Roma 4:1-25
4 No ontan sirin, anto so ikuan tayo nipaakar ed si Abraham ya ama tayo ed laman?
2 Singa bilang, no si Abraham et niyabawag a matunong lapud saray gawa, walay rason ton manpasirayew; balet aliwan diad arap na Dios.
3 Ta anto so ibabaga na kasulatan? “Impatnag nen Abraham so pananisia ed si Jehova, tan sikatoy impasen a matunong lapud satan.”
4 Natan diad sakey a toon mankikimey, say upa to et ipapasen a sakey ya utang, aliwan agnaparaan a kaabigan.
5 Balet, say toon agmankikimey ingen ta manisia ed samay iyaabawag ton matunong so agmaridios et ipapasen a matunong lapud pananisia to.
6 Unong a sinalita met nen David so nipaakar ed liket na toon ipapasen na Dios a matunong, aliwan lapud saray gawa:
7 “Maliket iramay totoon aperdona so mauges iran gawa ra tan asakbongan iray kasalanan da;
8 maliket so too ya aglan balot nonoten nen Jehova so kasalanan to.”
9 Sirin, kasin sayan liket et niwala labat ed saray totoon asegat odino dia met ed saray totoon ag-asegat? Ta ibabaga tayo: “Si Abraham et impasen a matunong lapud pananisia to.”
10 Kanian, diad antoran kipapasen a sikatoy impasen a matunong? Sanen sikatoy asegat odino sanen agni asegat? Aliwan sanen asegat, noagta sanen agni asegat.
11 Tan inawat to so sakey a tanda, salanti, say panagsegat, bilang sakey a tatak na inkatunong lapud pananisia to sanen agni asegat, ta pian sikatoy magmaliw ya ama na amin a walaan na pananisia anggaman agni ra asegat, ta pian nipasen iran matunong;
12 tan sakey ya ama na saray asegat ya ilalak, ya aliwa labat a diad saramay ontutumbok ed panagsegat, noagta diad saraman met so peteg ya ontutumbok ed saray bakat na satan a pananisia a walad ama tayon si Abraham sanen agni asegat.
13 Ta inawat nen Abraham odino say bini to so sipan a sikatoy magmaliw a tomatawir na mundo diad panamegley na inkatunong lapud pananisia, aliwan diad panamegley na ganggan.
14 Ta no saray tomatawir et saramay ontutumbok ed ganggan, anggapo lay kakanaan na pananisia tan anggapo lay kabaliksan na sipan.
15 Diad tua, say sakey et nipaarap ed sanok lapud Ganggan, balet no anggapoy ganggan, anggapo met so isusumlang.
16 Kanian say sipan et niiter lapud pananisia, pian mitunosan itan ed agnaparaan a kaabigan, ta pian magmaliw itan a segurado ed amin a bini, ya aliwa labat ed saramay ontutumbok ed Ganggan, noagta ontan met ed saramay ontutumbok ed pananisia nen Abraham. (Sikato so ama tayon amin,
17 unong a nisulat: “Tinuro ta ka bilang ama na dakel a nasyones.”) Agawa iya diad imaton na Dios ya anisiaan to, say Dios a mamapabilay ed saray inaatey tan saray bengatlan anggapo et tatawagen ton singano wala la ra.
18 Anggaman anggapo lay ilalo, sikatoy walaan nin siansia na pananisia lapud ilalo, pian sikatoy magmaliw ya ama na dakel a nasyones unong ed nikuan la: “Ontan met so pagmaliwan na binim.”
19 Tan anggano agkinmapuy so pananisia to, ninonot to ya inatey la so kipapasen na laman to, ta mantaon lay sanlasus, ontan met ed say kipapasen nen Sara ya agla makaanak.
20 Balet lapud sipan na Dios, agkinmapuy so pananisia to, noagta nagmaliw a mabisbiskeg ed pananisia, ya inggloria toy Dios
21 tan mataletalek a nayarian na Dios a gawaen imay insipan to.
22 Kanian “sikatoy impasen a matunong lapud satan.”
23 Balet nisulat so balikas a “sikatoy impasen a matunong lapud satan,” aliwan parad sikato labat,
24 noagta parad sikatayo met a pinili na Dios pian nipasen a matunong, lapud manisia itayo ed Dios ya amaoli ed si Jesus a Katawan tayo manlapud inaatey.
25 Sikatoy inyawat lapud saray lingo tayo tan apaoli pian niyabawag itayon matunong.
