Luvaiku 31:1-18
31 Yave ovovese diaka Mose vo:
2 “Tala, nsolele* Besalele+ wa kanda dia Yuda, wa mwan’a Uri, wa ntekolo a Kure.+
3 Ikunzadisa yo mwand’ame, ikumvana ngangu, umbakuzi yo zayi wa salu yamoko ya mpila mu mpila,
4 kimana kabandula e fwaniswa, kasadila muna wolo, palata ye nsongo,
5 kazenga matadi mantalu yo sia mo muna simbininua,+ kasala salu ya mpila zawonso ya mabaya.+
6 Nsolele mpe Oliabe+ wa kanda dia Dani, wa mwan’a Akisamake kakala nsadisi andi. Isia e ngangu muna ntima mia wantu awonso akwa umbangu,* kimana bavanga e lekwa yawonso ikanikini:+
7 saba kia wananina,+ nkel’a Kimbangi+ ye fukwa+ kikala vana ntandu andi, salanganu yawonso ya saba,
8 meza+ ye sadilwa yandi, zangikilwa kia minda kia wolo walembi sangwa lekwa ye sadilwa yandi yawonso,+ ziku dia ndumbu,+
9 ziku dia lukau lwa ngioka+ ye sadilwa yandi yawonso, longa diampwena ye vuandisilwa kiandi,+
10 mvuatu miatoma tungwa, mvuatu miavauka mu kuma kia Arone wa nganga, mvuatu mia wan’andi mu sala se anganga,+
11 mazi mankusa* ye ndumbu ansunga mu kuma kia nzo avauka.+ Bevanga e lekwa yawonso ikanikini.”
12 Yave ovovese diaka Mose vo:
13 “Zayisa Aneyisaele vo: ‘Nufwete toma lundanga e lumbu yame ya vundu,+ kadi ekiaki i sinsu vana vena mono yo yeno muna mbandu zeno zawonso, kimana nuazaya wo vo mono i Yave, ona okunuvaulanga.
14 Nukwamanana lunda e Lumbu kia Vundu, kadi kia vauka kwa yeno.+ Konso ndiona osafula kio, vondwa kevondwa. Avo muntu osadidi konso salu muna lumbu kiakina, ozevo muntu ndioyo kafwete vondwa vana vena nkangu andi.+
15 Lumbu sambanu nusala konso salu, kansi e lumbu kiansambwadi, i kiasabala, lumbu kia vundu emvimba.+ Kiavauka kwa Yave. Konso ndiona osala salu muna Lumbu kia Vundu, vondwa kevondwa.
16 Aneyisaele bafwete lundanga e Lumbu kia Vundu; bafwete kembelelanga e Lumbu kia Vundu muna mbandu zau zawonso. Ediadi i kangu diakwele mvu.
17 Ekiaki i sinsu kiakwele mvu vana vena mono yo nkangu a Isaele,+ kadi Yave wavanga zulu yo ntoto muna lumbu sambanu, muna lumbu kiansambwadi wavunda.’”+
18 Vava Nzambi kafokola mokena yo Mose vana Mongo a Sinai, umvene babu yole ya Kimbangi,+ babu ya matadi yasonekwa muna nlembo a Nzambi.+
Mvovo vana yand'a lukaya
^ Mvovo wa sina: “mbokele muna nkumbu.”
^ Mvovo wa sina: “ntim’a ngangu.”
^ I sia vo, mazi masadilwanga muna tumbika muntu.
