Samuel Mokwongo 25:1-44

  • Samuel tho (1)

  • Nabal riembo jo ma Daudi ooro (2-13)

  • Abigail tiyo gi rieko (14-35)

    • ‘Jehova biro boyo ngimani maber e ofuko mar ngima’ (29)

  • Jehova ochwado Nabal ng’at mofuwo motho (36-38)

  • Daudi kendo Abigail (39-44)

25  Bang’ kinde, Samuel+ notho mi Jo-Israel duto ne ochokore mondo oywage kendo ne giike but ode e dala mar Rama.+ Kae to Daudi ne owuok modhi e thim mar Paran.  Koro ne nitie ng’at moro e piny Maon+ ma ne tiyo Karmel.*+ Ne en gi mwandu mang’eny ahinya; ne en gi rombe 3,000 kod diek 1,000. Kendo ne ojalielo rombene Karmel.  Nying ng’atno ne en Nabal+ kendo ne en ja dhood Kaleb,+ to chiege ne iluongo ni Abigail.+ Chiegeno ne riek kendo ne jaber, to en noger kendo timbene ne richo.+  Daudi nowinjo ka en e thim ni Nabal lielo rombene.  Omiyo, Daudi nooro ji apar ir Nabal kochikogi niya: “Dhiuru Karmel ir Nabal kendo ka uyude to umosnago.  Kae to unyise ni, ‘Mad idag aming’a gi kuwe in kaachiel gi joodi kendo gimoro amora mitimo odhi maber.  Koro awinjo ni ilielo rombeni. To ka ne wan gi jokwadhi e thim, ne ok watimonegi gimoro marach+ kendo onge gimoro amora ma nolalnegi kinde duto ma ne gin Karmel.  Ka ipenjo jokwadhigo, to gibiro nyisi ni en adier. Yie mondo inyis joga ng’wono nimar wabiro iri e sa maber. Kiyie, to mi Daudi wuodi kod jotichni gimoro amora ma diher miyogi.’”+  Kuom mano, jotij Daudi ne odhi ir Nabal ma ginyise gik moko duto ma Daudi nowachonegi. To ka ne gisenyise wechego, 10  Nabal nodwokogi kama: “Daudi to ng’a? Wuod Jesse to en ng’a? Tinde jotich mang’eny ringo jotendgi.+ 11  Ere kaka dakaw makatena, gi piga, kod ring’o mayang’o ne jotija ma lielona rombe kae to ami ng’at ma ok ang’eyo kata ka ma aye?” 12  Ka ne jotij Daudi owinjo kamano, ne gidok ma ginyise wechego. 13  Gikanyono, Daudi ne onyiso joge niya: “Ng’ato ka ng’ato okaw liganglane!”+ Omiyo, ne gikawo liganglagi. Daudi bende ne okawo liganglane mi owuok gi ji ma romo 400, to ji 200 ne odong’ ka rito osike. 14  Gie kindeno, jatich moro nodhi ir Abigail chi Nabal mi onyise niya: “Daudi ne ooro joote koa e thim mondo obi omos ruodha to ne oyanyogi.+ 15  Jogo ne otimonwa maber ahinya kinde ma ne wan kodgi e thim.+ Ne ok gitimonwa marach kendo onge girwa ma nolal kindego duto. 16  Ne gin kaka ohinga molworowa odiechieng’ gotieno kuom kinde duto ma ne wan kodgi ka wakwayo. 17  Koro par gima ibiro timo nikech masira ochomo ruodhwa gi joode,+ kod jotije duto, nimar ruodhwa en ng’at manono+ ma onge ng’at ma diwuo kode.” 18  Gikanyono, Abigail+ ne okawo makate 200, gi divai agulni ariyo madongo, gi rombe abich ma oseyang’, gi cham mobul ogunde* abich, gi kek 100 molos gi mzabibu, kod kek 200 molos gi olemb ng’owo mi oketogi e wi punda.+ 19  Eka nonyiso jotije niya: “Teluru aluwou.” Kata kamano, ne ok onyiso Nabal wachno. 20  Ka ne Abigail ni e wi punda koridore to Daudi gi joge bende ne ridore ka gichome, apoya nono ne giromo nikech got nogeng’ogi. 21  Daudi nosebedo ka wacho e chunye kama: “Ne athagora kayiem nono karito mwandu ng’atni e thim kendo onge gire ma ne olal.+ To kuom bergo duto, en otimona mana marach.+ 22  Nyasaye mondo ochul kuor kuom wasika ka po ni kiny piny oru ka pok anego chwo duto e ode.” 23  Ka ne Abigail oneno Daudi, nolor e pundane mapiyo mi okulore e nyime. 24  Ne opodho e tiend Daudi mi owachone niya: “Ruodha, we mondo kethono obed e wiya; yie mondo awuo kodi kendo iwinj kwayona. 25  Kiyie ruodha, kik idew weche mag Nabal ng’at manono,+ nimar ochal gi nyinge. Nyinge Nabal* kendo fuwo ni kuome. Kuom adier ruodha, an to ne ok aneno jo ma ne ioro. 26  To koro ruodha, akuong’ora gi nying Jehova kendo akuong’ora e nyimi ni Jehova e ma osegeng’i+ mondo kik ichuer remo+ kendo kik ichul kuor gi lweti iwuon. Mad gima dhi timore ne Nabal otimre bende ne wasiki duto. 27  Koro yie ikaw mich+ ma akelonigi ruodha mondo imi jogi.+ 28  Asayi, yie iwe ne jatichni ma nyako kethone. Ang’eyo ni Jehova biro miyo od ruodha osik nyaka chieng’+ nikech ruodha kedo lwenje mag Jehova+ kendo onge gima rach moseyud kuome e ngimane duto.+ 29  Ka ng’ato otemo lawi mondo onegi yaye ruodha, Jehova Nyasachi biro boyo ngimani maber e ofuko mar ngima, to ngima wasiki obiro diro mabor ka kite ma oba gi orujre. 30  Kendo ka Jehova osetimoni gik mabeyo duto ma ne osingo mi oketi ruodh Israel,+ 31  chunyi ok bi chandi nikech ne ok ichuero remb ng’ato kayiem nono kendo ne ok ichulo kuor gi lweti iwuon.+ Ruodha, ka Jehova oguedhi, kik wiyi wil koda.” 32  Eka Daudi ne onyiso Abigail kama: “Opak Jehova Nyasach Israel ma oseori mondo ibi irom koda kawuononi! 33  Nyasaye mondo oguedhi nikech riekoni kendo nikech igeng’a kawuono mondo kik achuer remo+ kendo kik achul kuor gi lweta awuon. 34  Nimar ka dine ok ireto miromona,+ akuong’ora gi nying Jehova Nyasach Israel mosegeng’a mondo kik ahinyi,+ ni danego chwo duto manie od Nabal ka piny pok oru.”+ 35  Eka Daudi ne okawo mich ma Abigail nokelone monyise niya: “Dog e odi gi kuwe. Asewinji kendo abiro timo mana kaka isekwaya.” 36  Abigail nodok ir Nabal moyude kobago chiemo e ode mana ka ruoth, kendo chuny Nabal ne mor nikech nomer ahinya. Abigail ne ok onyise gimoro amora chieng’no. Ne orito nyaka kinyne gokinyi. 37  Kinyne ka kong’o noserumo e wang’ Nabal, Abigail ne onyise wechego mi chunye ne otho ka kidi. 38  Bang’ ndalo apar kama, Jehova ne ochwado Nabal motho. 39  Ka ne Daudi owinjo ni Nabal otho, nowacho niya: “Opak Jehova Nyasaye mosechulo kuor+ kuom achaya ma Nabal ne ochayago,+ kendo mosegeng’a mondo kik atim gima rach.+ Jehova oduoko richo mar Nabal e wiye owuon!” Bang’ mano, Daudi ne ooro wach ne Abigail ka okwaye ni obed chiege. 40  Omiyo, jotij Daudi nodhi Karmel ir Abigail mi ginyise niya: “Daudi oorowa mondo wakawi idhi ibed chiege.” 41  Gikanyono, ne ogoyo chonge piny kendo nokulore nyaka e lowo kowacho kama: “Ayie dhi bedo jatich ma lwoko tiende+ jotij ruodha.” 42  Abigail+ nochung’ piyo mi oidho pundane kendo nodhi gi jogo mi obedo chi Daudi. Nodhi gi jotije ma nyiri abich bende. 43  Noyudo Daudi osekendo Ahinoam+ ma wuok Jezreel+ kendo mon ariyogo duto nobedo mondene.+ 44  To noyudo Saulo osechiwo Mikal+ chi Daudi ne Palti+ wuod Laish Ja-Galim.

Weche Moler Piny

Ma en dala moro e piny Juda; opogore gi Got Karmel.
Kata, “sea abich.” Sea achiel ne romo lita 7 kama. Som Apendiks B14.
Tiende ni, “Mofuwo; Manono.”