IBhayibhili Liyamntshintsha Umuntu

KUYINI okwasiza owesifazana owayengakholwa kuNkulunkulu njalo elomsebenzi omuhle ukuthi abekwazi ukuthi uphilelani? Elinye ijaha elalingena iRoma lafundani mayelani lokufa okwalisiza ukuthi litshintshe impilo yayo? Kanti njalo kuyini okwasiza ijaha elalingathokozi empilweni ukuthi lifunde ngoNkulunkulu? Bala uzizwele ukuthi bathini.

“Ngangihlala Ngizibuza Ukuthi Siphilelani”​—UROSALIND JOHN

UMNYAKA WOKUZALWA: 1963

ILIZWE AZALELWA KULO: EBRITAIN

IMBALI: NGANGILOMSEBENZI OMUHLE

KUDALA KWAMI: Ngazalelwa eCroydon eningizimu yeLondon. Ngakithi abantwana sazalwa saba ngu-9, mina ngingowesi-6. Abazali bami badabuka esihlengeni seCaribbean esiseSt. Vincent. Umama wayesonta iMethodist. Ngangithanda ukufunda izinto ezitshiyeneyo kodwa kangizange ngike ngizihluphe ngokufunda ngoNkulunkulu. Izikolo zazisithi zingavalwa ngiboleke amabhuku e-library ngitshone ngizibalela kwenye indawo eyayiseduze langekhaya.

Kwathi sekudlule iminyaka ngiqede isikolo ngananzelela ukuthi ngangikuthanda ukuncedisa abantu abaswelayo. Ngaqalisa ukuncedisa ababengela ndawo zokuhlala lababegogekile kanye lalabo ababethwala nzima ukubala lokubhala. Ngahamba eyunivesithi, ngathi sengiqedile ngathola umsebenzi owawulemali ezwayo. Ngasengikhomba ngophakathi! Kwakungela sidingo sokuthi ngisebenzele ewofisini, kimi okwakufuneka kuphela yi-laptop yami le-inthanethi. Yikho ngangisenelisa ukuvakatsha ngiye emazweni atshiyeneyo ngizihlalela lasemawoteleni abizayo. Lanxa ngasengiphila impilo ebuntofontofo angizange ngekele ukucabanga ngabantu ababethwele nzima.

INDLELA IBHAYIBHILI ELANGITSHINTSHA NGAYO: Ngangihlala ngizibuza ukuthi siphilelani. Kodwa angizange ngike ngizihluphe ngokudinga izimpendulo eBhayibhilini. Ngelinye ilanga ngo-1999, umnawami okuthiwa nguMargaret owayesenguFakazi wangivakatshela lomngane wakhe owayekhanya elomusa. Ngavuma ngesikhathi umngane wakhe ecela ukufunda lami iBhayibhili kodwa ngangingathuthuki ngoba ngangingahlali phansi.

Kwathi sokuphakathi kuka-2002, ngathuthela eningizimu ye-England. Ngafika ngaqhubekela phambili ngemfundo yami yeyunivesithi. Sengikhonale ngaqalisa ukungena imihlangano eWolu yoMbuso lomntanami. Ngangikukholisa sibili engangikufunda eyunivesithi kodwa ngananzelela ukuthi engangikufunda eBhayibhilini kwakungivula ingqondo ngoba ngasengizwisisa ukuthi kuyini okwenza abantu bahlupheke lokuthi inhlupho lezo zizalungiswa njani. Ngalizwisisa iqiniso elikuMathewu 6:24, okhuluma ngokuthi umuntu ngeke akhonze amakhosi amabili. Kuyabe kumele akhethe ukuthi uzakhonza uNkulunkulu kumbe inotho. Kwasekumele ngikhethe ukuthi ngizaqakathekisani empilweni yami.

Ngo-2001 ngangijayele ukuhamba esifundweni seBhayibhili saphakathi kweviki saboFakazi, lapho ababefunda khona ibhuku elithi Is There a Creator Who Cares About You? a Isifundo lesi senza ngangathandabuzi ukuthi nguJehova uMdali wethu kuphela ongaqeda inhlupho zabantu. Eyunivesithi babesifundisa ukuthi izinto zazivelela, kazidalwanga. Akuzange kungiphathe lokho yikho ngemva kwezinyanga ezimbili ngahle ngatshiya, ngazimisela ukuqakathekisa ukukhonza uNkulunkulu.

Ivesi eyanginceda ukuthi ngitshintshe nguZaga 3:5, 6 othi: “Themba uJehova ngenhliziyo yakho yonke, ungathembi okwakho ukuzwisisa. Mdinge kuzo zonke izindlela zakho, yena uzaqondisa izindlela zakho.” Engakufunda ngoNkulunkulu kwenza ngathokoza kulakuqala lanxa ngangilemali futhi ngifundile. Ngathi sengifunde ukuthi uJehova wawudalelani umhlaba lalokho uJesu asenzela khona, ngazinikela ngasengibhabhathizwa ngo-April 2003. Kancane kancane ngatshintsha indlela engangiphila ngayo.

INDLELA ENGISIZAKALE NGAYO: Ubungane bami loJehova ngiyabuqakathekisa kakhulu ngoba sobungenze ngahlaliseka njalo ngathokoza. Ngiyakukholisa kakhulu ukuba labafowethu labodadewethu ebandleni.

Lokhe ngisakuthanda ukufunda futhi kunengi engikufunda eBhayibhilini lasemihlanganweni yebandla. Kumnandi lokuxoxela abanye lokho engikukholwayo ngoba engibafundisa khona kuyabanceda khathesi lasesikhathini esizayo. Kusukela ngoJune 2008 bengiliphayona lesikhathi sonke. Angikaze ngithokoze kangaka empilweni yami. Ngiyambonga kakhulu uJehova ngokungincedisa ukuthi ngimazi. Khathesi sengikwazi sibili ukuthi ngiphilelani.

“Ukufa Komngane Wami Kwangizwisa Ubuhlungu Kakhulu.”​—UROMAN IRNESBERGER

UMNYAKA WOKUZALWA: 1973

ILIZWE AZALELWA KULO: E-AUSTRIA

IMBALI: NGANGITHANDA UKUBHEJA

KUDALA KWAMI: Ngakhulela edolobheni elincane okuthiwa yiBraunau, eAustria. Abantu ababehlala endaweni le babenothile futhi ubugebengu babungandanga. Ngakithi sasingamaRoma.

Okwenzakala ngisasemncane kwangethusa kakhulu. Kwakungo-1984 ngileminyaka engaba ngu-11, ngikhumbula sizidlalela ibhora lomngane wami ekuseni. Sekusemini ngezwa kuthiwa ufele engozini yemota. Ukufa komngane wami kwangizwisa ubuhlungu kakhulu. Ngemva kwengozi le ngahlala iminyaka leminyaka ngizibuza ukuthi kwenzakalani nxa umuntu angafa.

Sengiqedile isikolo ngaqalisa ukusebenza ukulungisa amagetsi. Angizange ngibe lezikwerede lanxa ngangisebenzisa imali enengi ngibheja. Ngangithanda lezemidlalo kanye lomculo we-rock. Ngangitshona emaphathini ngizikholisela. Ngasengiphilela ubunandi futhi ngangingaziphathanga. Lanxa kunjalo ngangingathokozi.

INDLELA IBHAYIBHILI ELANGITSHINTSHA NGAYO: Ngo-1995 kwafika enye indoda eyayisikhulile enguFakazi emzini wami yanginika ibhuku elaliphendula umbuzo othi, Kwenzakalani nxa umuntu angafa? Ngalithatha ibhuku lelo ngoba ngangilokhe ngikhathazwa yikufa komngane wami. Angizange ngibale isahluko esasikhuluma ngokufa kuphela ngahle ngalibala ngaliqeda lonke.

Engakubalayo kwayiphendula yonke imibuzo engangilayo ngokufa. Ngafunda lokunye okunengi, phela thina sasiqakathekisa kakhulu uJesu njengoba sasingamaKatolika. Kodwa ngathi sengibale iBhayibhili ngaba lobungane obukhulu loJehova uNkulunkulu uYise kaJesu. Ngathokoza ngisibakwazi ukuthi uJehova uyasithanda futhi uyafuna sibemazi. (UMathewu 7:7-11) Ngafunda lokuthi esikwenzayo kungamthokozisa kumbe kumdanise. Ngazwisisa lokuthi uyagcina izithembiso azenzayo. Ukwazi lokhu kwenza ngathanda ukubala iziphrofetho eziseBhayibhilini lokudingisisa ukuthi zigcwaliseke njani. Ukholo lwami lwaqina ngesikhathi ngibona ukuthi ilizwi likaJehova aliweli phansi.

Ngaqalisa ukunanzelela ukuthi oFakazi bakaJehova yibo bodwa abazimiseleyo ukuncedisa abantu bazwisise iBhayibhili. Ngangisithi nxa ngibala amabhuku aboFakazi ngivule iBhayibhili lami lamaKatolika ngikhangele amavesi akhona. Ukwenza njalo kwangenza ngazibonela ukuthi sengilitholile iqiniso.

Ukufunda iBhayibhili kwangenza ngabona ukuthi uJehova ufuna ngilalele imithetho yakhe. Ngesikhathi ngibala u-Efesu 4:22-24 kwangicacela ukuthi kumele ‘ngikhiphe ubuntu obudala obuhambelana lendlela engangiziphatha ngayo kudala, besengigqoka ubuntu obutsha obadalwa ngentando kaNkulunkulu.’ Ngatshiya ukungaziphathi, ngayekela lokubheja ngoba kwakukhuthaza ukuba yisihwaba lokuthanda inotho. (1 KwabaseKhorinte 6:9, 10) Ngangikwazi mhlophe ukuthi ukuze ngitshintshe impilo yami kumele ngiqale ngitshintshe abangane bami, ngidinge abangane abathanda uJehova.

Kwakunzima ukuthi ngibatshiye abangane bami. Ngaqalisa ukuya eWolu yoMbuso yaboFakazi bakaJehova futhi ngaqalisa ukuba labangane ebandleni. Ngaqhubeka ngihlolisisa iBhayibhili ngingedwa. Konke lokho kwanginceda ukuthi ngitshintshe umculo engangiwuthanda, lokho engangikufisa empilweni kanye lendlela engangigqoka ngayo. Ngabhabhathizwa ngo-1995 ngaba nguFakazi kaJehova.

INDLELA ENGISIZAKALE NGAYO: Khathesi angisayiqakathekisi kakhulu imali. Kudala ngangiphangisa ukuzonda kodwa khathesi sengisenelisa ukuzibamba. Angisakhathazeki ngekusasa.

Kumnandi ukuba senhlanganisweni kaJehova, lanxa abantu bakhona behlangana lobunzima baqhubeka bekhonza uJehova bethembekile. Ngiyathokoza kakhulu ngoba khathesi ngisebenzisa isikhathi sami lamandla ami ngikhonza uJehova futhi ngisenzela abanye okuhle kulokuthi ngiqakathekise kakhulu okufunwa yimi.

“Sengithokoza Sibili.”​—U-IAN KING

UMNYAKA WOKUZALWA: 1963

ILIZWE AZALELWA KULO: E-ENGLAND

IMBALI: NGANGINGATHOKOZI EMPILWENI

KUDALA KWAMI: Ngazalelwa e-England kodwa ngathi sengileminyaka engaba ngu-7 imuli yangakithi yathutha yayahlala e-Australia. Safika sahlala eQueensland. Indawo le ivakatshelwa ngabantu abanengi. Lanxa imuli yangakithi yayinganothanga, sasingasweli lutho kodwa ngangingathokozi empilweni.

Ubaba wayebukhelela. Ngangingamthandi kakhulu ngoba izikhathi ezinengi wayedakwa futhi ehlukuluza umama. Ngokuhamba kwesikhathi ngaqalisa ukumzwisisa ngoba ngabakwazi ukuthi okwakusenza enze njalo yilokho okwenzakala kuye elisotsha eMalaysia.

Sengisesekhondari ngaqalisa ukububhudla utshwala. Ngatshiya isikolo ngileminyaka engu-16 ngaya esisotsheni. Ngaqalisa ukusebenzisa izidakamizwa futhi ngasengiphilela ukubhema igwayi. Ngangingasenelisi ukwenza loba yini nginganathanga utshwala. Ekuqaliseni ngangibunatha kakhulu ngempelaviki kodwa ngokuhamba kwesikhathi ngasengibunatha nsuku zonke.

Ngathi sengileminyaka engaba ngu-20 ngaqalisa ukuthandabuza ukuthi kuloNkulunkulu. Ngangisithi nxa kuyikuthi ukhona manje yindaba evumela ukuthi abantu bahlupheke futhi bafe. Ngaze ngabhala lenkondlo ngisola uNkulunkulu ngobubi obugcwele emhlabeni.

Ngatshiya isisotsha sengileminyaka engu-23. Ngemva kwalokho ngenza imisebenzi etshiyeneyo njalo ngaqeda umnyaka wonke ngivakatshela kwamanye amazwe. Kodwa lokhu akuzange kungenze ngithokoze. Ngangiphonguphila nje, akulalutho engangihlela ukulwenza empilweni. Ukuba lendlu lomsebenzi olemali kwakungeke kungincede ngalutho. Into eyayingenza ngizizwe ngingumuntu yikunatha utshwala lokulalela izingoma.

Ngikhumbula ngelinye ilanga ngizibuza ukuthi siphilelani. NgangisePoland ngalezonsuku ngivakatshele enkambeni yokuhlukuluzwa ese-Auschwitz. Ngangike ngabala ngezinto ezimbi ezazisenziwa lapho. Kodwa ngathi sengizibonela ngawami ukuthi inkamba zakhona zazinganani ngezwa ubuhlungu obuzwayo. Kambe umuntu wayengaba lesihluku esingako komunye umuntu? Ngehlisa inyembezi ngesikhathi ngibhodabhoda enkambeni leyo ngihamba ngizibuza ukuthi, ‘Kanti vele kwasekutheni?’

INDLELA IBHAYIBHILI ELANGITSHINTSHA NGAYO: Ngo-1993 ngabuyela e-Australia. Ngafika ngaqalisa ukubala iBhayibhili ngidinga izimpendulo zemibuzo engangilayo. Kungayingaphi ngavakatshelwa ngoFakazi bakaJehova ababili, banginxusa emhlanganweni wabo owawusenzelwa enkundleni eyayiseduze lalapho engangihlala khona.

Ngahamba emhlanganweni lo futhi engakubona lapho kwangitshiya ngibambe owangaphansi. Ngangike ngahamba enkundleni le ngisiyabukela umdlalo kodwa abantu ababesemhlanganweni lo babetshiyene kakhulu labantu engangike ngababona enkundleni le. OFakazi babelobuntu, begqoke kuhle futhi abantwababo babelembeko. Okwenzakala ngesikhathi sekhefu kwangimangalisa. Lanxa babedlela enkundleni akuzange kusale kungcolile. Okuhle kakhulu engakuthandayo yikuthi abantu laba babekhanya besuthisekile futhi belokuthula. Lokhu yikho engangikufuna empilweni yami. Angikhumbuli ngitsho leyodwa inkulumo eyakhulunywa ngalelolanga, kodwa ukuziphatha kwaboFakazi kwangithinta kakhulu.

Ngalobobusuku ngakhumbula umzawami owayebala iBhayibhili futhi ethanda ukufunda ngalokho okwenzakala ezinkolweni ezitshiyeneyo. Phela eminyakeni edlulileyo wayeke wangitshela ukuthi uJesu wathi sizabona inkolo yeqiniso ngokukhangela indlela abantu bakhona abaziphatha ngayo. (UMathewu 7:15-20) Yikho ngabona kungcono ukuthi ngike ngihlole oFakazi ukuze ngithole ukuthi kuyini okwenza bangafanani labanye abantu. Kwakungokokuqala ngqa empilweni yami ukuthi ngibe lethemba elizangenza ngithokoze.

Ngeviki eyalandelayo oFakazi ababili ababenginxuse emhlanganweni baphinda bangivakatshela. Bacela ukufunda lami iBhayibhili ngavuma futhi ngaqalisa ukungena imihlangano.

Ngathi sengiqalise ukufunda iBhayibhili ngananzelela ukuthi ayisuye uNkulunkulu obangela izinto ezimbi lokuhlupheka okusemhlabeni. Ngafunda lokuthi uzwa ubuhlungu nxa abantu besenza izinto ezimbi. (UGenesisi 6:6; IHubo 78:40, 41) Yikho ngazimisela ukuthi ngiyekele ukwenza izinto ezizwisa uJehova ubuhlungu njalo ngasengifuna ukuthokozisa inhliziyo yakhe. (IZaga 27:11) Ngatshiya ukunatha kakhulu lokubhema igwayi kanye lokungaziphathi. Ngabhabhathizwa ngoMarch 1994 ngaba nguFakazi kaJehova.

INDLELA ENGISIZAKALE NGAYO: Khathesi sengithokoza okwamagama. Angisanathi utshwala ukuze ngiqede inhlupho zami. Sengikwazi ukuthi nxa ngilohlupho ngiyathandaza kuJehova.—IHubo 55:22.

Sengileminyaka engu-10 ngitshade lomkami omuhle onguFakazi okuthiwa nguKaren. Sihlala lendodakazi yakhe uNella. Imuli yethu iyakuthanda ukutshumayela ngoba siyabe sincedisa abanye ukuthi bafunde iqiniso ngoNkulunkulu. Sengithokoza sibili.

[Amabala angaphansi]

[Umfanekiso]

[Umfanekiso]

[Umfanekiso]

[Umfanekiso]

[Umfanekiso]

[Umfanekiso]