Luvaiku 37:1-29

  • Bavangidi e nkela (1-9)

  • Meza (10-16)

  • Zangikilwa kia minda (17-24)

  • Ziku dia ndumbu (25-29)

37  I bosi, Besalele+ ovangidi e Nkela+ ya mabaya ma akasia. E Nkela ikedi ye yinkoso* yole ye ndambu muna lambuka, kinkoso kimosi ye ndambu muna yalumuka ye kinkoso kimosi ye ndambu muna zanguka.+  Olengele yo wolo walembi sangwa lekwa muna kati yo kuna mbazi, ovangidi mvind’a wolo muna kinzieta kiandi.+  I bosi, ovangidi nlunga nyá mia wolo mu kuma kia nkela yo lamika mio muna malu mandi mau mayá, nlunga miole oku ndambu eyi, nlunga miole kuna ndambu ina.  Ovangidi mpe mbindi zole za mabaya ma akasia, olengele zo wolo.+  Okotese e mbindi muna nlunga mina muna ndambu za Nkela kimana zanatinuanga e Nkela.+  Ovangidi e fukwa kia wolo walembi sangwa lekwa.+ E fukwa kikedi ye yinkoso yole ye ndambu muna lambuka, kinkoso kimosi ye ndambu muna yalumuka.+  I bosi, ovangidi akelubi wole+ awolo watutwa muna malutelo yo kubatula vana nsuka zau zole za fukwa.+  Nkelubi mosi oku nsuka eyi, nkelubi mosi kuna nsuka yankaka. Otudidi akelubi vana nsuka zau zole za fukwa.  Akelubi yau awole bayalumwini mave mau vana ntandu, bafukidi e fukwa muna mave mau.+ Bakedi mantalani, e ndose zau zitadidi vana fukwa.+ 10  I bosi, ovangidi meza muna mabaya ma akasia.+ E meza makedi ye yinkoso yole muna lambuka, kinkoso kimosi muna yalumuka, kinkoso kimosi ye ndambu muna zanguka.+ 11  Olengele mo wolo walembi sangwa lekwa, ovangidi mvind’a wolo muna kinzieta kiandi. 12  Ovangidi e baya dia yalumuka kwa kandazi kia koko* muna kinzieta kia meza yo mvind’a wolo muna kinzieta kia baya. 13  I bosi, ovangidi nlunga nyá mia wolo mu kuma kia meza, olamikini mio muna konko yá, muna mwasiwa malu mau maya. 14  E nlunga lukufi miakala ye baya, i mûna mwaviokeselwanga e mbindi zanatina meza. 15  Ovangidi e mbindi zole za mabaya ma akasia, olengele zo wolo kimana zanatinuanga e meza. 16  Ovangidi mpe sadilwa ya wolo walembi sangwa lekwa ina yakalanga vana meza: malonga mandi, makopo mandi, pidi yandi ye mbidika zandi zina zayitidilwanga lukau lwa ndua.+ 17  I bosi, ovangidi zangikilwa kia minda+ kia wolo walembi sangwa lekwa. Ovangidi e zangikilwa kia minda mu malutelo. E telameseno kiandi, vimbu diandi, makopo mandi, ngonge zandi ye mvuma zandi, yawonso ikedi se lekwa kimosi.+ 18  Tayi sambanu itukidi muna vimbu diandi: tayi tatu ya zangikilwa kia minda oku ndambu eyi, tayi tatu ya zangikilwa kia minda kuna yaka ndambu. 19  Muna konso tayi kia ndambu eyi, mukedi ye makopo tatu mena nze mvuma za amande vana ntandu a konso ngonge ye mvuma zilandanene; muna konso tayi kia ndambu ina, mukedi ye makopo tatu nze mvuma za amande vana ntandu a konso ngonge ye mvuma zilandanene. I wau wuwu ukedi e tayi yawonso itukidi muna vimbu dia zangikilwa kia minda. 20  Muna vimbu dia zangikilwa kia minda mukedi ye makopo yá mena nze mvuma za amande, vana ntandu a konso ngonge ye mvuma zilandanene. 21  Kuna nsi a tayi yole yantete itukidi muna vimbu diandi, kukedi ye ngonge mosi; kuna nsi a tayi yole yanzole kukedi ye ngonge mosi; kuna nsi a tayi yole yantatu kukedi ye ngonge mosi; mu kuma kia tayi sambanu itukidi muna vimbu dia zangikilwa kia minda. 22  E ngonge, tayi ye zangikilwa kia minda kiawonso kikedi se lekwa kimosi, kivangilu muna wolo walembi sangwa lekwa watutwa muna malutelo. 23  Ovangidi minda miandi nsambwadi,+ ziminua ya minda ye lekwa yandi ya natina ntoto ampolo muna wolo walembi sangwa lekwa. 24  Ovangidi zangikilwa kia minda, kumosi ye salanganu yandi yawonso mu talanta mosi* ya wolo walembi sangwa lekwa. 25  Ovangidi e ziku dia ndumbu+ muna mabaya ma akasia. E ndambu zau yá za ziku zafwanana, kinkoso kimosi muna lambuka, kinkoso kimosi muna yalumuka, yinkoso yole muna lá. E mpoka ye ziku ikedi se lekwa kimosi.+ 26  Olengele dio wolo walembi sangwa lekwa: vana ntandu andi, muna ndambu zandi zawonso ye muna mpoka zandi; ovangidi mvind’a wolo muna kinzieta kiandi. 27  Ovangidi nlunga miole mia wolo mu kuma kia ziku, olamikini mio kuna nsi a mvind’andi muna ndambu zole zitalanene, i mûna mwaviokeselwanga e mbindi zanatinuanga e ziku. 28  I bosi, ovangidi mbindi zole za mabaya ma akasia, olengele zo wolo. 29  Ovangidi mpe mazi mavauka mankusa+ ye ndumbu ansunga, yavelela,+ yavangilwa muna umbangu wawonso.*

Mvovo vana yand'a lukaya

E kinkoso kimosi, centimetro 44,5. Tala Nku. B14.
Tezo kia centimetro 7,4. Tala Nku. B14.
E talanta mosi, yilo 34,2. Tala Nku. B14.
Yovo “mun’owu wa umbangu wa mvangi a mazi mansunga.”