Malaki 1:1-14
1 Ote mapek:
Wach ma Jehova owacho ne Jo-Israel kokalo kuom Malaki:*
2 “Aseherou”+ Jehova owacho.
Kata kamano, un upenjo niya: “Iseherowa nade?”
“Donge Esau ne en owadgi Jakobo?”+ Jehova owacho. “Nahero Jakobo,
3 to nasin gi Esau;+ kendo ne amiyo godene odong’ gunda+ mi pokne nodong’ ne bwe manie thim.”+
4 “Kata ka Edom owacho ni, ‘Osekethwa, to pod wabiro duogo mi wager kuonde mowe,’ to ma e gima Jehova Nyasach oganda lweny owacho, ‘Adier, ginigedi, to anamuk kuondego. Kendo ibiro luonggi ni “piny joricho,” kendo ni, “oganda ma Jehova osekumo nyaka chieng’.”+
5 Wengeu biro neno mano, mi unuwach niya: “Mad Jehova oyud duong’ e piny Israel.”’”
6 “‘Wuoyi miyo wuon-gi luor,+ kendo jatich bende miyo ruodhe luor. An dak umiya luor to an e wuonu?+ Kendo ka an e ruodhu,* ang’o momiyo ok umiya luor?’ Jehova Nyasach oganda lweny wachonu, un jodolo mochayo nyinga.+
“‘To pod upenjo niya: “Ere kaka wasechayo nyingi?”’
7 “‘Uchiwo chiemo* ma ok ler e wi kendona mar misango.’
“‘Kendo upenjo niya: “Ere kaka wasechidi?”’
“‘Kuom wacho kama: “Mesa mar Jehova+ ok owinjore omi duong’.”
8 Sa ma uchiwo le ma muofu kaka misango uwacho niya: “Onge gima rach.” Kendo sa ma uchiwo le mong’ol kata ma tuo to uwacho niya: “Onge gima rach.”’”+
“Koro, temuru chiwo leno ne gavana maru. Be obiro rwakou kata mor kodu?” Jehova Nyasach oganda lweny owacho.
9 “Asayou kwauru Nyasaye mondo onyiswa ng’wono. Ka lweteu chiwone gik ma kamago be onyalo rwako ng’ato ang’ata kuomu gi mor?” Jehova Nyasach oganda lweny owacho.
10 “Be nitie ng’ato kuomu ma oikore loro dhoudi?*+ Nimar ok unyal kata mana moko mach e kendo mar misango ka ok ochulu.+ Ok amor kodu,” Jehova Nyasach oganda lweny owacho, “kendo ok amor gi mich moro amora ma lwetu chiwona.”+
11 “Nimar kochakore sa ma chieng’ wuokie nyaka sa ma opodhoe, nyinga biro bedo maduong’ e kind ogendni.+ Kuonde duto ibiro chiw misengni miwang’o, kaachiel gi chiwo mamoko ne nyinga, kaka mich maler; nikech nyinga nobed maduong’ e kind ogendni,”+ Jehova Nyasach oganda lweny owacho.
12 “To un e ma udwanye*+ kuom wacho ni, ‘Mesa mar Jehova ok ler, kendo ok owinjore omi olembene kod chiembe duong’.’+
13 Uwacho bende ni, ‘Thoo! Wecheni oolowa!’ kendo utwenyone umu,” Jehova Nyasach oganda lweny owacho. “Kendo ukelo jamni mokwal, mong’ol, kendo ma tuo kaka misango, ee ukelo gik ma kamago kaka mich! Be uparo ni abiro yie gi chiwogo?”+ Jehova owacho.
14 “Okuong’ ng’at ma nigi nyayim maber e kueth to pod owuondore mi otimo singruok ne Jehova gi le mong’ol. Nimar an Ruoth maduong’,”+ Jehova Nyasach oganda lweny owacho, “kendo nyinga ibiro mi luor e kind ogendni.”+
Weche Moler Piny
^ Tiende ni, “Jaotena.”
^ Kata, “ruodhu maduong’.”
^ Hibrania, “makate.”
^ Nyaka bed ni iwuoyo kuom migawo mar loro dhoudi mag hekalu.
^ Kata nyalo bedo, “udwanya.”
