Luvaiku 13:1-22

  • Konso mwan’ayakala wantete kwa Yave kavuilu (1, 2)

  • Nkinzi a Mbolo Zakondwa Mfuna (3-10)

  • Konso mwan’ayakala wantete oyekwelo kwa Yave (11-16)

  • Isaele ifidilu kuna Mbu a Mbwaki (17-20)

  • Lunzi dia tuti ye dia tiya (21, 22)

13  Yave ovovese diaka Mose vo:  “Umpaulwila* wan’antete awonso amakala* vana vena Aneyisaele. Konso mwan’antete ayakala owutuka, kiakala mwan’a muntu yovo mwan’a bulu, i wame.”+  I bosi, Mose ovovese nkangu vo: “Nusungamena e lumbu kiaki nuvaikidi mu nsi ya Engipito,+ mu nsi ya ubundu,* kadi o Yave mu koko kwankuma kanuvaikisidi mwamu.+ Muna kuma kiaki, ke vafwete diwa lekwa kiasiwa mfuna ko.  O unu kiaki mu vaika nuina, mu ngonde ya Abibi.*+  Vava Yave kekukotesa muna nsi ya Anekenani, Anekete, Aneyamore, Anekivi ye Aneyebuse,+ ina kadila e ndofi kwa mase maku vo okuvana yo,+ e nsi ifwamfumukanga kimvumina yo wiki,+ ozevo ofwete kwamanana kembela o nkinzi wau muna ngonde yayi.  Lumbu nsambwadi odia e mbolo zakondwa mfuna,+ muna lumbu kina kiansambwadi mukala nkinzi kwa Yave.  E mbolo zakondwa mfuna zidiwa mu lumbu nsambwadi;+ kufwete soloka ye lekwa kiasiwa mfuna ko,+ ke mufwete mpe soloka mfuna ko muna zunga kiaku kiawonso.*  Muna lumbu kiakina, ofwete zayisa kwa mwan’aku vo: ‘Edi ivangilanga e diambu diadi i mu kuma kia dina Yave kampangila vava yavaika muna Engipito.’+  O nkinzi wau ukala kwa ngeye se sinsu ova koko kwaku, se luyindulu vana lose lwaku,*+ kimana o nsiku a Yave wakala omu nu’aku, kadi muna koko kwankuma i kavaikisila o Yave muna Engipito. 10  Ofwete lungisa nkanikinu wau muna ntangwa yasikidiswa muna konso mvu.+ 11  “Vava Yave kekukotesa muna nsi ya Anekenani, ina kadila e ndofi kwa ngeye ye kwa mase maku vo okuvana yo,+ 12  ofwete vana kwa Yave konso mwan’antete ayakala* ye konso mwan’antete wa koko muna twelezi yaku. O wan’amakala kwa Yave bavuilu.+ 13  Konso mwan’antete a buluku ofwete kunkûdila muna meme. Avo kunkûdidi ko, ofwete kuntolola e nsingu. Konso mwan’antete ayakala a wan’aku ofwete kunkûla.+ 14  “Kuna sentu, avo mwan’aku uyuvuidi vo: ‘Ayeyi i nsas’a diambu diadi?’ ofwete kumvutula vo: ‘Mu koko kwankuma katuvaikisila o Yave muna Engipito, muna nsi ya ubundu.*+ 15  Vava Faro kabâdisa o ntim’andi muna kutusindika,+ Yave wavonda wan’antete awonso muna nsi ya Engipito, tuka muna mwan’antete a muntu yamuna mwan’antete a bulu.+ Kiaki i kuma tukelelanga wan’eto awonso amakala* se kimenga kwa Yave yo kûla konso mwan’antete a wan’eto.’ 16  Difwete kala se sinsu ova koko kwaku, nga tenda kia ntu ova lose lwaku,*+ kadi mu koko kwankuma katuvaikisila o Yave muna Engipito.” 17  Vava Faro kasindikidi o nkangu, Nzambi kabafididi mu nzil’a nsi ya Afelesetia ko, kana una vo yankufi yakala. Kadi Nzambi ovovele vo: “O nkangu walembi soba e ngindu yo vutuka kuna Engipito avo babanuanisi.” 18  Muna kuma kiaki, Nzambi oyambwidi vo nkangu wenda kondoloka muna nzila yandá ya makanga ma Mbu Ambwaki.+ Kansi, Aneyisaele mu buka-buka bavaikila muna nsi Engipito nze makesa. 19  Mose obongele mpe visi ya Yosefe, kadi Yosefe wadisisa Aneyisaele ndofi vo: “Nzambi ovutula kikilu e sungididi kiandi kwa yeno, nufwete katula e visi yame mwamu, nuenda yau.”+ 20  Bakatukidi kuna Sukote, bele ningama kuna Etami, kuna mwingilu a makanga. 21  Yave wavitanga kuna ntwal’au: Muna mwini, muna lunzi dia tuti, diabafilanga muna nzila.+ Muna fuku, muna lunzi dia tiya, diabaminikanga, kimana bakangala muna mwini ye muna fuku.+ 22  E lunzi dia tuti muna mwini ye lunzi dia tiya muna fuku, ke diakatukanga vana vena nkangu ko.+

Mvovo vana yand'a lukaya

Yovo “Unkatulwila.”
Mvovo wa sina: “eki kiantete kiziula konso vumu.”
Mvovo wa sina: “nzo a ubundu.”
Mvovo wa sina: “mingilu miaku miawonso.”
Mvovo wa sina: “vana kati-kati kwa meso maku.”
Mvovo wa sina: “konso ona oziula e vumu.”
Mvovo wa sina: “nzo a ubundu.”
Mvovo wa sina: “konso eki kiziula e vumu.”
Mvovo wa sina: “vana kati-kati kwa meso maku.”