Kana Mu Keni Mwa Pumulo Ya Mulimu?

“Linzwi la Mulimu ki le li pila, mi li na ni maata.”—MAHEB. 4:12.

1. Lu kona ku kena cwañi mwa pumulo ya Mulimu kacenu, mi ki kabakalañi ha ku kona ku lu bela taata ku utwa?

MWA taba ye felile, lu itutile kuli lwa kona ku kena mwa pumulo ya Mulimu ka ku mu utwa ni ku sebelisana ni kopano ya hae. Ha lu utwa Jehova lu bonisa kuli lu bata kuli mulelo wa hae u petahale. Kono fokuñwi ku taata ku utwa. Ka mutala, ha lu ituta kuli Jehova u bata kuli lu tuhele ku eza nto ye ñwi ye lu lata, ku kona ku ba taata ku mu utwa honafo feela. Haiba nto yeo i ezahala ku luna, lu lukela ku ikataza ku ‘utwa.’ (Lik. 5:29) Mwa taba ye, lu ka nyakisisa miinelo ye miñwi mo lu kona ku bonisa haiba lwa lata ku utwa ka nako kaufela.

2, 3. Lu swanela ku zwelapili ku ezañi kuli lu tabise Jehova?

² Mu ezanga cwañi ha mu fiwa kelezo ye tomile fa Bibele? Mañolo a lu bulelela kuli Mulimu u bata ku tisa “bufumu bwa macaba kamukana” mwa kopano ya hae. (Hag. 2:7) Taba yeo i bonisa kuli batu ba ba butokwa ku Mulimu ki ba ba lata ze lukile. Ki niti kuli ha ne lu kalile ku ituta Bibele, ba bañata ku luna ne ba eza lika ze si ka luka. Kono lilato la ku lata Mulimu ni Mwanaa hae ne li lu susumelize  ku eza licinceho ze tuna mwa munahanelo wa luna ni mizamao ya luna. Mi ha se lu lapezi ku Jehova kuli a lu tuse ni ha se lu ikatalize ku eza licinceho ze ne tokwahala, lwa kolobezwa mi Jehova a lu shemuba.—Mu bale Makolose 1:9, 10.

³ Nihakulicwalo, lu sa li batu ba ba si ka petahala. Lu sa tokwa ku eza licinceho mwa bupilo bwa luna ni ku ikataza ku eza ze lukile. Kono Jehova u lu sepisa ku lu tusa haiba lu zwelapili ku lika ka mo lu konela kaufela kuli lu mu tabise.

Ha lu Tokwa ku Elezwa

4. Jehova u itusisanga linzila lifi ze talu kuli a lu bonise licinceho ze lu tokwa ku eza?

⁴ Lu si ka eza kale licinceho mwa bupilo bwa luna, lu tokwa ku ziba licinceho ze lu swanela ku eza. Jehova u lu tusa ku eza cwalo ka linzila ze shutana-shutana. U kona ku itusisa ngambolo ye fiwa kwa Ndu ya Mubuso kamba taba ya mwa limagazini za luna kuli a lu bonise bufokoli bo lu na ni bona. Fokuñwi ha lu utwisisangi kuli lu tokwa ku eza licinceho niha se lu teelelize kwa ngambolo kamba ku bala hatiso ye ñwi, mi kacwalo Jehova u kona ku itusisa muzwale kamba kaizeli kuli a lu eleze ka musa.—Mu bale Magalata 6:1. *

5. Ha lu elezwa, lu ezanga cwañi ka linako ze ñwi, mi ki kabakalañi maeluda ha ba swanela ku zwelapili ku lika ku lu tusa?

⁵ Ku taata ku amuhela kelezo ye fiwa ki mutu ya si ka petahala, niha lu eleza ka musa. Kono Jehova u laela maeluda kuli ba “like” ku lu sikulula ka “moya o bunolo.” Haiba lu amuhela kelezo ya bona, lu ka ba ba ba butokwa ku Mulimu. Ki niti kuli ha lu lapelanga, lu bulelelanga Jehova kuli ha lu si ka petahala. Kono cwale eluda ha lu bonisa kuli lu fosize, lu likanga ku ikemela kamba ku keshebisa bufosi bo lu ezize. Mi mwendi lu bulelanga kuli eluda ya lu elelize haa lu tabeli kamba kuli haa si ka lu eleza ka musa. (2 Mal. 5:11) Kamba lu kona ku halifa hahulu haiba maeluda ba lu bulelela nto ye ñwi ye lu sa lati ku utwa. Ka mutala, ba kona ku lu bulelela kuli yo muñwi wa mwa lubasi lwa luna u fosize kamba kuli mutinelo wa luna ha u si ka luka. Mi ba kona ku lu eleza kuli lu tokwa ku ikenisanga kamba kuli Jehova u toile ze lu itabisa ka zona. Bakeñisa kuli lu halifile, lu kona ku bulela manzwi e lu sa swaneli ku bulela. Ku eza cwalo ku kona ku lu swabisa ni ku swabisa muzwale ya ikataza ku lu tusa. Kono cwale buhali ha se bu kuyukile, lu ikutwanga kuli kelezo ye ne lu filwe ne li ye nde.

6. Linzwi la Mulimu li kona ku patulula cwañi “maikuto ni mihupulo ya mwa pilu”?

⁶ Liñolo fo i tomile taba ye li lu hupulisa kuli linzwi la Mulimu “li na ni maata.” Kaniti, linzwi la Mulimu li na ni maata a tusa batu ku cinca bupilo bwa bona. Ne li lu tusize ku eza licinceho ze ne lu tokwa ku eza lu si ka kolobezwa kale mi la kona ku lu tusa ku eza licinceho hamulaho wa kolobezo. Mwa liñolo la naa ñolezi Maheberu, Paulusi hape u bulela kuli linzwi la Mulimu li patulula “maikuto ni mihupulo ya mwa pilu.” (Maheb. 4:12) Kacwalo Paulusi naa bonisa kuli ha lu utwisisa za tokwa Mulimu ku luna, ze lu eza li ka bonisa se lu li sona mwa pilu. Kana fokuñwi mo ba lu ngela batu kwa shutana ni se lu li sona luli mwa pilu? (Mu bale Mateu 23:27, 28.) Ha mu kengeyele mo ne mu ka ezeza kambe mu mwa miinelo ye lu ka nyakisisa cwale.

Mu Zwelepili ku Zamaelela ni Kopano ya Jehova

7, 8. (a) Ki kabakalañi Bakreste ba bañwi ba Maheberu ha ne ba bata ku zwelapili ku mamela likalulo ze ñwi za Mulao? (b) Ki kabakalañi ha lu kona ku bulela kuli ne ba hanyeza mulelo wa Jehova?

⁷ Ba bañata ku luna ba izibela hande manzwi a kwa Liproverbia 4:18, a li: “Nzila ya ba ba lukile i swana sina liseli la lizazi, le li ya li  ekezeha, mane ku yo fita fa musihali o mutuna.” Fo kikuli, nako ha i nze i ya lu utwisisanga hande za tokwa Jehova ku luna mi lu konanga hande ku eza ze mu tabisa.

⁸ Mwa taba ye felile lu itutile kuli hamulaho wa lifu la Jesu, Bakreste ba bañata ba Maheberu ne ba sa bata ku mamela Mulao wa Mushe. (Lik. 21:20) Paulusi naa talusize ka ku utwahala kuli Bakreste ne ba sa tokwi ku mamela Mulao, kono ba bañwi ne ba si ka lumela za naa tokwa Jehova ku bona. (Makolo. 2:13-15) Mwendi ne ba nahana kuli ha ne ba ka mamela likalulo ze ñwi za Mulao, ne ba si ke ba nyandiswa ki be ne ba latelela bulapeli bwa Sijuda. Kono Paulusi naa bulelezi Bakreste bao ka ku utwahala kuli ha ne ba ka zwelapili ku hanyeza mulelo wa Mulimu, ne ba si ke ba kena mwa pumulo ya Hae. * (Maheb. 4:1, 2, 6; mu bale Maheberu 4:11.) Kuli ba shemubwe ki Jehova, ne ba tokwa ku lumela kuli Jehova cwale naa bata kuli batu ba hae ba mu lapele ka mukwa u sili.

9. Lu swanela ku ezanga cwañi ha ku ezwa licinceho ka mo lu utwisiseza litaba za mwa Mañolo?

⁹ Mwa linako za luna, ku bile ni licinceho ka mo lu utwisiseza lituto ze ñwi za mwa Bibele. Lu swanela ku amuhela licinceho zeo ni ku zwelapili ku sepa sitopa sa mutanga ya sepahala ya na ni kutwisiso. Bayemeli ba sitopa seo fokuñwi ba nyakisisanga sinca mo lu utwisiseza lituto ze ñwi. Haiba ba bona kuli licinceho za swanela, ha ba sabangi ku sikulula mo ne ba taluselize lituto ze ñwi kwamulaho kamba ku bolosola litaluso ze ñwi. Ba ziba kuli batu ba bañwi ba ka ba nyaza kabakala licinceho zeo, kono ha ba isangi pilu kwa taba yeo. Bona ba batanga ku eza ka ku ya ka mulelo wa Mulimu. Mina mu ezanga cwañi muta sitopa sa mutanga ya sepahala si eza cinceho ka mo lu utwisiseza taba ye ñwi ya mwa Mañolo?—Mu bale Luka 5:39.

10, 11. Baituti ba Bibele ba bañwi ne ba ezize cwañi ha ne ba taluselizwe kuli ba itusise mikutalezo ye minca, mi lu itutañi ku bona?

¹⁰ Ha lu nyakeñi mutala o muñwi. Mwa miteñi ya kwamulaho, ili lilimo ze bato eza mwanda, Baituti ba Bibele ba bañwi be ne ba li babuleli ba ba cuukile ne ba nahananga kuli nzila ye nde ya ku kutaza ka yona ne li ka ku fa lingambolo. Ne ba latanga ku bulela fapilaa batu ba bañata. Ba bañwi ku bona ne ba latanga ku lumbiwa kabakala lingambolo za bona. Kono hasamulaho, batu ba Jehova ba lemuha kuli Jehova naa bata kuli ba kutazange ka linzila ze shutana-shutana, ku beya cwalo ni ku kutaza fa ndu ni ndu. Ba bañwi kwa babuleli be ne ba cuukile bao ne ba sa lati ku eza cwalo. Lingambolo za bona ne li tahisanga kuli ba bañwi ba nahane kuli ne ba lata ni ku utwa Jehova, kono likezo za bona ne li sa bonisi cwalo. Lwa ziba kuli Jehova naa si ka tabela likezo za bona. Mi ne ba zwile mwa kopano ya hae.—Mat. 10:1-6; Lik. 5:42; 20:20.

¹¹ Baituti ba Bibele ba bañwi ne ba kutalize fa ndu ni ndu niha ne ku li taata ku eza cwalo, sihulu kwa makalelo. Ne ba ipeile ku utwa mi ne ba sepahalile kwa kopano. Hamulaho, ne ku ba bezi bunolo ku kutaza fa ndu ni ndu. Jehova naa ba fuyozi hahulu. Mina mu ezanga cwañi ha mu kupiwa kuli mu like ku kutaza ka mukwa o mu si ka kutaza kale ka ona? Kana mwa ipeyanga ku utwa niha ku li taata ku eza cwalo?

Mutu ye lu Lata ha Tuhela ku Sebeleza Jehova

12, 13. (a) Ki kabakalañi Jehova ha bata kuli batu ba ba sa baki ba zwiswe mwa puteho? (b) Bashemi ba Sikreste ba bañwi ba kona ku talimana ni muinelo ufi o taata?

¹² Kaniti, lwa lumela kuli lu swanela ku mamela taelo ya kuli lu be ba ba kenile mwa linto kaufela kuli lu tabise Jehova. (Mu bale  Tite 2:14.) Kono fokuñwi ku kona ku lu beela taata ku mamela taelo yeo. Ka mutala, mu nge kuli bashemi ba Sikreste ba na ni feela ni mwanaa a li muñwi wa mushimani mi mwana yo u zwa mwa niti. U lata “minyaka ya libi, ye ina nako ye nyinyani” ku fita bulikani bwa na ni bona ni Jehova ni bashemi ba hae. Likezo za hae li tahisa kuli a zwiswe mwa puteho.—Maheb. 11:25.

¹³ Bashemi ba hae ba swaba hahulu! Ba ziba kuli Bibele i li: “Mu si ke mwa kopana ni ya ipiza mwanahabo mina, bo ki lihule, kamba ya lakaza bufumu, kamba ya lapela milimu, kamba lihata, kamba litahwa, kamba lisholi; ya cwalo, mu si ke mwa ca lico ni yena.” (1 Makor. 5:11, 13) Hape ba utwisisa kuli pulelo ya kuli “mwanahabo mina” i kopanyeleza lilama za lubasi ze sa pili ni bona fa lapa. Kono bakeñisa kuli ba lata hahulu mwanaa bona, ba kona ku nahana kuli: ‘Lu tokwa ku ambolanga ni mwanaa luna. Ha lu koni ku mu tusa ku kutela ku Jehova haiba lu sa amboli ni yena.’ *

14, 15. Bashemi ba swanela ku hupulañi ha ba bata ku ambola ni mwanaa bona ya zwisizwe mwa puteho?

¹⁴ Lu utwela bashemi bao makeke. Mwanaa bona naa kona ku tuhela za naa eza. Kono naa lata ku zwelapili ku eza lika ze maswe ku fita ku ina ni bashemi ba hae ni puteho. Bashemi ba hae ba bata ku mu tusa, kono ha ba koni ku mu palelwisa ku eza za ketile. Lwa kona ku utwisisa libaka ha ba swabile hahulu.

¹⁵ Bashemi bao ba ka ezañi? Kana ba ka mamela taelo ya Jehova? Ki niti kuli mwendi ba ka tokwa ku ambola litaba ze ama lubasi ni yena ka siwela. Kono kana ba ka nahana kuli ba na ni mabaka a mañata ha ba tokwa ku ambolanga ni mwanaa bona? Ha ba nze ba nahana mo ba ka ezeza, ba swanela ku hupula za tokwa Jehova ku bona. Jehova u bata kuli kopano ya hae i zwelepili ku ba ye kenile mi hape u bata ku tusa ya fosize kuli a bake ni ku kutela mwa puteho. Bashemi ba Sikreste ba kona ku bonisa cwañi kuli ba na ni mubonelo o swana ni wa Jehova?

16, 17. Lu kona ku itutañi kwa mutala wa Aruni?

¹⁶ Aruni, muhulwanaa Mushe, naa li mwa muinelo o taata bakeñisa likezo za bana ba hae ba babeli. Bana ba hae bo Nadabi ni Abihu ne ba ezelize Jehova sitabelo ka mukwa o no sa swaneli mi Jehova a ba bulaya. Aruni naa swabile hahulu kabakala lifu la bana ba hae. Naa sa koni ku ambola ni bona kakuli ne ba shwile. Kono ne ku na ni nto ye ñwi ye ne tatafalisize muinelo wo. Jehova naa laezi Aruni ni bana ba hae kuli: “Mu si ke mwa tubula litoho za mina, niheba ku pazula liapalo za mina [kabakala ku swaba], kuli mu si ke mwa shwa, mi Muñaa Bupilo a si ke a halifela Kopano kaufela.” (Liv. 10:1-6) Taba yeo i lu luta  kuli lu swanela ku lata hahulu Jehova ku fita lilama za mabasi a luna ze sa sepahali ku yena.

¹⁷ Kacenu Jehova ha bulayangi kapili batu ba ba loba milao ya hae. U ba bonisa lilato ka ku ba fa kolo ya kuli ba tuhele likezo za bona ze maswe. Kono Jehova u ikutwanga cwañi haiba bashemi ba loba mulao wa hae ka ku nahana kuli ba swanela ku ambolanga ni mwanaa bona ya zwisizwe mwa puteho?

18, 19. Ki limbuyoti lifi ze ba kona ku fumana lilama za mabasi haiba ba zwelapili ku sepahala ku Jehova?

¹⁸ Ba bañata ba itumelela kuli ne ba kutezi mwa puteho kakuli balikani ba bona ni lilama za mabasi a bona ne ba zwezipili ku sepahala ku Jehova ka ku sa ambolanga ni bona. Ka mutala, kalibe yo muñwi naa bulelezi maeluda kuli nto ye ñwi ye ne tisize kuli a cince mupilelo wa hae ne li likezo za kaizelaa hae. Ka nako ya naa zwisizwe kalibe yo mwa puteho, kaizelaa hae naa sepahalile ku Jehova mi naa mamezi taelo ya hae. Nto yeo ne i susumelize kalibe yo ku kutela mwa puteho.

¹⁹ Kacwalo lu tokwa ku ezañi? Lu tokwa ku utwa Jehova mwa miinelo ye lu li ku yona kaufela. Bakeñisa kuli ha lu si ka petahala, fokuñwi ku kona ku lu bela taata ku eza cwalo. Kono lu swanela ku ba ni tumelo ye tiile ya kuli za lu bulelela Jehova kuli lu li eze za lu tusanga kamita.

“Linzwi la Mulimu ki le li Pila”

20. Ki linzila lifi ze peli ze lu kona ku utwisisa ka zona liñolo la Maheberu 4:12? (Mu bone litaluso za kwatasi.)

²⁰ Paulusi ha naa ñozi kuli “linzwi la Mulimu ki le li pila,” naa sa buleli ka za Bibele. * Litimana ze ñwi za kauhanyo yeo li bonisa kuli naa bulela ka za lisepiso za Mulimu. Paulusi naa talusa kuli lisepiso za Mulimu za petahalanga. Jehova naa bulezi cwana ka za linzwi la hae: “Linzwi la ka . . . ha li na ku kutela ku Na mukungulu, li si ka sebeza . . . ze ni li lumezi.” (Isa. 55:11) Kacwalo lu tokwa ku ba ni pilu-telele haiba Mulimu a sa talelezi lisepiso za hae ka nako ye lu bata. Lwa kona ku ba ni buikolwiso bwa kuli Jehova u zwelapili ku sebeza kuli a pete mulelo wa hae.—Joa. 5:17.

21. Liñolo la Maheberu 4:12 li kona ku tusa cwañi basupali ku zwelapili ku sebeleza Jehova?

²¹ Batu ba bañata ba ba balelwa kwa “buñata bo butuna” ba sebelelize Jehova ka lilimo ze ñata. (Sin. 7:9) Ne ba sa nahani kuli ba ka supala mwa lifasi le, le li maswe. Kono ba sa sebeleza Jehova ka mo ba konela kaufela. (Samu 92:14) Ba ziba kuli “linzwi la Mulimu ki le li pila” ni kuli lisepiso za hae li ka petahala. Mi ba ziba kuli Jehova u sweli wa sebeza kuli a pete mulelo wa hae. Bakeñisa kuli Mulimu u nga mulelo wa hae ku ba wa butokwa, wa tabanga ha lu bonisa kuli ni luna lu nga mulelo wa hae ku ba wa butokwa. Mwa lizazi la busupa le la pumulo, ha ku na nto ni ye kana ye ka palelwisa Jehova ku peta mulelo wa hae. Mi wa ziba kuli batu ba hae ba ka zwelapili ku yemela mulelo wa hae ka sikwata. Mina bo? Kana mu keni mwa pumulo ya Mulimu?

[Litaluso za kwatasi]

Kana Mwa Hupula?

• Lu tokwa ku ezañi kuli lu kene mwa pumulo ya Mulimu kacenu?

• Ha lu utwisisa za tokwa Mulimu ku luna ze ñozwi mwa Bibele, lu kona ku bonisa cwañi kuli lu bata ku mu tabisa?

• Ki mwa miinelo mañi mo ku kona ku lu bela taata ku eza za lu bulelela Jehova? Kono ki kabakalañi ha ku li kwa butokwa kuli lu mu utwe?

• Ki lifi linzila ze peli ze lu kona ku utwisisa ka zona liñolo la Maheberu 4:12?

[Lipuzo za Tuto]

[Siswaniso se si fa likepe 31]

Bashemi ba swabile maswe!