Luvaiku 33:1-23
33 Yave ovovese diaka Mose vo: “Wenda, katuka ovava yo nkangu una wavaikisa muna nsi ya Engipito. Wenda kuna nsi yadila ndofi kwa Abarayama, Isaki yo Yakobo vo: ‘Kwa mbongo aku ivana e nsi yayi.’+
2 Ituma e mbasi kuna ntwal’eno+ yo yinga Anekenani, Aneyamore, Anekete, Aneperese, Anekivi ye Aneyebuse.+
3 Tomboka kuna nsi ifwamfumukanga kimvumina yo wiki.+ Kansi, omono kikwendela va kati kweno ko, kadi nu nkangu a ntu miangolo,*+ wana mu nzila ikunufwasila.”+
4 Vava o nkangu uwidi e nsangu zazi zambi, udididi, ke vakedi muntu ko ovuete lekwa yandi ya viengesela e nitu.
5 Yave ovovese Mose vo: “Zayisa Aneyisaele vo: ‘Nu nkangu a ntu miangolo.*+ Yadi viokela vana kati kweno yo kunufwasa mu fikolo.+ Owau ke nuvuati lekwa yeno ya kuyiviengesela ko ekolo iyindula dina ikunuvanga.’”
6 Muna diadi, tuka vana Mongo a Korebe, Aneyisaele ke bavuete diaka ko* e lekwa ya kuyiviengesela.
7 Mose obongele saba kiandi, osimikini kio kuna mbazi a ndo, ke vala diayingi ko ye ndo, oyikidi kio vo saba kia wananina. Konso muntu wavavanga yuvula Yave+ wayendanga kuna saba kia wananina, kuna mbazi a ndo.
8 Konso ntangwa Mose kavaikanga kenda kuna saba, nkangu awonso watelamanga yo ningama vana mielo mia saba yau yo tungununa Mose yavana kekota muna saba.
9 Konso ntangwa Mose kakotanga muna saba, e lunzi dia tuti+ diakulumukanga yo ningama vana mwelo a saba, ekolo Nzambi kamokenanga yo Mose.+
10 O nkangu awonso vava wamonanga e lunzi dia tuti diningamene vana mwelo a saba, konso muntu muna yau wafukamanga vana mwelo a saba kiandi.
11 Yave wamokenanga yo Mose mantalani,+ wauna muntu kemokenenanga yo nkwandi. Vava Mose kavutukanga kuna ndo, Yosua+ wa mwan’a Nuni, wa selo ye nsadisi andi,+ kakatukanga kuna saba ko.
12 Mose ovovese Yave vo: “Tala, ngeye umpovese vo: ‘Tombola o nkangu wau,’ kansi kunzayisi ko kana nani okwenda yame. Ngeye mpe umpovese vo: ‘Omono izeye muna nkumbu,* omweno e dienga ova meso mame.’
13 Dodokolo, avo mbweneno e dienga ova meso maku, unzayisa e nzila zaku,+ kimana yazaya yo kwamanana vua e dienga vana meso maku. Sungamena mpe vo e zula kiaki i nkangu aku.”+
14 Muna diadi, Nzambi ovutwidi vo: “Mono kibeni* ikwenda yaku,+ ikuvana e vundu.”+
15 I bosi, Mose umvovese vo: “Avo ngeye kibeni kukwenda* yeto kumosi ko, kuyambula ko vo twakatuka ovava.
16 Aweyi wantu bezayila wo vo omono kumosi yo nkangu aku tumweneno e dienga vana meso maku? Nga ke mu kwenda yeto e ntwadi ko,+ omono yo nkangu aku i tuswaswanena ye nkangu miawonso ova ntoto?”+
17 Yave ovovese Mose vo: “Ivanga mpe dina olombele, kadi omweno e dienga ova meso mame, izeye muna nkumbu.”
18 I bosi Mose ovovele vo: “Dodokolo, unsonga o nkembo aku.”
19 Kansi Nzambi ovutwidi vo: “Iyambula vo wamona o nkembo ame,* izayisa e nkumbu ame Yave vana ndose aku;+ isonga e dienga kwa ndiona nzolele songa e dienga, ifwa e nkenda kwa ndiona nzolele fwila e nkenda.”+
20 Kansi, okudikidi vo: “Kulendi mona ndose ame ko, kadi ke vena muntu ko okumbona kakala o moyo.”
21 Yave ovovele diaka vo: “Tala e fulu eki ova ndambu ame. Telama vana tadi.
22 Vava nkembo ame uvioka, omono ikusweka muna mpasuk’a tadi, ikufukila o koko kwame yavana ivioka.
23 I bosi, ikatula o koko kwame, omona e nim’ame. Kansi e ndos’ame ke ilendi moneka ko.”+
Mvovo vana yand'a lukaya
^ Mvovo wa sina: “nsingu zangolo.”
^ Mvovo wa sina: “nsingu zangolo.”
^ Mvovo wa sina: “bakatwidi.”
^ Yovo “Omono isolele.”
^ Mvovo wa sina: “E ndose ame.”
^ Mvovo wa sina: “Avo e ndose aku ke ikwenda.”
^ Mvovo wa sina: “wete wame wawonso.”
