ਯਿਸੂ ਦੀ ਮੌਤ ਤੋਂ ਬਾਅਦ, ਯੂਸੁਫ਼ ਨਾਂ ਦੇ ਇਕ ਅਮੀਰ ਆਦਮੀ ਨੇ ਪਿਲਾਤੁਸ ਕੋਲ ਜਾ ਕੇ ਯਿਸੂ ਦੀ ਲਾਸ਼ ਮੰਗੀ। ਯੂਸੁਫ਼ ਨੇ ਯਿਸੂ ਦੀ ਲਾਸ਼ ਨੂੰ ਸੂਲ਼ੀ ਤੋਂ ਲਾਹ ਕੇ ਉਸ ʼਤੇ ਮਸਾਲੇ ਲਾਏ ਤੇ ਉਸ ਨੂੰ ਵਧੀਆ ਕੱਪੜੇ ਵਿਚ ਲਪੇਟ ਕੇ ਇਕ ਨਵੀਂ ਕਬਰ ਵਿਚ ਰੱਖਿਆ। ਉਸ ਨੇ ਕਬਰ ਦੇ ਮੂੰਹ ʼਤੇ ਇਕ ਵੱਡਾ ਪੱਥਰ ਰੱਖ ਦਿੱਤਾ। ਮੁੱਖ ਪੁਜਾਰੀਆਂ ਨੇ ਪਿਲਾਤੁਸ ਨੂੰ ਕਿਹਾ: ‘ਸਾਨੂੰ ਡਰ ਹੈ ਕਿ ਕਿਤੇ ਯਿਸੂ ਦੇ ਕੁਝ ਚੇਲੇ ਉਸ ਦੀ ਲਾਸ਼ ਨਾ ਲੈ ਜਾਣ ਅਤੇ ਬਾਅਦ ਵਿਚ ਕਹਿਣ ਕੇ ਉਹ ਜੀਉਂਦਾ ਹੋ ਗਿਆ ਹੈ।’ ਇਸ ਲਈ ਪਿਲਾਤੁਸ ਨੇ ਉਨ੍ਹਾਂ ਨੂੰ ਕਿਹਾ: ‘ਕਬਰ ਮੋਹਰੇ ਰੱਖੇ ਪੱਥਰ ਨੂੰ ਸੀਲਬੰਦ ਕਰ ਦਿਓ ਅਤੇ ਪਹਿਰੇਦਾਰਾਂ ਨੂੰ ਖੜ੍ਹੇ ਕਰ ਦਿਓ।’

ਤਿੰਨ ਦਿਨਾਂ ਬਾਅਦ ਸਵੇਰੇ-ਸਵੇਰੇ ਕੁਝ ਔਰਤਾਂ ਕਬਰ ʼਤੇ ਗਈਆਂ। ਉਨ੍ਹਾਂ ਨੇ ਦੇਖਿਆ ਕਿ ਕਬਰ ਦੇ ਮੂੰਹ ਤੋਂ ਪੱਥਰ ਹਟਿਆ ਹੋਇਆ ਸੀ। ਕਬਰ ਦੇ ਅੰਦਰ ਬੈਠੇ ਇਕ ਦੂਤ ਨੇ ਔਰਤਾਂ ਨੂੰ ਕਿਹਾ: ‘ਡਰੋ ਨਾ। ਯਿਸੂ ਨੂੰ ਦੁਬਾਰਾ ਜੀਉਂਦਾ ਕੀਤਾ ਗਿਆ ਹੈ। ਜਾਓ ਅਤੇ ਉਸ ਦੇ ਚੇਲਿਆਂ ਨੂੰ ਕਹੋ ਕਿ ਉਹ ਉਸ ਨੂੰ ਗਲੀਲ ਵਿਚ ਮਿਲਣ।’

ਮਰੀਅਮ ਮਗਦਲੀਨੀ ਪਤਰਸ ਅਤੇ ਯੂਹੰਨਾ ਨੂੰ ਇਹ ਖ਼ਬਰ ਦੇਣ ਲਈ ਭੱਜੀ। ਉਸ ਨੇ ਉਨ੍ਹਾਂ ਨੂੰ ਕਿਹਾ: ‘ਕੋਈ ਯਿਸੂ ਦੀ ਲਾਸ਼ ਲੈ ਗਿਆ ਹੈ!’ ਪਤਰਸ ਅਤੇ ਯੂਹੰਨਾ ਕਬਰ ਵੱਲ ਨੂੰ ਭੱਜੇ। ਜਦੋਂ ਉਨ੍ਹਾਂ ਨੇ ਦੇਖਿਆ ਕਿ ਕਬਰ ਖਾਲੀ ਪਈ ਸੀ, ਤਾਂ ਉਹ ਆਪਣੇ ਘਰਾਂ ਨੂੰ ਚਲੇ ਗਏ।

ਜਦੋਂ ਮਰੀਅਮ ਵਾਪਸ ਕਬਰ ʼਤੇ ਆਈ, ਤਾਂ ਉਸ ਨੇ ਦੋ ਦੂਤਾਂ ਨੂੰ ਕਬਰ ਅੰਦਰ ਬੈਠੇ ਦੇਖਿਆ ਅਤੇ ਉਨ੍ਹਾਂ ਨੂੰ ਕਹਿਣ ਲੱਗੀ: ‘ਮੈਨੂੰ ਨਹੀਂ ਪਤਾ ਕਿ ਉਹ ਮੇਰੇ ਪ੍ਰਭੂ ਨੂੰ ਕਿੱਥੇ ਲੈ ਗਏ ਹਨ।’ ਫਿਰ ਮਰੀਅਮ ਨੇ ਇਕ ਆਦਮੀ ਦੇਖਿਆ ਅਤੇ ਉਸ ਨੂੰ ਮਾਲੀ ਸਮਝ ਕੇ ਕਹਿਣ ਲੱਗੀ: ‘ਵੀਰਾ, ਮੈਨੂੰ ਦੱਸ ਤੂੰ ਉਸ ਨੂੰ ਕਿੱਥੇ ਲੈ ਗਿਆ ਹੈਂ।’ ਪਰ ਜਦੋਂ ਆਦਮੀ ਨੇ ਕਿਹਾ: “ਮਰੀਅਮ,” ਤਾਂ ਉਸ ਨੂੰ ਪਤਾ ਲੱਗ ਗਿਆ ਕਿ ਉਹ ਯਿਸੂ ਸੀ। ਉਹ ਰੋਂਦੇ-ਰੋਂਦੇ ਕਹਿਣ ਲੱਗੀ: “ਪ੍ਰਭੂ!” ਅਤੇ ਉਸ ਦੇ ਗਲ਼ ਲੱਗ ਗਈ। ਯਿਸੂ ਨੇ ਉਸ ਨੂੰ ਕਿਹਾ: ‘ਜਾਹ ਅਤੇ ਮੇਰੇ ਭਰਾਵਾਂ ਨੂੰ ਦੱਸ ਕਿ ਤੂੰ ਮੈਨੂੰ ਦੇਖਿਆ ਹੈ।’ ਉਸੇ ਵੇਲੇ ਮਰੀਅਮ ਚੇਲਿਆਂ ਕੋਲ ਭੱਜੀ ਗਈ ਅਤੇ ਉਨ੍ਹਾਂ ਨੂੰ ਦੱਸਿਆ ਕਿ ਉਸ ਨੇ ਯਿਸੂ ਨੂੰ ਦੇਖਿਆ ਸੀ।

ਉਸੇ ਦਿਨ ਦੋ ਚੇਲੇ ਯਰੂਸ਼ਲਮ ਤੋਂ ਇੰਮਊਸ ਨੂੰ ਜਾ ਰਹੇ ਸਨ। ਇਕ ਆਦਮੀ ਉਨ੍ਹਾਂ ਦੇ ਨਾਲ-ਨਾਲ ਤੁਰਨ ਲੱਗਾ ਅਤੇ ਉਨ੍ਹਾਂ ਨੂੰ ਪੁੱਛਣ ਲੱਗਾ ਕਿ ਤੁਸੀਂ ਕੀ ਗੱਲਾਂ ਕਰ ਰਹੇ ਹੋ। ਉਨ੍ਹਾਂ ਨੇ ਕਿਹਾ: ‘ਕੀ ਤੂੰ ਨਹੀਂ ਸੁਣਿਆ? ਤਿੰਨ ਦਿਨ ਪਹਿਲਾਂ ਮੁੱਖ ਪੁਜਾਰੀਆਂ ਨੇ ਯਿਸੂ ਨੂੰ ਮਰਵਾ ਦਿੱਤਾ ਸੀ। ਪਰ ਹੁਣ ਕੁਝ ਔਰਤਾਂ ਕਹਿ ਰਹੀਆਂ ਹਨ ਕਿ ਉਹ ਜੀਉਂਦਾ ਹੋ ਗਿਆ ਹੈ!’ ਉਸ ਆਦਮੀ ਨੇ ਪੁੱਛਿਆ: ‘ਕੀ ਤੁਸੀਂ ਨਬੀਆਂ ਦੀਆਂ ਗੱਲਾਂ ʼਤੇ ਵਿਸ਼ਵਾਸ ਨਹੀਂ ਕਰਦੇ? ਉਨ੍ਹਾਂ ਨੇ ਕਿਹਾ ਸੀ  ਕਿ ਮਸੀਹ ਮਰੇਗਾ ਅਤੇ ਫਿਰ ਜੀਉਂਦਾ ਕੀਤਾ ਜਾਵੇਗਾ।’ ਉਹ ਉਨ੍ਹਾਂ ਨੂੰ ਆਇਤਾਂ ਸਮਝਾਉਣ ਲੱਗਾ। ਜਦੋਂ ਚੇਲੇ ਇੰਮਊਸ ਪਹੁੰਚੇ, ਤਾਂ ਉਨ੍ਹਾਂ ਨੇ ਉਸ ਆਦਮੀ ਨੂੰ ਆਪਣੇ ਨਾਲ ਆਉਣ ਲਈ ਕਿਹਾ। ਸ਼ਾਮ ਨੂੰ ਜਦੋਂ ਉਨ੍ਹਾਂ ਨੇ ਖਾਣਾ ਖਾਣ ਲਈ ਪ੍ਰਾਰਥਨਾ ਕੀਤੀ, ਤਾਂ ਉਨ੍ਹਾਂ ਨੂੰ ਪਤਾ ਲੱਗਾ ਕਿ ਉਹ ਆਦਮੀ ਯਿਸੂ ਸੀ। ਫਿਰ ਯਿਸੂ ਗਾਇਬ ਹੋ ਗਿਆ।

ਉਹ ਦੋਵੇਂ ਚੇਲੇ ਉਸੇ ਵੇਲੇ ਯਰੂਸ਼ਲਮ ਵਿਚ ਉਸ ਘਰ ਵਿਚ ਗਏ ਜਿੱਥੇ ਰਸੂਲ ਇਕੱਠੇ ਹੋਏ ਸਨ ਅਤੇ ਉਨ੍ਹਾਂ ਨੂੰ ਦੱਸਣ ਲੱਗੇ ਕਿ ਉਨ੍ਹਾਂ ਨਾਲ ਕੀ-ਕੀ ਹੋਇਆ ਸੀ। ਜਦੋਂ ਉਹ ਅਜੇ ਘਰ ਵਿਚ ਹੀ ਸਨ, ਤਾਂ ਯਿਸੂ ਸਾਰਿਆਂ ਸਾਮ੍ਹਣੇ ਪ੍ਰਗਟ ਹੋਇਆ। ਰਸੂਲਾਂ ਨੂੰ ਪਹਿਲਾਂ ਤਾਂ ਯਕੀਨ ਹੀ ਨਹੀਂ ਹੋਇਆ ਕਿ ਉਹ ਯਿਸੂ ਸੀ। ਫਿਰ ਯਿਸੂ ਨੇ ਕਿਹਾ: ‘ਮੇਰੇ ਹੱਥ ਦੇਖੋ ਅਤੇ ਮੈਨੂੰ ਛੂਹ ਕੇ ਦੇਖੋ। ਇਹ ਪਹਿਲਾਂ ਹੀ ਲਿਖਿਆ ਗਿਆ ਸੀ ਕਿ ਮਸੀਹ ਨੂੰ ਮਰੇ ਹੋਏ ਲੋਕਾਂ ਵਿੱਚੋਂ ਜੀਉਂਦਾ ਕੀਤਾ ਜਾਵੇਗਾ।’