Ne Tito 1:1-16
1 An Paulo, misumba Nyasaye kendo jaote mar Yesu Kristo kaluwore gi yie mar jo ma Nyasaye oseyiero, kaluwore gi ng’eyo malong’o e wi adiera ma miyo ng’ato chiwore ne Nyasaye,
2 kendo kaluwore gi geno mar ngima ma nyaka chieng’+ ma Nyasaye ma ok nyal riambo+ nosingo chon ahinya;
3 to ka ne ndalo moketo owuon nosechopo, nomiyo wachne ong’ere kokalo kuom tij yalo ma nomiya+ kaluwore gi chik mar Jawarwa, ma en Nyasaye.
4 Andikoni in Tito, nyathina madier ma wan-go e yie achiel:
Ng’wono mogundho kod kuwe mar Nyasaye Wuoro kod Kristo Yesu Jawarwa mondo obed kodi.
5 Ne aweyi Krete mondo irie weche mobam kendo mondo iket owete obed jodong-kanyakla, kitimo kamano e dala ka dala mana kaka ne achiki:
6 iket ng’at ma onge wach minyalo donjnego, chwor dhako achiel, ng’at ma nyithinde ni e yie to gionge bura nikech tim anjawo kata wich-teko.+
7 Nimar kaka jatich Nyasaye, jarit nyaka bed ng’at ma onge wach moro minyalo donjnego. Kik obed ng’at ma wiye tek,+ kata ng’at ma iye wang’ piyo,+ kata jamer, kata ng’at mager, kata ng’at ma oowore gi yudo ohala e yor mibadhi,
8 to obed ng’at mohero rwako ji,+ mohero timbe mabeyo, ma pache long’o,+ ng’at makare, ma makore motegno gi jomoko,+ ma nigi ritruok,+
9 ma makore motegno gi wach migeno e lonyne mar puonjo,+ eka obed gi nyalo mar jiwo ji gi puonj mangima,*+ kendo kwero+ jogo ma kwedo puonjno.
10 Nimar nitie jong’anyo mang’eny, jowach weche manono, kendo jowuond, to moloyo, jogo ma makore gi wach nyangu.+
11 Dwarore ni imi dho jogo, nimar jogo bende e ma siko ka loko ute ji ka giketho joot duto kuom puonjo gik ma ok onego gipuonj, nikech gidwaro yudo ohala e yor mibadhi.
12 Nitie achiel kuomgi ma en janabi margi, ma nowacho kama: “Kinde duto Jo-Krete gin jomiriambo, ondiegi maricho, kendo gin jowuoro ma josamuoyo.”
13 Mano en adier. Kendo mano e momiyo sik kikwerogi matek ahinya eka mondo gibed jo ma nigi yie motegno,
14 ma ok gichik itgi ne sigendni mochuogi mag Jo-Yahudi kod chike jo ma oweyo adiera.
15 Kuom jo maler, gik moko duto ler;+ to kuom jo ma ochido kendo ma onge yie onge gima lernegi, nimar pachgi kod nyalogi mar pogo ber gi rach ochido.+
16 Gihulo e lela ni ging’eyo Nyasaye to koni gikwede kuom timbegi,+ nikech gidwanyore kendo ok giluw kaka ichikogi. Bende, ok giwinjore ne tich moro amora maber.
Weche Moler Piny
^ Kata, “puonj ma konyo; puonj mowinjore.”
