Roma 14:1-23
14 Awat yo so toon maletey so pananisia to, balet aliwan pian idesisyonan yo nipaakar ed saray panduaruwa ed puso to.
2 Samay toon mabiskeg so pananisia to et sarag ton kanen so amin a bengatla, balet samay maletey so pananisia to et pisipising so kakanen to.
3 Samay mamangan et agto komon balbalawen imay agmamangan, tan samay agmamangan et agto komon ukomen imay mamangan, ta satan a too et inawat la na Dios.
4 Siopa ka a mangukom ed lingkor ed abung na arum? Balanglan sikatoy onalagey odino natumba, say katawan to so makauley ed satan. On, sikatoy napaalagey, ta nayarian nen Jehova a paalageyen.
5 Ipapasen na sakey a too a mas importante so sakey ya agew nen say arum; ipapasen na sananey nin too a say sakey ya agew et singa met ed arum nira; komon ta balang too et sigpot a kombinsido ed dilin nonot to.
6 Samay manngingilin ed satan ya agew et ngingilinan to itan parad si Jehova. Ontan met, samay mamangan et mamangan parad si Jehova, ta sikatoy misasalamat ed Dios; tan samay agmamangan et agmamangan parad si Jehova, ingen ta misasalamat ed Dios.
7 Diad tua, anggapo ed sikatayo so manbibilay a parad sikato labat, tan anggapo so ompatey a parad sikato labat;
8 ta no manbibilay itayo, manbibilay itayo parad si Jehova, tan no ompatey itayo, ompatey itayo parad si Jehova. Sirin, no manbibilay itayo tan no ompatey itayo, kien itayo nen Jehova.
9 Ta lapud saya et inatey si Kristo tan binmilay lamet, ta pian sikatoy magmaliw a Katawan na saray inaatey tan saray mabilay.
10 Balet akin et uukomen moy agim? Odino akin et balbalawen mo met so agim? Ta amin tayo so onarap ed panangukoman na Dios;
11 ta walan nisulat: “‘Unong a mabilay ak,’ kuan nen Jehova, ‘amin a pueg so ontalimukor ed siak, tan amin a dila so maparungtal a mamidbir ed Dios.’”
12 Kanian sirin, kada sakey ed sikatayo et mikuentaan ed Dios parad sikaton dili.
13 Kanian agtayo la komon uukomen so sakey tan sakey, tan agkayo komon magmaliw a pakatiroran odino pakatumbaan na sakey ya agi.
14 Amtak tan manisia ak ed Katawan a Jesus ya anggapo so bengatla a nisipor a marutak; nilikud labat no say sakey a bengatla et ipapasen na sakey a too a marutak, satan so marutak parad sikato.
15 Ta no say agim et nagogonigon lapud kakanen, agka la mankukurang ed aro. Agmo dederalen itan ya agim lapu labat ed kakanen mo ta inatey si Kristo parad sikato.
16 Kanian, agyo aabuloyan a napansalitaan na mauges so maong a gagawaen yo.
17 Ta say panarian na Dios et agmankabaliksan na panangan tan panag-inum, noagta mankabaliksan na inkatunong tan kareenan tan gayaga diad panamegley na masanton espiritu.
18 Ta samay manpapaaripen ed si Kristo nipaakar ed saya et makapaliket ed Dios tan aabobonan na totoo.
19 Kanian tumboken tayo sirin iray bengatlan mamapawala na kareenan tan saray bengatlan makapabiskeg ed sakey tan sakey.
20 Agmo la dederalen so kimey na Dios nisengeg labat ed kakanen. Tua, amin a bengatla et malinis, balet makaderal iya sano say pangan na sakey a too et pansengegan na ikapuy na pananisia na arum.
21 Maabig so agpangan na karne odino ag-iyinum na alak odino agpanggawa na antokaman a pansengegan na ikapuy na pananisia na agim.
22 Ikanam so pananisiam ed sikan dili diad imaton na Dios. Maliket so too ya agto uukomen so inkasikaton dili unong ed labay ton gawaen.
23 Balet no sikatoy mangan anta manduaruwa, sikatoy naukom la, lapud sikatoy mamangan ya aliwan unong ed pananisia. On, amin a bengatla ya aliwan unong ed pananisia et kasalanan.
