Luvaiku 40:1-38
40 I bosi, Yave ovovese Mose vo:
2 “Muna lumbu kiantete kia ngonde antete, ofwete telamesa e saba, i sia vo, saba kia wananina.+
3 Sia e nkel’a Kimbangi muna saba,+ sia e rido muna sweka e Nkela.+
4 Kotesa meza muna saba,+ kubika e sadilwa ikala vana meza, kotesa e zangikilwa kia minda+ yo kwika e minda miandi.+
5 I bosi, tula e ziku dia wolo dia ndumbu+ vana ntadisi a nkel’a Kimbangi, sia e rido vana mwelo a saba.+
6 “Tula e ziku dia lukau lwa ngioka+ vana ntadisi a mwelo a saba, i sia vo, saba kia wananina,
7 tula e longa diampwena vana kati-kati kwa saba kia wananina ye ziku, tula o maza muna longa.+
8 Telamesa e yanzala+ muna kinzieta kia saba, sia e rido+ ya mwelo a yanzala.
9 I bosi, bonga mazi mankusa,*+ kusa e saba ye lekwa yawonso ina mo,+ vaula kio kumosi ye sadilwa yandi yawonso, kimana e saba kiakituka se kiavauka.
10 Kusa e ziku dia lukau lwa ngioka kumosi ye sadilwa yandi yawonso, vaula e ziku, kimana diakala se ziku diavauka kikilu.+
11 Kusa e longa diampwena o mazi ye telamesenua kiandi, vaula dio.
12 “I bosi, twasa Arone yo wan’andi vana ndambu a mwelo a saba kia wananina, ubasukula muna maza.+
13 Vuika Arone e mvuatu miavauka,+ unkusa mazi+ yo kumvaula, oyandi okunsadila se nganga.
14 I bosi, twasa o wan’andi, ubavuika e mvuela.+
15 Ofwete kubakusa mazi wauna okusidi o se diau,+ kimana bansadila se anganga. E nkusilu au ikwamanana kala kwa yau se kinganga kia mvu ya mvu muna mbandu zau zawonso.”+
16 Mose ovangidi mawonso mana Yave kankanikina.+ I una kikilu kavangidi.
17 Muna ngonde yantete, muna mvu wanzole, muna lumbu kiantete kia ngonde, e saba kiatelameswa.+
18 Vava Mose katelamesa e saba, osidi e telamesenua yandi+ kuna nsi, odongekele e valanganza ya mabaya,+ osidi e mbindi zandi+ muna valanganza yo dongeka malunzi mandi.
19 Oyalumwini nlele a saba+ vana ntandu a saba yo sia e fukwa+ kia saba vana ntandu, wauna Yave kakanikina Mose.
20 I bosi, obongele Kimbangi+ osidi kio muna Nkela,+ okotese e mbindi+ muna nlunga mia Nkela yo sia e fukwa+ vana ntandu a Nkela.+
21 Okotese Nkela muna saba, osidi e rido+ yakakidila vana fulu kiandi, kimana yasweka e nkel’a Kimbangi,+ wauna Yave kakanikina Mose.
22 I bosi, osidi meza+ muna saba kia wananina, kuna ndambu a node ya saba, kuna mbazi a rido,
23 okubikidi e mbolo mu nlonga vana meza+ vana ndose a Yave, wauna o Yave kakanikina Mose.
24 Osidi e zangikilwa kia minda+ muna saba kia wananina vana ntwal’a meza, kuna ndambu a sude ya saba.
25 Okwikidi e minda+ vana ndose a Yave, wauna o Yave kakanikina Mose.
26 I bosi, osidi e ziku dia wolo+ muna saba kia wananina, vana ntwal’a rido,
27 kimana vafutumwinuanga+ e ndumbu ansunga,+ wauna o Yave kakanikina Mose.
28 I bosi, ozembelekele e rido+ a mwelo a saba vana fulu kiandi.
29 Osidi e ziku dia lukau lwa ngioka+ vana mwelo a saba, i sia vo, saba kia wananina, kimana katambikilanga vo lukau lwa ngioka+ yo lukau lwa mbwaza, wauna o Yave kakanikina Mose.
30 I bosi, otudidi e longa diampwena vana kati-kati kwa saba kia wananina ye ziku, otudidi o maza ma kuyisukulwila muna longa.+
31 O Mose yo Arone yo wan’andi i mûna basukulwilanga o moko mau yo malu mau.
32 Konso ntangwa bakotanga muna saba kia wananina yovo finama e ziku, bayisukulanga,+ wauna o Yave kakanikina Mose.
33 Muna fokola, otongekel’e yanzala+ muna kinzieta kia saba ye ziku, ozembelekele e rido ya mwelo a yanzala.+
Muna mpila yayi, Mose ofokwele e salu.
34 E tuti diyantikidi fuka e saba kia wananina, o nkembo a Yave uzele muna saba.+
35 Mose kalendele kota muna saba kia wananina ko mu kuma kia tuti diakala vana saba, o nkembo a Yave uzele muna saba.+
36 Vava e tuti diakatukanga vana saba, Aneyisaele bayalulanga e ndo muna tini yawonso ya nkangalu au muna makanga.+
37 Kansi, avo e tuti ke dikatukidi vo ko, oyau mpe ke bayalulanga ndo ko yavana kilwaka e lumbu kikatuka e tuti.+
38 Kadi e tuti dia Yave diakalanga vana ntandu a saba muna mwini, o tiya twa twakalanga vana ntandu a saba muna fuku, vana ndose a nkangu awonso a Isaele, muna tini yawonso ya nkangalu au.+
Mvovo vana yand'a lukaya
^ I sia vo, mazi masadilwanga muna tumbika muntu.
