Luvaiku 36:1-38
36 “O Besalele osala kumosi yo Oliabe ye akwa umbangu* awonso ana Yave kavene e ngangu yo umbakuzi kimana bazaya una besadila salu yawonso yavauka, wauna Yave kakanikina.”+
2 I bosi, Mose obokele Besalele yo Oliabe ye akwa umbangu awonso ana Yave kasia e ngangu muna ntima,+ awonso ana e ntima miau miabafila mu kuyivana mu salu.+
3 Batambwidi kwa Mose tukau twawonso+ tuna Aneyisaele batwasa mu kuma kia salu kiavauka. Kansi, Aneyisaele bakwamanene twasa kwa Mose tukau twamvevo konso mene.
4 Vava bayantika e salu kiavauka, akwa umbangu awonso bayizanga mosi-mosi,
5 bavovesanga Mose vo: “O nkangu mu twasa kaka wina lekwa yayingi lutila ina ivuilu o mfunu mu sala e salu kina Yave kakanikini vo kiasalwa.”
6 Muna kuma kiaki, Mose ovene nkanikinu vo vabokwa nkoki muna ndo yawonso, oku vo: “Akala ye akento, ke nutwasi diaka konso lekwa ko se lukau lwavauka.” Muna mpila yayi, nkangu usiminu walembi twasa diaka konso lekwa.
7 E lekwa bavana yafwana muna sala e salu kiawonso yo suva nkutu.
8 Muna kuma kiaki, akwa umbangu awonso+ bavangidi e saba+ mu nlele kumi mia nsinga miasietwa mia lino yambote, nsinga mia bule, nsinga mia mika mia se kia nduwa ye nsinga mia mbwaki akongola;* otungidi* e fwaniswa ya akelubi muna nlele.+
9 Konso nlele a saba ukedi ye yinkoso* 28 muna lambuka, yinkoso 4 muna yalumuka. E nlele miawonso mia saba mikedi tezo kimosi.
10 Oyikakese nlele ntanu mia saba se nlonga mosi, i bosi oyikakese diaka e miaka nlele ntanu mia saba se nlonga mosi.
11 I bosi, ovangidi mavundu ma nsing’a bule muna nswiku a nlonga mosi a nlele a saba, vana uyikakeselwa yo waka nlonga. Ovangidi diau dimosi muna nswiku a waka nlong’a nlele a saba, vana veyikakeselwa e nlonga miau miole.
12 Ovangidi mavundu 50 mu nlele umosi wa saba, mavundu 50 muna nswiku a nlele wankaka wa saba, vana fulu miyikanena, kimana mavundu matalana.
13 Ovangidi kangilwa 50 ya wolo yo yikakesa e nlonga mia nlele a saba muna kangilwa, kimana e saba kiakala se lekwa kimosi.
14 I bosi, ovangidi nlele mia saba muna mika mia nkombo kimana miasiwa vana ntandu a saba. Ovangidi 11 dia nlele mia saba.+
15 Konso nlele a saba ukedi ye yinkoso 30 muna lambuka, yinkoso 4 muna yalumuka. E nlele 11 mia saba mikedi tezo kimosi.
16 Oyikakese nlele tanu mia saba, i bosi, oyikakese nlele sambanu miankaka.
17 I bosi, otobwele mavundu 50 muna nswiku a nlele a saba muna nlonga mosi, vana uyikakeselwa yo nlonga wankaka; otobwele mavundu 50 muna nswiku a nlele a saba muna nlonga wankaka, vana veyikakeselwa e nlonga miau miole.
18 Ovangidi kangilwa 50 ya nsongo muna yikakesa e nlele kimana miakala se lekwa kimosi.
19 Ovangidi fukwa kia saba muna nkand’a mia mameme ma makoko miavubwa mu se kia mbwaki, ye fukwa kia nkand’a mia takasi* kisiwa vana ntandu.+
20 I bosi, ovangidi valanganza ya mabaya ma akasia+ mu kuma kia saba, ina yitelameso.+
21 Konso valanganza kia mabaya kikedi ye yinkoso kumi muna lá ye kinkoso kimosi ye ndambu muna yalumuka.
22 Konso valanganza kia mabaya kikedi ye malu mole matalana. I wau wuwu kavangila e valanganza yawonso ya mabaya ya saba.
23 Muna mpila yayi, ovangidi valanganza 20 ya mabaya mu kuma kia ndambu a sude ya saba.
24 I bosi, ovangidi telamesenua 40 ya palata ina ikala kuna nsi a valanganza 20 ya mabaya, telamesenua yole kuna nsi a valanganza kimosi kia mabaya mu kuma kia malu mandi mole, telamesenua yole kuna nsi a konso valanganza kia mabaya kilende mu kuma kia malu mandi mole.+
25 Kuna ndambu yankaka ya saba, kuna node, ovangidi valanganza 20 ya mabaya
26 ye 40 ma telamesenua yau ya palata, telamesenua yole mu kuma kia valanganza kimosi kia mabaya, telamesenua yole mu kuma kia konso valanganza kia mabaya kilanda.
27 Kuna nim’a saba, kuna weste, ovangidi valanganza sambanu ya mabaya.+
28 Ovangidi valanganza yole ya mabaya se malunzi ma konko yole kuna nim’a saba.
29 E valanganza yole ya mabaya yabundakeswa tuka kuna nsi yakuna ntandu, yamuna nlunga wantete. I wau wuwu kavangidi malunzi mau mole ma konko.
30 Ozevo, vakedi valanganza nana ya mabaya ye telamesenua yau 16 ya palata, telamesenua yole kuna nsi a konso valanganza kia mabaya.
31 I bosi, ovangidi mbindi za mabaya ma akasia, mbindi tanu mu kuma kia valanganza ya mabaya ya ndambu eyi ya saba,+
32 mbindi tanu mu kuma kia valanganza ya mabaya ya ndambu yankaka ya saba ye mbindi tanu mu kuma kia valanganza ya mabaya kuna nim’a saba, kuna weste.
33 Ovangidi e mbindi ya vakati, eyi iviokela vana kati-kati kwa valanganza ya mabaya, tuka nsuka eyi yakuna nsuka yankaka.
34 Olengele wolo muna valanganza ya mabaya, ovangidi e nlunga miandi mia wolo muna muviokela e mbindi, olengele wolo muna mbindi.+
35 I bosi, ovangidi rido+ muna nsinga mia bule, nsinga mia mika mia se kia nduwa, nsinga mia mbwaki akongola* ye nsinga miasietwa mia lino yambote. Otungidi mo e fwaniswa+ ya akelubi.+
36 Ovangidi malunzi yá ma akasia mu kuma kia rido, olengele mo e wolo, ovangidi mpe vakikilwa ya wolo. Ovangidi telamesenua yá ya palata mu kuma kia malunzi.
37 I bosi, ovangidi rido ya mwelo a saba muna nsinga mia bule, nsinga mia mika mia se kia nduwa, nsinga mia mbwaki akongola* ye nsinga miasietwa mia lino yambote,+
38 kumosi yo malunzi mandi tanu ye vakikilwa yandi. Olengele wolo vana ntandu a malunzi ye yikakeselwa* yandi; kansi e telamesenua yandi tanu ya nsongo yakala.
Mvovo vana yand'a lukaya
^ Mvovo wa sina: “ntim’a ngangu.”
^ Yovo “mbwaki-mbwaki.”
^ Dilenda kala vo Besalele oyikwanga.
^ Yovo “mbw’a mbu.”
^ Yovo “mbwaki-mbwaki.”
^ Yovo “mbwaki-mbwaki.”
^ Yovo “nlunga; vakikilwa,” muna yikakesela lekwa.
