Wakat-bʋg la koe-noogã mooneg na n sa?

A Zeezi yeelame: “Rĩungã koe-no-kãngã na n moona dũniyã tɛk fãa tɩ yɩ kaset buud toɛy-toɛyã fãa yĩnga. Yaa rẽ poor la saabã na n ta.” (Mat. 24:14) Gɛrkã gom-bil ning b sẽn lebg vɛrse-kãngã pʋgẽ, n paas vɛrse a 6 la 13 pʋgẽ tɩ “saabã” yaa telos. Yaa a Sʋɩtãan dũniyã saab sẽn na n yɩ Armagedõ wã yell la b gomd vɛrse-kãens pʋsẽ. (Vẽn. 16:14, 16) Rẽnd d na n kell n moona koe-noogã hal n tãag dũniyã saabo. Woto yaa bũmb b sẽn maneg n bilg tɩ yaa toor ne d sẽn da wʋmd yɛlã võor to-to wã.

Pĩndã d ra tagsdame tɩ to-kãsengã sã n wa sɩng ne Babilon-kãsengã sãoongo, d na n basa koe-noogã moonego. (Vẽn. 17:3, 5, 15, 16) D ra tẽedame tɩ rẽ n na n yɩ “a Zeova maan-neer yʋʋmdã” saabo. (Eza. 61:2) D ra tagsdame me tɩ neb nins sẽn na n põs to-kãsengã sasa wã na n yɩɩ sẽn zoe n wilg-b tɩ b maanda sɩd ne a Zeova nand tɩ to-kãsengã sɩngã. D ra makd-b-la ne Zʋɩf-rãmb nins sẽn põs Zerizalɛm sãoongã sasa, yʋʋmd 607 sẽn deng a Zeezi rogmã. B ning-b-la bãnd sẽn na yɩl tɩ b põs nand tɩ Zerizalɛm sãoongã ta, bala b ra tũuda a Zeova la b kis wẽnga. (Eze. 5:11; 9:4) La makr a woto pa zems ne a Zeezi goam nins sẽn be Matiye 24:14 ye. Bala gom-kãens wilgdame tɩ nebã na n ket n tara weer n tõe n kelg koe-noogã hal n tãag saabã sẽn na n yɩ Armagedõ wã.

B sẽn maneg n bilg Matiye 24:14 kɩtame tɩ d segd n toeem d sẽn wʋmd Vẽnegr 16:21 goamã võor to-to wã. Be, b gomda koɛɛg d sẽn na n moon yelle, n mak-a ne sapɩlma. D sẽn maag d yĩng n bao n wʋm vɛrse-kãens võorã kɩtame tɩ d bãng tɩ b goamã lokda taaba. Bõe n kɩt tɩ d yet woto? Yaa nebã manesem sẽn yaa to-to ne Rĩungã koɛɛgã. Tẽn-tʋmd a Poll yeelame tɩ ne “neb nins sẽn paamd fãagrã,” koe-noogã tara “vɩɩm yũugu,” la tɩ ne Wẽnnaam bɛɛbã a yaa koe-beedo, n tar “kũum yũugu.” (2 Kor. 2:15, 16) B kisa Rĩungã koɛɛgã bala a pukda b bãongo. A wilgdame tɩ dũni ning b sẽn nongã yaa wẽnga, t’a Sʋɩtãan n so-a, la tɩ b na n sãam-a lame.—Zã 7:7; 1 Zã 2:17; 5:19.

Tẽeg-y me tɩ b wilgame tɩ koɛɛg ning b sẽn mak ne sapɩlmã na n waa ne “sãoong wʋsgo.” Tõe tɩ rẽ rat n yeelame tɩ to-kãsengã sasa, koe-moonegã na n paama pãng wʋsgo, tɩ neb wʋsg bãng a Zeova yʋʋrã n yɩɩd pĩndã. (Eze. 39:7) Wakat kãnga, Babilon-kãsengã sãoong poore, neb kẽer sũur n na n yɩ noog ne koe-noogã t’a lebg bũmb sẽn tar yũ-noog b nifẽ bɩ? Tõe tɩ yɩ woto. Tõe tɩ b na n tẽegame tɩ yʋʋm wʋsg pʋgẽ, a Zeova Kaset rãmbã ra moondame n gomd ziri tũudmã sãoong yelle, wall b bãng rẽ.

D tõe n dɩka rẽ n mak ne bũmb ning sẽn maan pĩnd wẽndẽ Ezɩptã pʋgẽ, a Zeova sẽn kɩt tɩ tood piig paam-bã poorã. A Zeova “[sẽn sɩbg] Ezɩpt wẽnnaam-dãmbã fãa” wã poore, “neb kʋʋng sẽn yaa buud toor-toor neb” n wa n naag a nin-buiidã. (Yik. 12:12, 37, 38) Tõe tɩ yaa nin-kãens sẽn yã t’a Moyiiz sẽn yeel bũmb ning tood piigã wɛɛngẽ wã pidsame wã n kɩt tɩ b yãk yam n na n tũ a Zeova.

Neb nins sẽn na n yãk yam n tũ a Zeova Babilon-kãsengã sãoong poorã na n paam n sõnga Kirist ba-biis nins sẽn na n ket tẽngã zugã. (Mat. 25:34-36, 40) La bilf nand tɩ Armagedõ sɩnge, sẽn paam-b vʋʋsem sõng zaeeb n ket tẽngã zugã na n kẽnga saasẽ n tɩ reeg b keoorã. Rẽ poore, ned pa na n le paam weer n tõog n toeem tɩ b yeel t’a naaga Kirist piisã ye.

B sẽn maneg n bilg yɛlã võor woto wã kɩtame tɩ d neẽ t’a Zeova nonglmã la a nimbãan-zoeerã sɩd yaa wʋsgo. Sɩd-sɩda, “a pa rat tɩ ned baa a ye sãam ye. A ratame tɩ nebã fãa tek yam n kos sugri.”—2 Pɩy. 3:9.