Luvaiku 29:1-46
29 “I wau wuwu ovanga muna kubavaula kimana bansadila se anganga: Bonga mwan’a ngombe a koko yo mameme mole ma makoko makondwa e fu,+
2 mbolo zakondwa mfuna, mbolo zakondwa mfuna zina nze nlunga, zasangwa o mazi, mbolo zababama zakondwa mfuna, zakuswa o mazi.+ Vangila e mbolo zozo muna mfumfu ya witi,
3 tula zo muna mbangu, sunzula zo ova ntadisi ame muna mbangu+ kumosi ye ngombe yo mameme mole ma makoko.
4 “Sunzula Arone yo wan’andi amakala vana mwelo a saba kia wananina,+ ubasukula muna maza.+
5 I bosi, obonga e mvuatu+ yo vuika Arone e mvuela, yunga kiakondwa o moko kia kidukula, kidukula ye babu kia tulu; ofwete toma kanga e mponda ya kidukula muna luketo lwandi.+
6 Osia e mpu a nlele vana ntu andi, tula mpe sinsu kiavauka kia kukiyekola* vana mpu a nlele;+
7 bonga mazi mankusa,*+ yitila mo vana ntu andi yo kunkusa.+
8 “I bosi, twasa o wan’andi oku ntwala, ubavuika e mvuela+
9 yo kubakanga e mponda, o Arone yo wan’andi, ubatula e fukilwa ya ntu. Muna mpila yayi, e kinganga kikituka se kiau, owau nkanikinu ame wakwele mvu.+ I wau wuwu otumbikila Arone yo wan’andi kimana basala se anganga.*+
10 “Sunzula e ngombe a koko vana saba kia wananina, o Arone yo wan’andi betenseka o moko mau vana ntu a ngombe a koko.+
11 Vondela e ngombe a koko vana ndose a Yave, vana mwelo a saba kia wananina.+
12 Vunga o nlembo aku muna menga ma ngombe a koko, kusa mo muna mpoka za ziku;+ yitila menga mawonso mesala vana sina dia ziku.+
13 I bosi, bonga mazi+ mawonso mefukanga e ndia, mazi mena vana kimoyo,* nguba zau zole yo mazi mena vana nguba; yoka yo kimana yafutumuna mwisi vana ziku.+
14 Kansi, e mbizi a ngombe a koko yo nkand’andi ye doti, yoka yo vana tiya kuna mbazi a ndo. Olwalu i lukau lwa sumu.
15 “I bosi, baka meme dimosi dia koko, o Arone yo wan’andi bafwete tenseka moko mau vana ntu a meme diakoko.+
16 Vonda e meme diodio, bonga menga mandi yo zaza mo muna ndambu zawonso za ziku.+
17 Zenga e meme mu tini-tini, sukula e ndia+ yo malu mandi, kutika e tini va fulu kimosi, sia yo vamosi yo ntu andi.
18 Ofwete yoka e meme dia koko diawonso, futumuna dio vana ziku. Olwalu i lukau lwa ngioka kwa Yave, nsunga zambote.*+ Olwalu i lukau kwa Yave lwayoka vana tiya.
19 “I bosi, bonga e meme diankaka dia koko, Arone yo wan’andi bafwete tenseka moko mau vana ntu a meme.+
20 Vonda e meme dia koko, bonga e ndambu a menga mandi yo tula mo vana nsuk’a kutu kwalunene kwa Arone ye vana nsuka za matu malunene ma wan’andi, tula mo mpe vana nlembo mianene mia moko mau malunene ye vana nlembo mianene mia malu mau malunene, zaza mpe menga muna ndambu zawonso za ziku.
21 I bosi, bonga fimenga muna menga mena vana ziku ye fimazi mankusa,*+ zaza mo kwa Arone ye mvuatu miandi, kwa wan’andi ye mvuatu miau, kimana Arone ye mvuatu miandi, o wan’andi ye mvuatu miau, bakala bavauka.+
22 “I bosi, bonga o mazi muna meme dia koko, nkil’a mazi, mazi mana mefukanga e ndia, mazi ma kimoyo,* e nguba zau zole, mazi mena vana ntandu a nguba+ ye tó kialunene kia kulu, kadi ediadi i meme dia tumbikila anganga.+
23 Muna mbangu ina ye mbolo zakondwa mfuna eyi ina vana ndose a Yave, bonga mo mpe mbolo yavindumuka, mbolo ina nga nlunga yakuswa o mazi ye mbolo yababama.
24 Ofwete tula e lekwa yayi yawonso vana moko ma Arone ye vana moko ma wan’andi, ongeye zunganisa yo kuna ntwala y’oku nima se lukau lwa zunganisa vana ndose a Yave.
25 I bosi, tambula yo vana moko mau yo yoka yo vana ziku, vana ntandu a lukau lwa ngioka se nsunga zambote* vana ndose a Yave. Olwalu i lukau kwa Yave lwayoka vana tiya.
26 “I bosi, bonga e tulu kia meme dia koko dia tumbikila anganga,+ dina divewa mu kuma kia Arone, zunganisa kio kuna ntwala y’oku nima se lukau lwa zunganisa vana ndose a Yave, kiaki kikala se kunku kiaku.
27 Vaula e tulu kia lukau lwa zunganisa ye to kia kunku kiavauka kina kizunganisu, eki kibongelo muna meme dia koko dia tumbikila anganga,+ dina ditambikilu mu kuma kia Arone yo wan’andi.
28 E lekwa yayi ikala ya Arone yo wan’andi muna nkanikinu ulemvokelwa kwa Aneyisaele yakwele mvu, kadi kunku kiavauka, kikala se kunku kiavauka kina Aneyisaele bafwete vana.+ I kunku kiau kiavauka kwa Yave, kina kituka muna lukau lwau lwa yimenga ya ungudi.+
29 “E mvuatu miavauka+ mia Arone, mivuatwa kwa wan’andi+ ana bevinga vana fulu kiandi, vava bekuswa yo tumbikwa se anganga.
30 O nganga ona otuka muna wan’andi yo vinga vana fulu kia Arone, ona okota muna saba kia wananina mu sadila vana fulu kiavauka, kafwete vuata e mvuatu miami mu lumbu nsambwadi.+
31 “Bonga e meme dia koko dia tumbikila anganga yo lambila e mbizi andi vana fulu kiavauka.+
32 O Arone yo wan’andi vana mwelo a saba kia wananina bedila e mbizi+ a meme ye mbolo zina vana mbangu.
33 Bedia e lekwa ina itambikilu mu kuma kia luyambulwilu lwa masumu ye ntumbikilu au se anganga* ye muna kubavaula. Kansi, o muntu ona kaven’o nswa ko* kafwete yo dia ko, kadi lekwa yavauka.+
34 Muna lukau lwa tumbikila anganga, avo vasuvidi mbizi yovo mbolo yamuna mene, yoka yo vana tiya.+ Ka ifwete diwa ko, kadi lekwa yavauka.
35 “I wau wuwu ovanga kwa Arone yo wan’andi, mun’owu wa mambu mawonso ikanikini. Lumbu nsambwadi ovanga muna kubatumbika se anganga.*+
36 E lumbu yawonso, otambika ngombe a koko se lukau lwa sumu mu kuma kia luyambulwilu lwa masumu. Velelesa e ziku muna tambika lukau lwalu lwa luyambulwilu lwa masumu, kusa dio o mazi kimana wavaula dio.+
37 Lumbu nsambwadi ovanga mu vana lukau lwa luyambulwilu lwa masumu mu kuma kia ziku. Ofwete dio vaula kimana diakala se ziku diavauka kikilu.+ Konso ndiona osadila vana ziku kafwete kala wavauka.
38 “Eyayi i lekwa nutambika vana ziku lumbu yawonso: wan’a mameme wole amakoko a mvu mosi konso lumbu.+
39 Tambika mwan’a meme mosi muna mene, o mwan’a meme ankaka muna nkokela, vitila e tombe kiabukama.*+
40 O mwan’ameme antete okuntambika kumosi ye tini kiakumi kia efa* ya mfumfu yambote, yasangwa e tini kiaya kia yini* kia mazi ma olive yatutwa, tini kiaya kia yini ya vinyu se lukau lwa ndua.
41 Otambika mwan’a meme wanzole muna nkokela, vitila tombe kiabukama,* kumosi ye mbwaza yo tukau twa ndua tuna osadidi muna mene. Otambika yo se nsunga zambote,* lukau kwa Yave vana tiya.
42 Olwalu i lukau lwa ngioka lutambikwa vana ndose a Yave muna mbandu zeno zawonso, vana mwelo a saba kia wananina, vana ikuyisunzulwila kwa yeno muna mokena yaku vavana.+
43 “I vana ikuyisunzulwila kwa Aneyisaele, e fulu kiakina kikala se kiavauka mu kuma kia nkembo ame.+
44 Ivaula e saba kia wananina ye ziku, ivaula mpe Arone yo wan’andi+ kimana bansadila se anganga.
45 Ikala vana kati kwa nkangu a Isaele, omono ikala Nzambi au.+
46 Bezaya kieleka vo mono i Yave wa Nzambi au, ona wabavaikisa muna nsi ya Engipito kimana yakala vana kati kwau.+ Mono i Yave wa Nzambi au.
Mvovo vana yand'a lukaya
^ Yovo “kolowa yavauka.”
^ I sia vo, mazi masadilwanga muna tumbika muntu.
^ Mvovo wa sina: “I wau wuwu ozadisila koko kwa Arone yo koko kwa wan’andi.”
^ Yovo “muna kati.”
^ Yovo “nsunga zilembekanga; zivuvikanga ntima.” Mvovo wa sina: “zivundisanga.”
^ I sia vo, mazi masadilwanga muna tumbika muntu.
^ Yovo “kati.”
^ Yovo “nsunga zilembekanga; zivuvikanga ntima.” Mvovo wa sina: “zivundisanga.”
^ Mvovo wa sina: “ye muna nzadisilu a moko mau.”
^ Mvovo wa sina: “nzenza,” i sia vo, muntu una vo katuka mu vumu kia Arone ko.
^ Mvovo wa sina: “muna zadisa moko mau.”
^ Mvovo wa sina: “vana kati kwa nkokela zole.”
^ Mvovo wa sina: “vana kati kwa nkokela zole.”
^ Yovo “nsunga zilembekanga; zivuvikanga ntima.” Mvovo wa sina: “zivundisanga.”
