Roma 1:1-32
1 Siak, si Pablo, ya aripen nen Jesu-Kristo tan tinawag pian magmaliw ya apostol, ya aturo* pian mangiyabawag ed maong a balita na Dios,
2 ya insipan to la nensaman ed panamegley na saray propeta to diad masanton Kasulatan,
3 nipaakar ed Anak to, a nanlapud bini nen David unong ed laman,*
4 balet niyabawag ya Anak na Dios lapud pakapanyari unong ed espiritu na kasantosan, diad panamegley na kioli manlapud inaatey—on, si Jesu-Kristo a Katawan tayo,
5 a diad panamegley to et naawat mi so agnaparaan a kaabigan tan say inka-apostol ta pian niwala ed limog na amin a nasyones so katutulok lapud pananisia ed ngaran to,
6 a diad saratan a nasyones et atawag kayo met a magmaliw a kayarian nen Jesu-Kristo—
7 nansulat ak ed amin ya inad-aro na Dios a walad Roma, a tinawag pian magmaliw a masanto:
Nawalaan kayo komon na agnaparaan a kaabigan tan deen a manlalapu ed Dios ya Ama tayo tan ed Katawan a Jesu-Kristo.
8 Manuna ed amin, misasalamat ak ed Dios ko diad panamegley nen Jesu-Kristo nipaakar ed sikayon amin, lapud nibabalita ed interon mundo so pananisia yo.
9 Ta say Dios, a panlilingkoran kon masimsimoon nisengeg ed maong a balita nipaakar ed Anak to, so mamaneknek ya agak ontutundan manasalambit ed sikayo diad saray pikakasik,
10 a kekerewen ko a no nayari komon et makakar ak a siansia ed sikayo no saya so linawa na Dios.
11 Ta pipirawaten koy makapinengnengan ed sikayo, pian ninabang koy espiritual a langkap a mamabiskeg ed sikayo,
12 odino, pian makapanpapasesegan kayo, diad panamegley na pananisia na kada sakey, say pananisia yo tan say pananisiak.
13 Balet labay kon naamtaan yo, agagi, ya aminpigak lan ninonot so onla ed sikayo ta pian nawalaan ak met komon na pigaran bunga ed limog yo a singa diad limog na arum niran nasyon, ingen ta nasesebelan ak anggad natan.
14 Diad saray Griego tan diad saray Barbaro,* diad saray marunong tan diad saray makulangkulang et walay utang ko:
15 kanian ontan lay inkagunaet kon mangiyabawag na maong a balita diad sikayo met iran wadtan ed Roma.
16 Ta agko ibabaing so maong a balita; diad tua, satan so pakapanyari na Dios parad kilalaban na amin a walaan na pananisia, unona saray Judio insan saray Griego;
17 ta diad saya et nipaparungtal so inkatunong na Dios nisengeg ed pananisia tan nipaakar ed pananisia, unong a nisulat: “Balet say matunong et manbilay lapud pananisia.”
18 Ta say sanok na Dios et nipaparungtal manlapud tawen sumpad amin ya ag-inkamaridios tan ag-inkatunong na saray totoon manesebel ed katuaan diad agmatunong a paraan,
19 ta nipapatnag ed sikara no anto so nayarin naamtaan nipaakar ed Dios, lapud impatnag la itan na Dios ed sikara.
20 Ta saray agnanengneng a kualidad to et sankanengneng manlapud impamalsa ed mundo a manpatuloy, lapud natebek iratan ed panamegley na saray pinalsa, anggan say andi-anggaan a pakapanyari tan inka-Dios to, ta pian anggapoy nibaraan da;
21 ta anggaman kabat da so Dios, sikatoy agda inggloria bilang Dios tan agda akisalamatan, noagta nagmaliw iran anggapoy-isip ed saray panagkatunongan da tan abilungetan so agmakatalos a puso ra.
22 Anggano ibabaga ran marunong ira, nagmaliw iran makulangkulang,
23 tan say gloria na ag-ompatey a Dios et ginawa ran singa imahen na ompatey a too tan saray manok tan saray pinalsan apatiray-sali tan saray bengatlan kurongkurong.
24 Kanian sikaray pinaulyan na Dios diad karutakan, unong ed saray pilalek na kapusoan da, ta pian napabanday da iray laman dan dili,
25 anggan saramay angisalat ed katuaan na Dios parad katilaan tan angigalang tan nanlingkor ed pinalsa imbes a diad samay amalsa, a narayew komon ed andi-anggaan. Amen.
26 Kanian pinaulyan ira na Dios ed makapabaing a pilpilalek da ed sekso, ta sinalatan na saray bibii ed limog da so nisipor ya usar da, a sinumlang day gagala na inkapalsa ra;
27 ontan met, anggan saray lalaki et tinaynan day nisipor ya usar na bii tan alablabas so pampilalek da ed sakey tan sakey, lalaki ed lalaki, a manggagawa ra na mabanday tan aawaten da lan mismo so sigpot a tumang, a manepeg parad kasalanan da.
28 Tan lapud agda labay a bidbiren so Dios unong ed suston pikakabat, pinaulyan ira na Dios ed sakey a kipapasen na nonot ya agto aabobonan, pian gawaen da iray bengatlan agmanepeg,
29 a gagawaen da so amin a klase na ag-inkatunong, karelmengan, panag-agum, kaugsan, a napno ra na ibeg, panagpatey, pankokolkol, panagpalikdo, makapasakit ya awawey, a sikaray managtalabutob,
30 managpauges, managbusol ed Dios, agmangikabkabilangan, mapaatagey, mapaspasirayew, managgaway makaderal iran bengatla, agmatulok ed atateng,
31 andiay pakatalos, agmatoor ed saray paknaan, andiay nisipor a panangaro, andiay panangasi.
32 Anggaman kabkabat la na saraya so matunong a ganggan na Dios, a saramay manggagawa ed saratan et manepeg ya ompatey, agda lambengat gagawaen iratan noagta aabobonan da met iramay manggagawa ed saratan.
