu a mismo so ontulong ed sikatayo anggano agtayo amta so ibalikas tayo ed saray ey-ey tayo.
27 Ingen ta samay manguusisa ed kapusoan et amta to so kabaliksan na espiritu, lapud mikakasi itan unong ed linawa na Dios parad saray masanto.
28 Natan et amta tayo a say Dios et gagawaen ton mantutunosan so amin a gawa to pian nagunggonaan iramay mangaaro ed Dios, saramay tinawag unong ed gagala to;
29 lapud saramay inikdan toy nikadkaduman imano et pinili to met la pian magmaliw a kapara na Anak to, ta pian say Anak et magmaliw a panguloan ed limog na dakel ya agagi.
30 Niarum ni, saramay pinili to la et sikara imay tinawag to met; tan saramay tinawag to et sikara imay inyabawag to met a matunong. Tan saramay inyabawag ton matunong et sikara imay inggloria to met.
31 Anto sirin so ikuan tayo ed sarayan bengatla? No say Dios et walad dapag tayo, siopa so onsumpa ed sikatayo?
32 No say Dios ya agto anggan insiblet so dilin Anak to noagta inter to parad sikatayon amin, akin ya agto met mapangasin iter ed sikatayo so arum niran bengatla diad panamegley na Anak?
33 Siopa so mangakusa ed saray pinili na Dios? Say Dios so mangiyaabawag ed sikara a matunong.
34 Siopa so mangukom ed sikara? Anggapo, ta si Kristo Jesus et inatey tan apaoli manlapud inaatey, a walad kawanan a lima na Dios, tan mikakasi met parad sikatayo.
35 Siopa so makapangisian ed sikatayo ed aro nen Kristo? Kasin say kairapan odino gonigon odino panamasegsegang odino eras odino inkalakseb odino kapeligroan odino espada?
36 Unong a nisulat: “Nisengeg ed sika et nipapaarap kami ed ipapatey diad amin a panaon, singa kami karnero a pateyen la.”
37 Balet, diad amin na sarayan bengatla et sigpot itayon manalo diad panamegley to ya angaro ed sikatayo.
38 Ta manisia ak ya anggan say ipapatey odino say bilay odino saray anghel odino saray gobierno odino saray bengatlan wala natan odino saray bengatlan onsabi odino saray pakayari
39 odino say kaatagey odino say kaaralem odino anggan dinan nin pinalsa so agbalot makapangisian ed sikatayo ed aro na Dios a walad si Kristo Jesus a Katawan tayo.

